كەشە استانادا «نۇر وتان» پارتياسىنىڭ بەلسەندىسى, ءماجىلىس دەپۋتاتى نادەجدا پەتۋحوۆانىڭ باسشىلىعىمەن «ارداگەرلەردى ارداقتايىق» جوباسىنىڭ اياسىندا ۇلى وتان سوعىسى ارداگەرلەرىنىڭ ءومىر ءسۇرۋ جاعدايىن قايتا زەرتتەۋ ناتيجەلەرى بويىنشا «ۇلت دەنساۋلىعى» ساراپتامالىق توبىنىڭ سەلەكتورلىق بايلانىس رەجىمىندەگى كەڭەسى ءوتتى.
وتىرىس جۇمىسىنا پارلامەنت ءماجىلىسى مەن ءماسليحاتتاردىڭ دەپۋتاتتارى, دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باسشىلىعى, «ارداگەرلەر ۇيىمى» رقب, ۇكىمەتتىك ەمەس ۇيىمداردىڭ وكىلدەرى قاتىستى.
وتىرىستا ۇلى وتان سوعىسى ارداگەرلەرىنىڭ ءومىر ءسۇرۋ جاعدايى بويىنشا جۇرگىزىلگەن زەرتتەۋ ناتيجەلەرى مەن ءدارى-دارمەكپەن قامتاماسىز ەتۋ جاعىنان ولاردى الەۋمەتتىك قورعاۋ شارالارى تالقىلاندى.
پارتيالىق كۋراتور نادەجدا پەتۋحوۆانىڭ ايتۋىنشا, «وتكەن جىلى «ارداگەرلەردى ارداقتايىق» پارتيالىق جوباسىنىڭ اياسىندا 5,4 مىڭ ۇلى وتان سوعىسى ارداگەرلەرىنىڭ ءومىر ءسۇرۋ جاعدايى زەرتتەلىپ, ناتيجەلەرى بويىنشا پارتيا تاراپىنان 10 مىڭنان استام پروبلەمالىق ماسەلە باقىلاۋعا الىندى».
اتالعان جۇمىس جالعاسۋدا جانە قايتا جۇرگىزىلگەن 5 مىڭ ارداگەردىڭ ءومىر ءسۇرۋ جاعدايىن زەرتتەۋدىڭ ناتيجەلەرى بويىنشا كوبىنەسە مەديتسينالىق قامتاماسىز ەتۋگە قاتىستى 5,6 مىڭ ماسەلە پارتيا باقىلاۋىنا الىندى.
وسى ماسەلەلەردى شەشۋ ماقساتىندا «نۇر وتان» پارتياسى مەملەكەتتىك ورگاندارمەن, ۇكىمەتتىك ەمەس ۇيىمدارمەن بىرلەسە وتىرىپ, ارداگەرلەردى ۇيلەرىندە ديسپانسەرلىك قاراۋ, ستوماتولوگيالىق مەديتسينالىق كومەك, ستاتسيونارلىق ەمدەۋ, مەديتسينالىق-الەۋمەتتىك قىزمەت جاساۋ, ءدارى-دارمەكپەن, جەدەل جاردەمنىڭ ەلەكتروندى بەلگى بەرگىشپەن قامتاماسىز ەتۋ شارالارى كىرەتىن جۇيەلى جۇمىس ۇيىمداستىردى.
سونىمەن قاتار, تۇراقتى كومەك كورسەتۋ ماقساتىندا ءاربىر ارداگەرگە باستاۋىش پارتيالىق ۇيىمدار جانە «جاس وتان» جاستار قاناتى قاتارىنان ەرىكتىلەر بەكىتىلگەن.
«ارداگەرلەر ۇيىمى» رەسپۋبليكالىق قوعامى ورتالىق كەڭەسىنىڭ توراعاسى ومىرزاق وزعانباەۆ: «وتاندىق دەنساۋلىق ساقتاۋ سالاسىن دامىتۋ ءۇشىن ەلىمىزدە از نارسە جاسالىپ جاتقان جوق. سوعىس ارداگەرلەرىنىڭ مەديتسينالىق قامتاماسىز ەتىلۋىنە, سونىڭ ىشىندە جەڭىس مەرەيتويىنا دايىندىق بارىسىندا جۇزەگە اسىپ جاتقان قوسىمشا شارالار ءۇشىن ەرەكشە العىس بىلدىرەمىز», دەدى.
كەڭەس ناتيجەسى بويىنشا ءتيىستى مەملەكەتتىك ورگاندارعا ۇلى وتان سوعىسى ارداگەرلەرىن مەديتسينالىق قامتاماسىز ەتۋ ساپاسىن ودان ءارى جاقسارتۋ بويىنشا ۇسىنىستار جولداناتىن بولادى.
جاقسىباي سامرات,
«ەگەمەن قازاقستان».