شىعىس وڭىرىندە اگروونەركاسىپ كەشەنىن دامىتۋ بويىنشا جالپى سوماسى 9,3 ملرد. تەڭگەنى قۇرايتىن 154 ءىرى جانە شاعىن جوبا جۇزەگە اسىرىلدى. وسى ارقىلى «قازاگرو» ۇلتتىق باسقارۋشى حولدينگى» اق ينستيتۋتىمەن قارجىلاندىرىلاتىن ينۆەستيتسيالىق جوبالاردى جۇزەگە اسىرۋ جۇمىستارى جاندانا ءتۇستى. وبلىستىق اۋىل شارۋاشىلىعى باسقارماسىنىڭ باسشىسى دۇيسەمباي سەليحانوۆتىڭ ايتۋىنشا, 2014 جىلى «قازاگرو» جەلىسى بويىنشا وبلىستا 6,1 ملرد. تەڭگەگە 68 جوبا ورىندالدى. وسىلايشا, «قازاگرو» جەلىسى بويىنشا جوبالاردىڭ سانى 2013 جىلمەن سالىستىرعاندا 3,5 ەسەگە ۇلعايىپ, ينۆەستيتسيا كولەمى 2,2 ەسەگە ءوستى.
قازىرگى كەزدە وبلىس كولەمىندە 49 مىڭ باسقا ارنالعان 285 بورداقىلاۋ الاڭى قۇرىلىپ, جۇمىس ىستەۋدە. ونىڭ ىشىندە 9 الاڭ وتكەن جىلى ىسكە قوسىلدى. ءسۇت ءوندىرىسىن ۇلعايتۋ ماقساتىندا بورودۋليحا اۋدانىندا «ە.زايتەنوۆ» شارۋا قوجالىعىنىڭ تاۋارلى ءسۇت فەرماسىن روبوتتاندىرۋ جوباسى اياقتالىپ, ۇلان اۋدانىندا 100 باسقا ارنالعان ەكى, 400 باسقا ارنالعان ءبىر تاۋارلى ءسۇت فەرماسى سالىندى. سونداي-اق, «التىن اسىق», «قۇلان», «ىرىس» جانە «جايلاۋ» سىندى مال شارۋاشىلىعىن دامىتۋعا ارنالعان باعدارلامالار شەڭبەرىندە ءوڭىردىڭ اۋىلشارۋاشىلىق تاۋارىن وندىرۋشىلەر 13 مىڭ باس قوي, 1,5 مىڭ باس جىلقى ساتىپ الدى.
ماشينا-تراكتور پاركىن جاڭارتۋ بويىنشا بىرقاتار جۇمىستار ءجۇرگىزىلدى. 2014 جىلى 6,1 ملرد. تەڭگەگە 810 اۋىلشارۋاشىلىق تەحنيكاسى ساتىپ الىندى. سونىڭ ىشىندە 5,1 ملرد. تەڭگەگە 646 دانا تەحنيكا ليزينگ ارقىلى الىنىپ, بۇل ماقساتتاعى جالپىرەسپۋبليكالىق شىعىننىڭ 16 پايىزىن قۇرادى. بىلتىر «قازاگروقارجى» اق ارقىلى ماشينا-تراكتور پاركىن جاڭارتۋعا قۇيىلعان ينۆەستيتسيا كولەمى 34 پايىزعا ءوستى. وتكەن جىلى وڭىردە اۋىلشارۋاشىلىق ءونىمىنىڭ جالپى كولەمى 300 ملرد. تەڭگەگە جۋىقتادى. بۇل 2013 جىلعى دەڭگەيمەن سالىستىرعاندا 2,2 پايىزعا جوعارى. اتالعان كورسەتكىش بويىنشا شىعىس ءوڭىرى رەسپۋبليكادا ءۇشىنشى ورىنعا تابان تىرەپ وتىر.
وتكەن جىلدىڭ قورىتىندىسى بويىنشا ەگىستىك القاپتار 16,7 مىڭ گەكتارعا, ءداندى داقىلدار القابى 27 مىڭ گەكتارعا ءوستى. ودان وزگە 438 مىڭ گەكتار جەرگە ىلعال ۇنەمدەۋ تەحنولوگياسى ەنگىزىلدى. سونىمەن قاتار, وڭىردە سۋارمالى جەر مەن سۋارۋدىڭ تىڭ ادىستەرى؟
ن ەنگىزۋ بويىنشا ءىس-شارالار جالعاسۋدا. ماسەلەن, سۋارمالى جەر كولەمى 5 مىڭ گەكتارعا ارتىپ, 90 مىڭ گەكتار, جاڭبىرلاتىپ سۋارۋ ءادىسى بويىنشا سۋارىلاتىن القاپتار 8900 گەكتاردى قۇراسا, تامشىلاتىپ سۋارۋ 850 گەكتارعا جەتتى.
مال شارۋاشىلىعىندا دا وڭ كورسەتكىشتەر بار. ەت ءوندىرۋ كولەمى 2013 جىلمەن سالىستىرعاندا 6,6 پايىزعا, ءسۇت ءوندىرۋ 2,4, جۇمىرتقا 7,4 پايىزعا ءوستى. ءمۇيىزدى ءىرى قارا سانى – 2,3 , جىلقى – 5,7, قوي مەن ەشكى – 99, قۇس 4,4 پايىزعا ارتتى. شەتەلدىك 1696 ەتتى ءىرى قارا ساتىپ الىندى. ونىڭ ىشىندە «قازاگرو» ارقىلى 1026 باس سيىر اكەلىندى. «سىباعا» باعدارلاماسى بويىنشا 1 ملرد. تەڭگەگە 5,3 مىڭ باس ءمۇيىزدى ءىرى قارا ساتىپ الىنىپ, جوسپار 114 پايىزعا ارتىعىمەن ورىندالدى. 2014 جىلى «ءمۇيىزدى ءىرى قارا ەتىنىڭ ەكسپورتتىق الەۋەتىن دامىتۋ» جوباسىن جۇزەگە اسىرۋ شەڭبەرىندە اسىل تۇقىمدى شارۋاشىلىقتار سانى 8 داناعا كوبەيدى. كاتونقاراعاي اۋدانىندا 1000 باسقا ارنالعان «انگۋس» جانە «ليمۋزين» اسىل تۇقىمىن وسىرەتىن شارۋاشىلىق قۇرىلدى.
ەڭ باستىسى, سوڭعى كەزدە ءوڭىر باسشىسى دانيال احمەتوۆتىڭ تاپسىرماسى بويىنشا, تاۋارلى ءسۇت فەرمالارىن دامىتۋعا ۇلكەن كوڭىل بولىنۋدە. ءسۇت جانە ءسۇت ونىمدەرى ءوندىرىسىنىڭ كولەمىن ۇلعايتۋ بويىنشا وتكەن جىلى تاۋارلى ءسۇت فەرمالارىن قۇرۋ ءارى كەڭەيتۋ جانە ءسۇت قابىلداۋ بەكەتتەرى جەلىسىن اشۋ باعدارلاماسى جۇزەگە اسىرىلا باستادى. تاۋارلى ءسۇت فەرمالارىن دامىتۋ شەڭبەرىندە 2016 جىلدىڭ سوڭىنا دەيىن وبلىس كولەمىندە 12,8 مىڭ باس ساۋىن سيىر ۇستاۋعا ارنالعان 37 تاۋارلى ءسۇت فەرماسىن قايتا جابدىقتاۋ جانە جاڭادان قۇرۋ كوزدەلگەن.
سونداي-اق, شىعىس ءوڭىرى كورشى رەسەي ەلىنە ءىرى قارا ەتىن ەكسپورتتاۋعا دايىن.
دۋمان اناش,
«ەگەمەن قازاقستان».
وسكەمەن.