قازاقستان رەسپۋبليكاسى تۇڭعىش پرەزيدەنتى – ەلباسىنىڭ قورى ۇستىمىزدەگى جىلى «ىنتىماعى مەن بىرلىگى جاراسقان قازاقستان» اتتى تاقىرىپتا كەزەكتى رەسپۋبليكالىق الەۋمەتتىك يدەيالار مەن جوبالار كونكۋرسىن جاريالادى. قازاقستان حالقى اسساملەياسى جىلىنا ارنالعان كونكۋرستىڭ ماقساتى قوعامدى تاتۋلىققا توپتاستىرۋ, ءپاتريوتيزمدى نىعايتۋ, كوممەرتسيالىق ەمەس قوعامدىق ۇيىمداردىڭ وزەكتى الەۋمەتتىك ماڭىزدى پروبلەمالاردى شەشۋگە اتسالىسۋىنا قولداۋ جاساۋ بولىپ تابىلادى.
جاقىندا وبلىس ورتالىعىنداعى مۇعالىمدەر بىلىكتىلىگىن جەتىلدىرۋ ينستيتۋتىنىڭ عيماراتىندا ۇكىمەتتىك ەمەس ۇيىمدارعا ارنالعان وقىتۋ سەمينارلارى مەن ۇزدىك الەۋمەتتىك جوبالاردى انىقتاۋ ءۇشىن تۇساۋكەسەر-كورمەلەر وتكىزىلدى.
الەۋمەتتىك جوبالار كونكۋرسى 2008 جىلدان ۇيىمداستىرىلىپ كەلەدى. وسى كەزەڭدە وعان 100-دەن استام ءتۇرلى قوعامدىق ۇيىمدار قاتىستى. ەلىمىزدىڭ كەز كەلگەن وڭىرىنەن كوممەرتسيالىق ەمەس ۇيىمدار ءوز جوبالارىن كونكۋرسقا جىبەرە الادى, ەگەر قاجەتتى تالاپتارعا سايكەس كەلەتىن بولسا, ولاردى جۇزەگە اسىرۋعا قاراجات بولىنەدى. كونكۋرستىڭ تالاپتارى بويىنشا قاتىسۋشىلار ءوز جوبالارىنا نەگىزدەمە ۇسىنۋى, بولىنگەن قاراجاتتى قالاي جۇمسايتىنى جانە ءوڭىردىڭ تۇرعىندارىنا قانداي تۇپكىلىكتى ناتيجە بەرەتىنى جونىندە تۇسىنىكتەمە بەرۋى ءتيىس.
ساراپشىلاردىڭ پىكىرىنشە, الەۋمەتتىك يدەيالار مەن جوبالار كونكۋرسى الەۋمەتتىك ماڭىزدى پروبلەمالاردى شەشۋگە قابىلەتتى بەلسەندى قوعامدىق ۇيىمداردىڭ سانىن ۇلعايتۋعا, سونداي-اق جوعارىدان كۇشتەپ مىندەتتەلگەن ەمەس, تومەننەن قولعا الىنعان الەۋمەتتىك باستامالاردى جانداندىرۋعا جاعداي جاسايدى.
الەۋمەتتىك جوبالار كونكۋرسىنىڭ ايماقتىق تۇساۋكەسەر-كورمەسىنە اتىراۋ, ماڭعىستاۋ, باتىس قازاقستان جانە اقتوبە وبلىستارىنان 17 جوبا قاتىستى. شارانى قىسقاشا ءسوز سويلەپ اشقان مارات وسپانوۆ قورىنىڭ پرەزيدەنتى باقىت احمەتقاليەۆا الەۋمەتىك ماسەلەلەردى وڭ شەشۋدەگى ۇكىمەتتىك ەمەس ۇيىمداردىڭ رولىنە توقتالا كەلىپ, ولاردىڭ قوعام دامۋىنا سەرپىن بەرۋدەگى ۇلەسىن ايرىقشا اتاپ ءوتتى. وسى ماقساتتا الەۋمەتتىك جوبالار جارمەڭكەلەرىن وڭىرلەردە وتكىزۋ بۇل باعىتتاعى جۇمىستاردىڭ اۋقىمىن كەڭەيتە تۇسكەنىن تىلگە تيەك ەتە كەتتى. جالپى, قوعامدا ۇكىمەتتىك ەمەس ۇيىمدار اينالىساتىن ماسەلەلەردىڭ كوپتىگىن, سوعان بەلسەندىلىك تانىتۋ قاجەتتىگىن دە اڭگىمە وزەگىنە اينالدىردى.
تۇساۋكەسەر - كورمە اشىلعاننان كەيىن گرانتتان ۇمىتكەرلەر وزدەرىنىڭ جوبالارىن قورعاۋعا كىرىستى.
– ءبىز «دوستىق قالا – قۋاتتى ەل» اتتى الەۋمەتتىك جوبانى جۇزەگە اسىرعىمىز كەلەدى. ءبىزدىڭ ۇكىمەتتىك ەمەس ۇيىم ون بەس جىلدان بەرى جۇمىس ىستەيدى. بۇعان دەيىن دە كوپتەگەن الەۋمەتتىك جوبالاردى جۇزەگە اسىرىپ, تاجىريبە جينادىق. بۇل جوبا ارقىلى قالاداعى قوعامدىق ءتارتىپتىڭ نىعايۋىنا, تۇرعىنداردى قالانىڭ ومىرىنە كەڭىنەن تارتۋعا, جاستار مەن ستۋدەنتتەردىڭ بوس ۋاقىتىن ءتيىمدى وتكىزۋگە ۇيىتقى بولاتىنداي شارالار ۇيىمداستىرۋ ويدا بار. قالا, تۇرعىن ءۇي الاڭدارىندا كەزدەسۋلەر, دوڭگەلەك ۇستەلدەر, تەاترلاندىرىلعان قويىلىمدار ۇيىمداستىرۋ ارقىلى 500-دەن استام ادامدى قامتۋعا قول جەتكىزەمىز. مۇمكىندىگى شەكتەۋلى قولونەر شەبەرلەرىنىڭ كورمەسىن, «مەنىڭ سۇيىكتى كورشىم» كونكۋرسىن, اۆتوشەرۋ جانە «مەنىڭ كىشى وتانىم» اتتى كونكۋرس پەن باسقا شارالار وتكىزۋ ارقىلى شاھار مادەنيەتىن ارتتىرۋعا ۇلەس قوسامىز. وسىنداي شارالارمەن اۋدانداردى دا قامتيمىز, – دەيدى «اقتوبە قالاسىنداعى سال اۋرۋلارىنا شالدىققان ازاماتتار قۇقىعىن قورعاۋ قوعامى» قوعامدىق بىرلەستىگىنىڭ ءتورايىمى قۇرالاي بايمەنوۆا.
ال, ماڭعىستاۋلىق كۇرەڭ مەدەۋوۆا باسقاراتىن «حازىرەت» جاستار قوعامدىق قورى 18-40 جاستارداعى مۇمكىندىگى شەكتەۋلى قىز-كەلىنشەكتەردىڭ ءوز ءىسىن اشىپ, قولونەر بۇيىمدارىن جاساپ, كاسىپكەرلىككە بەت بۇرۋىنا مۇرىندىق بولادى ەكەن. وسى كورمەگە دە جۇننەن جاسالعان, توقىلعان ءبىراز بۇيىمدار اكەلىپتى. ولاردىڭ اراسىندا توقىما جەيدەلەر, قول سومكە, اياق كيىم, جانە باسقا تۇرمىستىق بۇيىمدار بار. كاسىپكەر كەلىنشەك شالا تۋعان سابيگە كيگىزەتىن بايپاقتىڭ قاسيەتىن تۇسىندىرگەندە تاڭعالۋعا تۋرا كەلدى. بۇل بايپاقتى كيگىزگەندە ءجۇن بالانىڭ تەز دامۋىنا وڭ اسەر ەتەتىن كورىنەدى.
جالپى, مۇنداي الەۋمەتتىك جوبالار جارمەڭكەسىن وتكىزۋ, كورمە ۇيىمداستىرۋ مۇمكىندىگى شەكتەۋلى جانداردىڭ وزدەرىن قوعامنىڭ تولىققاندى مۇشەسى رەتىندە سەزىنۋىنە, ولاردىڭ كاسىپكەرلىكتى يگەرۋىنە, ەڭبەكپەن قامتىلۋىنا نەگىز قالايتىنىن ءومىردىڭ ءوزى كورسەتىپ وتىر.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.