كەشە تۇستەن كەيىن ەلباسى نۇرسۇلتان نازارباەۆ جۇمىس ساپارىمەن اقتوبەگە كەلدى. مەملەكەت باسشىسى بىردەن وبلىستىق كوپ سالالى اۋرۋحاناعا اتباسىن تىرەدى. اق حالاتتىلار ءساۋىردىڭ شۋاعىنداي اقجارقىن قۋانىشتى جۇزبەن قارسى الدى. مۇندا ەلباسى اۋرۋحانا ۇجىمىمەن كەزدەستى. بۇل ەمدەۋ مەكەمەسى پرەزيدەنت ن.نازارباەۆتىڭ باستاماسىمەن «100 مەكتەپ, 100 اۋرۋحانا» مەملەكەتتىك باعدارلاماسى اياسىندا سالىنعان-دى. 320 كەرەۋەتتىك وبلىستىق كوپسالالى اۋرۋحانا قۇرىلىسىنا 11,8 ميلليارد تەڭگە جۇمسالدى.
اۋرۋحانا وسى زامانعى وزىق مەديتسينالىق قۇرال-جابدىقتارمەن جابدىقتالعان. ەمدەۋ مەكەمەسىندە كەڭ اۋقىمدى 1,5 تەسلا ماگنيتتى-رەزونانستى توموگراف, انگيوگرافيالىق, رەنتگەنولوگيالىق, ەندوسكوپيالىق جانە رەانيماتسيالىق قوندىرعىلار, تازا ورتا, مەديتسينالىق گاز جۇيەلەرى, قازىرگى زامانعا ساي ەكسپەرتكلاستى ۋلترادىبىستىق سكانەرلەر, «جاساندى بۇيرەك» جانە «جاساندى باۋىر» اپپاراتتارى, باروكامەرالار بار. اۋرۋحانانىڭ جالپى قابىلدانعان 24 ءبولىمىنەن باسقا, وبلىستاعى ءبىردەن-ءبىر ەندوكرينولوگيالىق, وتولارينگولوگيالىق, ۋرولوگيالىق, قان تامىرلارى حيرۋرگياسى, گبو بولىمشەلەرى دە وسىندا جۇمىس ىستەيدى. مۇندا ەمدەۋدىڭ, وتا جاساۋدىڭ جاڭا تەحنولوگيالارى ەنگىزىلگەن, اورتا-ورتا جىلىكتى ۇشتاستىرۋ, ۆاسكۋليارلى وپەراتيۆتى ارالاسۋ, جامباس-ورتان جىلىك جانە تىزە بۋىندارىن ەندوپروتەزدەۋ, ترانسپلانتولوگيا, كەڭ اۋقىمداعى ەندوبەينەحيرۋرگيا سياقتى كۇردەلى وپەراتسيالار جاسالادى.
ەلباسىن جاڭا اۋرۋحانانىڭ جۇمىسىمەن ەگجەي-تەگجەيلى تانىستىرىپ وتكەن وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ وڭىردەگى وسى سالاداعى وڭ وزگەرىستەرگە دە توقتالا كەتتى.
ونىڭ مالىمدەۋىنشە, 2014 جىلى دەنساۋلىق ساقتاۋ سالاسىنا جۇمسالعان قاراجات مولشەرى 31,0 ملرد. تەڭگەنى قۇراعان. وتكەن جىلى دەنساۋلىق ساقتاۋ مەكەمەلەرىن سالۋ جانە كۇردەلى جوندەۋ بويىنشا ەكى مەملەكەتتىك باعدارلاما ويداعىداي اياقتالعان. ەلدى مەكەندەردە 10 دارىگەرلىك امبۋلاتوريا پايدالانۋعا بەرىلىپ, 138 جۇمىس ورنى اشىلىپ, 16 دەنساۋلىق ساقتاۋ نىسانى كۇردەلى جوندەۋدەن وتكىزىلگەن.
ەلباسى ءسوز اراسىندا باسقارما باسشىسىنان بالا تۋ مەن ءسابيلەردىڭ شەتىنەۋ جاعدايىن سۇرادى.
ءوز سوزىندە اسەت قاليەۆ وتكەن جىلدىڭ قورىتىندىسى بويىنشا بالا تۋ كورسەتكىشى 0,4 پايىزعا ارتىپ, 19740 ءسابي دۇنيەگە كەلگەنىن, حالىقتىڭ تابيعي ءوسىمى كوتەرىلگەنىن جەتكىزدى. الەۋمەتتىك ماڭىزى بار اۋرۋلاردان بولاتىن ءولىم-ءجىتىم سانى تومەندەپ, ءاسىرەسە, بالا ءولىمى تاۋەلسىزدىك العان جىلداردان بەرگى ۋاقىتتا بەس ەسەگە دەيىن كەمىگەنىن, اۋرۋدى ەرتە انىقتاۋ ناتيجەسىندە سوڭعى ون جىلدا ءومىر ءسۇرۋ ۇزاقتىعى 5,6 جاسقا ارتىپ, اقتوبەلىكتەردىڭ ورتاشا ءومىر ءسۇرۋ دەڭگەيى وتكەن جىلى 71,6 جاسقا جەتكەنىن ءمالىم ەتتى.
سودان كەيىن نۇرسۇلتان ءابىش ۇلى كەزدەسۋگە جينالعان اق حالاتتىلارمەن اڭگىمەلەستى. قازاقستان پرەزيدەنتى بۇل اۋرۋحانانىڭ جاڭا عيماراتتا ورنالاسقانىن, زاماناۋي قۇرالدارمەن جابدىقتالعانىن اتاپ ءوتتى.
– كوپ نارسە ەندى سىزدەرگە بايلانىستى. ەگەر ءوز جۇمىستارىڭىزدى ساپالى اتقارىپ, قولدا بار جابدىقتاردىڭ مۇمكىندىگىن تولىق پايدالاناتىن بولساڭىزدار, حالىق دەنساۋلىعىن جاقسارتۋعا زور ۇلەس قوساسىزدار. ءبىزدىڭ ەلىمىزدە دەنساۋلىق ساقتاۋ سالاسىنا زور كوڭىل ءبولىنىپ وتىر, قازاقستان جان باسىنا شاققاندا بۇل سالاعا بولىنەتىن قاراجات كولەمى جونىنەن دامىعان ەلدەر دەڭگەيىنە تاياپ كەلەدى. رەسپۋبليكادا سوڭعى 20 جىلدا مىڭعا جۋىق دەنساۋلىق ساقتاۋ نىسانى سالىندى. حالىق وتاندىق مەديتسيناعا سەنىم ارتا باستادى, ال كورشى ەلدەردىڭ ازاماتتارى ەمدەلۋ ءۇشىن بىزگە كەلەتىن بولدى, – دەدى مەملەكەت باسشىسى.
ءسوزىنىڭ سوڭىندا نۇرسۇلتان نازارباەۆ مەديتسينا قىزمەتكەرلەرىنە تابىس جانە باق-بەرەكە تىلەدى.
كەزدەسۋدە ءسوز العان اۋرۋحانانىڭ گوسپيتالدى حيرۋرگيا ءبولىمىنىڭ مەڭگەرۋشىسى بازىلبەك جاكيەۆ, ەندوكرينولوگيا ءبولىمىنىڭ مەڭگەرۋشىسى ۆلاديمير كوتلوبوۆسكي, دەنساۋلىق سالاسىنىڭ ارداگەرى ىزباسقان ايماعامبەتوۆ قازاقستان پرەزيدەنتىنە رەسپۋبليكادا دەنساۋلىق ساقتاۋ سالاسىن دامىتۋعا, بىلىكتىلىكتى ارتتىرۋعا جانە ءتاجىريبە الماسۋعا قاجەتتى جاعداي جاسالعانى ءۇشىن زور ريزاشىلىقتارىن ءبىلدىردى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.