استانا. 3 ءساۋىر. شۆەيتساريادا وتكەن «Die grössten Schweizer Talente» تانىمال جوباسىندا ونەر كورسەتكەن قىرعىزستاندىق يلليۋزيونيستەر راديسلاۆ سافين مەن ولگا كرامەر وزدەرىنىڭ زور شەبەرلىكتەرىمەن قازىلار القاسىن ەستەرىنەن تاندىردى. بۇل تۋرالى KNews حابارلادى.
قىرعىزستان پورتالى اتالمىش ءتۋرنيردىڭ «داڭق ءساتى» («مينۋتا سلاۆى») اتتى ايگىلى تەلەجوبانىڭ شۆەيتساريالىق ۆەرسياسى ەكەنىن مالىمدەيدى.
الاتوو باۋرايىنان بارعان سيقىرشىلار ساحنادا «Silk road» («جىبەك جولى») دەپ اتالاتىن نومىرمەن ونەر كورسەتكەن. وندا ورتالىق ازيا حالىقتارىنىڭ جەيدەلەرى مەن قامزولدارى ۇسىنىلادى. سونىڭ ءبارىن ولگا ساناۋلى سەكۋندتاردىڭ ىشىندە اۋىستىرىپ ۇلگەرىپ, قاپ ىشىنەن كورەرمەن الدىنا شىعىپ تۇرعان. راديسلاۆتىڭ ايتۋىنشا, ولار پايدالانعان بارلىق كاستومدەر قولداپ تىگىلگەن جانە ايماقتاعى حالىقتاردىڭ مادەنيەتى مەن داستۇرىنەن سىر شەرتەدى.
قىرعىزستاندىق سيقىرشىلارعا قازىلار القاسىنىڭ مۇشەلەرى تۇگەلدەي ويلانباستان «ءيا» دەپ ءۇن قوستى. بۇل ەندى ولاردىڭ تەلەجوبانىڭ كەلەسى كەزەڭىنە قاتىسۋلارىنا قۇقىق بەرىپ وتىر.
مۇرات ايتقوجا.
مانبە: Knews.
فوتو: www.vb.kg.
https://youtu.be/jQjjsHlN26U