سوڭعى ءۇش اپتا ىشىندە اقتوبەدە ءبىر جىلعا جۋىق جاۋىن-شاشىن نورماسى ءتۇستى. سونىڭ سالدارىنان اۋلالار مەن جولداردى سۋ باسىپ, سۋ جۇيەلەرى نوسەردى وتكىزە الماي جاتىر, دەپ حابارلايدى Egemen.kz
اقتوبەدە كۇن سايىن دەرلىك جاڭبىر جاۋىپ تۇر. كەي كەزدەرى نوسەر جاڭبىر بۇرشاقپەن جانە نايزاعايمەن قاتار جۇرۋدە.
8 ماۋسىم كۇنى از ۋاقىت ىشىندە قالا كوشەلەرى وزەنگە اينالدى. تۇرعىندار سۋ كەشىپ جۇرۋگە ءماجبۇر بولسا, كولىكتەر ۇلكەن شالشىقتاردان ارەڭ وتۋدە.
تۇرعىنداردىڭ ايتۋىنشا, اسىرەسە قالا ورتالىعى سۋ استىندا قالىپ وتىر. جينالعان سۋ ۋاقىتىندا تارتىلمايدى, ال نوسەر سۋ جۇيەلەرى بار جەرلەردە دە ولاردىڭ مۇمكىندىگى جەتكىلىكسىز.
قالا اكىمدىگىنىڭ مالىمەتىنشە, سوڭعى كۇندەرى جاۋعان جاۋىن-شاشىن مولشەرى قالانىڭ نوسەر سۋ جۇيەسىنە ايتارلىقتاي سالماق تۇسىرگەن.
قازىرگى ۋاقىتتا قالا كوشەلەرىندە 110 اسسەنيزاتورلىق كولىك, بەس سورعى ستانساسى جانە موتوپومپالار جۇمىس ىستەپ جاتىر. ەڭ الدىمەن كوشەلەر مەن جولدارداعى سۋ سورىلىپ الىنۋدا.
«كوپقاباتتى تۇرعىن ۇيلەردىڭ اۋلالارىنان سۋدى شىعارۋ جۇمىستارىن پاتەر يەلەرى كووپەراتيۆى مەن م ۇلىك يەلەرى بىرلەستىگى توراعالارى تۇرعىندارمەن بىرلەسىپ ۇيىمداستىرۋى ءتيىس. جاۋىن سۋىن اعىزۋ ءۇشىن ارنايى 30 ورىن بەلگىلەندى», دەپ حابارلادى قالا اكىمدىگىنىڭ ءباسپاسوز قىزمەتى.
«قازگيدرومەت» بولجامىنا سايكەس, وڭىردە نوسەر جاڭبىر اپتانىڭ سوڭىنا دەيىن جالعاسادى.