قازاقستان عىلىم مەن يننوۆاتسيا سالاسىنداعى ەۋروپالىق وداقتىڭ ەڭ ءىرى باعدارلامالارىنىڭ ءبىرى Horizon Europe باعدارلاماسىنا قاۋىمداستىرىلعان ەل مارتەبەسىمەن قوسىلۋدى جوسپارلاپ وتىر, دەپ حابارلايدى Egemen.kz
باعدارلامانىڭ جالپى بيۋدجەتى 175 ميلليارد ەۋرونى قۇرايدى. وعان قاتىسۋ قازاقستاننىڭ جوعارى وقۋ ورىندارى مەن عىلىمي-زەرتتەۋ ينستيتۋتتارىنا حالىقارالىق گرانتتارعا قول جەتكىزۋگە مۇمكىندىك اشىپ, عىلىم مەن ءبىلىم بەرۋ سالاسىنىڭ دامۋىنا تىڭ سەرپىن بەرۋى مۇمكىن.
بۇل ماسەلە قازاقستاننىڭ عىلىم جانە جوعارى ءبىلىم ءمينيسترى ساياسات نۇربەكتىڭ ەۋروپالىق وداق وكىلدەرىمەن, بريۋسسەل ديپلوماتيالىق اكادەمياسىنىڭ باسشىلىعىمەن جانە بىرقاتار جەتەكشى ۋنيۆەرسيتەتتەردىڭ وكىلدەرىمەن كەزدەسۋى بارىسىندا تالقىلاندى.
ءمينيستردىڭ ايتۋىنشا, قازاقستاننىڭ ماقساتى Horizon Europe باعدارلاماسىنا تولىققاندى قاتىسۋشى رەتىندە قوسىلۋ.
«بۇل وڭاي پروتسەسس ەمەس. قازىرگى تاڭدا باعدارلاماعا ەۋرووداققا مۇشە ەمەس جاپونيا, وڭتۇستىك كورەيا جانە اۆستراليا سەكىلدى ءىرى مەملەكەتتەر قاتىسىپ وتىر. ءبىز دايىندىق جۇمىستارىن باستاپ كەتتىك. ەۋروپالىق كوميسسيانىڭ بىرنەشە قۇرىلىمى بۇل باستاماعا قولداۋ ءبىلدىردى», دەدى ساياسات نۇربەك.
كەزدەسۋ بارىسىندا ديپلوماتيالىق كادرلاردى دايارلاۋ جانە اكادەميالىق ىنتىماقتاستىق ماسەلەلەرى دە ءسوز بولدى.
بريۋسسەل ديپلوماتيالىق اكادەمياسىنىڭ ديرەكتورى گۋنتەر حاببلوم قازاقستانمەن ارىپتەستىكتى دامىتۋعا قىزىعۋشىلىق تانىتاتىنىن اتاپ ءوتتى.
ء«بىز قازاقستاننىڭ ديپلوماتيالىق كورپۋسىن كاسىبي دايارلاۋ ماسەلەسىن تالقىلادىق. بريۋسسەل ديپلوماتيالىق اكادەمياسى الەمدەگى ەڭ مىقتى باعدارلامالاردىڭ بىرىنە يە جانە تاجىريبەلىك دايىندىققا ەرەكشە كوڭىل بولەدى. سونىمەن قاتار ورتالىق ازيانى زەرتتەۋ باعىتىن دامىتىپ, وڭىردەگى ماڭىزدى مەملەكەتتەردىڭ ءبىرى رەتىندە قازاقستانعا ەرەكشە نازار اۋدارعىمىز كەلەدى», دەدى گۋنتەر حاببلوم.
تاراپتار الداعى ۋاقىتتا عىلىم, ءبىلىم جانە ديپلوماتيالىق كادرلاردى دايارلاۋ باعىتىنداعى ىنتىماقتاستىقتى ودان ءارى كەڭەيتۋگە نيەتتى ەكەنىن جەتكىزدى.