2026 جىلعى 10 مامىردا باستالعان نەگىزگى ۇبت جالعاسىپ جاتىر. قازىرگە دەيىن تەستىلەۋ 187 مىڭعا جۋىق رەت تاپسىرىلعان. قاتىسۋشىلاردىڭ 73%-ى – تەستىلەۋدى قازاق تىلىندە, 27%-ى – ورىس تىلىندە, 323 تالاپكەر اعىلشىن تىلىندە تاپسىردى, دەپ حابارلايدى Egemen.kz.
ءتورت اپتانىڭ قورىتىندىسى بويىنشا تالاپكەرلەردىڭ 67%-ى شەكتى بالل جينادى. بەس ءپان بويىنشا ورتاشا كورسەتكىش – 64 بالدى قۇرادى. ەڭ جوعارى ناتيجە – 140 بالل. بۇل كورسەتكىشكە پاۆلودار وبلىسىنىڭ تۇلەگى اسەت التاير يە بولدى.
ۇلتتىق تەستىلەۋ ورتالىعى ەرەكشە ءبىلىم بەرۋ قاجەتتىلىكتەرى بار تالاپكەرلەرگە قولايلى جاعداي جاساۋعا باسىمدىق بەرىپ كەلەدى. بيىلعى تەستىلەۋگە وسىنداي ساناتتاعى 556 تالاپكەر قاتىستى.
ۇبت-دا قۇقىقتارى بۇزىلعان تالاپكەرلەر قايدا جۇگىنە الادى؟
تەستىلەۋ اياقتالعاننان كەيىن تالاپكەرلەرگە تاپسىرمالاردىڭ مازمۇنىنا قاتىستى 30 مينۋت ىشىندە اپەللياتسيا بەرۋ مۇمكىندىگى قاراستىرىلعان. ال تەحنيكالىق اقاۋلارعا بايلانىستى شاعىمدار تەستىلەۋ بارىسىندا قابىلدانادى. سەرتيفيكاتتار اپەللياتسيالىق وتىنىشتەر تولىق قارالعان سوڭ تالاپكەرلەردىڭ جەكە كابينەتتەرىنە جىبەرىلەدى.
ءتورت اپتا ىشىندە ۇبت ەرەجەلەرىن بۇزۋدىڭ 391 دەرەگى تىركەلدى. ونىڭ ىشىندە 246 تالاپكەر سمارتفون, سمارت كوزىلدىرىك, ميكروقۇلاققاپ, شپارگالكا سەكىلدى تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلدى. تاعى 145 ادام تەستىلەۋ كەزىندە ءتارتىپ بۇزعانى ءۇشىن اۋديتوريادان شىعارىلىپ, ولاردىڭ ناتيجەلەرى جويىلدى. بيىل وزگە ادامنىڭ ورنىنا تەست تاپسىرۋ فاكتىلەرى انىقتالعان جوق.
ۇبت كەزىندە جارىق ءوشىپ قالسا, تۇلەكتەردىڭ ناتيجەسى قالاي باعالانادى؟ مينيستر جاۋاپ بەردى
ۇبت اياقتالعاننان كەيىن بيىلعى جىلدىڭ 31 قازانىنا دەيىن بەينەجازبالارعا قوسىمشا تالداۋ جۇرگىزىلەدى. ەگەر بەينەباقىلاۋ بارىسىندا تىيىم سالىنعان زاتتاردى پايدالانۋ نەمەسە باسقا دا ەرەجە بۇزۋشىلىقتار انىقتالسا, تالاپكەرلەردىڭ ناتيجەلەرى كۇشىن جويادى.
بيىل نەگىزگى ۇبت-عا قاتىسۋ ءۇشىن ەكى مۇمكىندىك ەسكەرىلىپ, شامامەن 240 مىڭ تالاپكەردەن 446 مىڭنان استام ءوتىنىش قابىلدانعان.
ەسكە سالا كەتەيىك, 10 مامىردا قازاقستاندا نەگىزگى ۇلتتىق بىرىڭعاي تەستىلەۋ (ۇبت) باستالدى. بيىلعى سىناق 10 شىلدەگە دەيىن جالعاسادى.
جانبوتا باحىتبەك,
ەۇۋ ستۋدەنتى