پاۆلودار وبلىسىندا اليمەنت تولەمەگەن ازاماتتارعا ارنايى ىزدەۋ جۇمىستارى جۇرگىزىلىپ جاتىر. بۇل تۋرالى باس پروكۋراتۋرا مالىمدەدى, دەپ حابارلايدى Egemen.kz.
ايماقتا «توپ-100 ىزدەستىرىلىپ جاتقان بورىشكەرلەر» رەسپۋبليكالىق تىزبەسىنە ەنگىزىلگەن ازاماتتاردى انىقتاۋ ماقساتىندا جۇمىس توپتارى قۇرىلعان. بۇگىندە تىزىمگە ەنگەن التى بورىشكەردىڭ بەسەۋىنىڭ ورنالاسقان جەرى انىقتالعان. ولاردىڭ تورتەۋى اكىمشىلىك جاۋاپكەرشىلىككە تارتىلسا, ءبىر ازامات اليمەنت بويىنشا بەرەشەگىن تولىق وتەگەن.
«ماسەلەن, 2023 جىلعى جەلتوقساندا بورىشكەرلەردىڭ بىرىنە قاتىستى 9 ملن تەڭگە سوماسىنا اليمەنت ءوندىرىپ الۋ تۋرالى اتقارۋشىلىق ءىس قوزعالدى. سوت ورىنداۋشىسى ماجبۇرلەپ ءوندىرىپ الۋ شارالارىن قابىلدادى. بىراق بورىشكەردىڭ ورنالاسقان جەرىن انىقتاۋ مۇمكىن بولمادى. وبلىس پروكۋراتۋراسى مەن سوت ورىنداۋشىلارى بىرقاتار ءىس-شارالاردى وتكىزگەننەن كەيىن عانا بورىشكەر انىقتالىپ, بەرەشەك تولىق كولەمدە وتەلدى», دەلىنگەن حابارلامادا.
سوت ورىنداۋشىلارى ەندى اليمەنت شوتتارىنان اقشا وندىرە المايدى
قاداعالاۋ ورگانىنىڭ مالىمەتىنشە, اتالعان شارالار اليمەنت بويىنشا بەرەشەكتى ءوندىرۋ ءىسىن جەڭىلدەتە تۇسپەك.
ەسكە سالا كەتەيىك, بۇعان دەيىن باتىس قازاقستان وبلىسىندا اليمەنت تولەمەگەن بورىشكەر 6 ايعا باس بوستاندىعىنان ايىرىلدى. ونىڭ اليمەنت بەرەشەگى 4 ملن تەڭگەگە جەتكەن.