الەۋمەتتىك جەلىلەردە ايەلدەرگە ارنالعان ماستەر-كلاسس كەزىندە تۇسىرىلگەن ۆيدەو تارادى. كادرلاردا قاتىسۋشىلار ەموتسياسىن بەيادەپ سوزدەر ايتقان ساتتەرى كورىنەدى. اتالعان جايتقا قاتىستى الماتى قالاسىنىڭ پوليتسيا دەپارتامەنتى پسيحولوگيالىق سەمينار بارىسىندا قوعامدىق ءتارتىپتى بۇزۋ فاكتىسىنە بايلانىستى پىكىر ءبىلدىردى, دەپ حابارلايدى Egemen.kz.
بەينەجازبادا كورسەتىلگەندەي, جۇرگىزۋشى قاتىسۋشىلارعا سۇراق قويىپ, ولاردان ورىنسىز ءسوزدى قايتالاۋدى سۇراعان. ءىس-شارا كەزىندە كەيبىر قاتىسۋشىلار بالاعات سوزدەر قولدانىپ, اينالاسىنداعىلارعا قۇرمەتسىزدىك تانىتقان.
وسى دەرەك بويىنشا مەدەۋ اۋدانى پوليتسيا باسقارماسى اكىمشىلىك ءىس قوزعاپ, ءىس ۇيىمداستىرۋشىعا قاتىستى «ۇساق بۇزاقىلىق» بابى بويىنشا جاۋاپكەرشىلىك قاراستىرعان
«الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ شەشىمىمەن قۇقىق بۇزۋشىعا 20 اەك مولشەرىندە اكىمشىلىك ايىپپۇل سالىندى», دەلىنگەن حابارلامادا.
پوليتسيا دەپارتامەنتى كەز كەلگەن بۇقارالىق ءىس-شارالار زاڭ تالاپتارى مەن قوعامدىق ءتارتىپ ەرەجەلەرىن ساقتاي وتىرىپ وتكىزىلۋى ءتيىس ەكەنىن ەسكەرتتى.
ەسكە سالا كەتەيىك, بۇعان دەيىن دومبىرانى «حارام» دەپ اتاعان اقتوبەلەلىك تۇرعىننىڭ قامالعانىن جازعان ەدىك.