كولىك ءمينيسترى نۇرلان ساۋرانباەۆ ۇكىمەتتە وتكەن بريفينگتە الماتى حالىقارالىق اۋەجايى عيماراتىنىڭ شاتىرى نوسەر جاۋىنعا تولىق ەسەپتەلمەگەنىن مالىمدەدى, دەپ حابارلايدى Egemen.kz.
ەسكە سالساق, 3 مامىر كۇنى الەۋمەتتىك جەلىلەردە اۋەجايدىڭ توبەسىنەن سورعالاپ سۋ اعىپ جاتقان ءساتتىڭ ۆيدەوسى تاراعان بولاتىن. نوسەر سالدارىنان تەكسەرۋ جانە پاسپورت باقىلاۋ ايماقتارىن سۋ باسىپ, تەرمينال ماڭىنداعى اۋماق تا زارداپ شەككەن ەدى.
ءمينيستردىڭ ايتۋىنشا, شاتىر جوبالانعان كەزدە سۋ جۇكتەمەسى 230 ليتر كولەمىندە ەسەپتەلگەن. الايدا جاۋىن-شاشىن مولشەرى كۇتكەننەن الدەقايدا كوپ بولعان.
«جوعارعى بولىكتە ۇلكەن سۋاعار بار, ول كادىمگى ۇلكەن ارىق سەكىلدى. ەگەر ول تولىپ كەتسە, جان-جاعىنداعى اشىق بولىكتەر ارقىلى سۋ سىرتقا اعۋى كەرەك. بىراق جاڭبىر وتە قاتتى بولعاندىقتان, سۋ ىشكە قاراي كەتكەن», دەدى ساۋرانباەۆ.
ونىڭ سوزىنشە, اۋەجاي نىسانى جەكە مەنشىككە تيەسىلى جانە بارلىق جوندەۋ جۇمىستارىن اۋەجاي باسشىلىعى ءوز موينىنا العان.
مينيستر سونداي-اق اۋەجاي يەسى Groupe ADP-نىڭ قۇرامىنا كىرەتىنىن اتاپ ءوتتى. بۇل كومپانيا پاريج اۋەجايى نىساندارىنا دا يەلىك ەتەدى. سوندىقتان الماتىداعى جاعداي كومپانيا بەدەلىنە دە اسەر ەتكەن.
«قازىر بۇل ماسەلە بويىنشا ۇلكەن تالقىلاۋلار ءجۇرىپ جاتىر. كومپانيا جىل سوڭىنا دەيىن جۇيەنى تولىق تۇزەتۋ مىندەتىن الدى. سۋاعارلارعا قوسىمشا سۋ بۇرۋ ارنالارى ورناتىلادى», دەدى مينيستر.
نۇرلان ساۋرانباەۆتىڭ ايتۋىنشا, جوندەۋ جۇمىستارى جاقىن ارادا اياقتالۋى ءتيىس. ول سول كۇنى قالاداعى وزگە عيماراتتار دا سۋ استىندا قالعانىن ايتتى.
ايتا كەتەيىك, الماتى اۋەجايىندا 11 كەلى ەسىرتكىمەن شەتەلدىك ۇستالعان بولاتىن.
جىلدىڭ باسىندا الماتى اۋەجايىندا 6,8 ملرد تەڭگە سوماسىندا زاڭبۇزۋشىلىقتار انىقتالدى.