پرەزيدەنت قاسىم-جومارت توقاەۆ ودرە ازۋلەنىڭ يۋنەسكو باس ديرەكتورى رەتىندە اتقارعان قىزمەتىنە جوعارى باعا بەردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ء«سىزدىڭ پاراساتتى ءارى مىقتى باسشىلىعىڭىزبەن يۋنەسكو ديالوگ پەن ىنتىماقتاستىق الاڭى رەتىندەگى ءرولىن ارتتىرا ءتۇستى. جاھاندا باعدارسىزدىق پەن قاقتىعىستار بەلەڭ العان كەزدە ءسىز ءبىلىم مەن مادەنيەت بەيبىتشىلىكتى نىعايتاتىن ماڭىزدى قۇرال ەكەنىن ۇدايى دالەلدەپ كەلەسىز. ەلىمىزدىڭ باي تاريحي جانە مادەني مۇرالارىنا نازار اۋدارۋ ارقىلى ءوزارا سەرىكتەستىكتى كەڭەيتىپ, جاڭا دەڭگەيگە كوتەرىلۋىنە ىقپال ەتتىڭىز», دەدى مەملەكەت باسشىسى.
قاسىم-جومارت توقاەۆ ودرە ازۋلە قازاقستاننىڭ بىرەگەي مادەني قۇندىلىقتارىن, تاريحي ەسكەرتكىشتەرىن, زياتكەرلىك مۇرالارىن ساقتاۋعا جانە ولاردىڭ حالىقارالىق دەڭگەيدە تانىلۋىنا ەرەكشە ۇلەس قوسقانىن اتاپ ءوتتى.
«يۋنەسكو-نىڭ باستامالارى مەن باعدارلامالارى ارقىلى الەمدىك قوعامداستىق قازاقستاننىڭ قوجا احمەت ياساۋي كەسەنەسىنەن باستاپ, ۇلى دالانىڭ مادەني كەڭىستىگىنە دەيىنگى قايتالانباس مۇرالارىمەن تانىس بولدى. سوندىقتان سىزگە Qoja Ahmet Yasaui وردەنىن تاپسىرۋ – مەن ءۇشىن زور مارتەبە. ءسىز قازاقستانعا, اسىرەسە, حالقىمىز ءۇشىن ورنى ايرىقشا ياساۋي كەسەنەسىنە قاتىستى ۇلكەن ءىس اتقاردىڭىز», دەدى قاسىم-جومارت توقاەۆ.
يۋنەسكو-نىڭ بۇرىنعى باس ديرەكتورى مەملەكەت باسشىسىنا جوعارى ماراپات تاپسىرعانى ءۇشىن العىس ايتتى.
«پرەزيدەنت مىرزا, ماعان كورسەتكەن ايرىقشا قۇرمەتىڭىز ءۇشىن ريزاشىلىعىمدى بىلدىرەمىن. مەنىڭ قازاقستانعا العاشقى ساپارىم قوجا احمەت ياساۋي كەسەنەسىمەن تىعىز بايلانىستى. بۇل ورىننىڭ تاريحي عانا ەمەس, رۋحاني قۇندىلىعىن تەرەڭ سەزىندىم. سول سەبەپتى ۇلى ويشىل اتىنداعى وردەنمەن ماراپاتتالعانىما قۋانىشتىمىن», دەدى ودرە ازۋلە.
ەسكە سالا كەتەيىك, بۇگىن مەملەكەت باسشىسى استانادا «التىن وردا – دالا وركەنيەتىنىڭ ۇلگىسى: تاريح, ارحەولوگيا, مادەنيەت, بىرەگەيلىك» اتتى حالىقارالىق سيمپوزيۋمنىڭ اشىلۋ سالتاناتىندا ءسوز سويلەپ, التىن وردا تاريحى كوپتەگەن ىرگەلى زەرتتەۋلەرگە ارقاۋ بولعانىن ايتتى.