التىن وردا ءداۋىرى وتاندىق تاريحىمىزدىڭ ماڭىزدى بولىگى, سونىمەن بىرگە ءبىز بۇل كەزەڭدى اۋقىمدى وركەنيەت پاراديگماسى تۇرعىسىنان قاراستىرامىز. بۇل تۋرالى مەملەكەت باسشىسى استانادا ءوتىپ جاتقان حالىقارالىق سيمپوزيۋمدا ايتتى, دەپ جازادى Egemen.kz.
«كوپتەگەن حالىقتىڭ تاريحي جادىندا رەفورماتورلار مەن كورنەكتى ويشىلداردىڭ قالىپتى تىرشىلىگىنە قاراعاندا, بيلەۋشىلەردىڭ جورىعى مەن دارىندى قولباسشىلاردىڭ ەرلىكتەرى ساقتالاتىنىن جوعارىدا ايتىپ ءوتتىم. راسىندا, سوعىستارداعى اڭىزعا اينالعان جەڭىستەر ادامداردىڭ رۋحىن وياتادى. ال تاعدىرشەشتى ءمانى ۋاقىت وتە كەلە بايقالاتىن ينستيتۋتسيونالدى جاڭاشىلدىقتار مەن وزىق يدەيالارعا كوپشىلىك سەلت ەتە قويمايدى. وعان ءالى كۇنگە دەيىن ۇلى دالا تاريحىنىڭ شەكسىز شايقاستار مەن ۇرىستار رەتىندە بۇرمالانىپ كورسەتىلۋى ناقتى مىسال بولا الادى. مۇنداي سىڭارجاق ۇستانىم ۇلى دالانىڭ, اسىرەسە, التىن وردانىڭ كۇردەلى, كوپ قاتپارلى ءومىر سالتىن اسكەري شەجىرەلەردىڭ ويدان شىعارىلعان ولشەمدەرىنە سالىپ, تاريحي شىندىقتان الىستاتادى, وقيعالاردى كومەسكىلەندىرە تۇسەدى», دەيدى مەملەكەت باسشىسى.
قاسىم-جومارت توقاەۆ قازىرگى عىلىمنىڭ جوعارى پانارالىق دامۋ دەڭگەيى التىن وردا تاريحىن وبەكتيۆتى زەرتتەۋ ۇدەرىستەرىن جەتىلدىرۋگە مۇمكىندىك بەرەدى دەپ سانايتىنىن ايتتى.
«بۇگىنگى جيىندا اتالعان كەزەڭدى زەرتتەپ جۇرگەن بەدەلدى عالىمدار باس قوسىپ وتىر. وسى ورايدا التىن وردا تاريحىن پايىمداۋ پەرسپەكتيۆاسىن كەڭەيتۋگە كومەكتەسەتىن بىرقاتار عىلىمي ىزدەنىسكە بايلانىستى ءوز ويىمدى قىسقاشا جەتكىزگىم كەلەدى», دەدى پرەزيدەنت.
ايتا كەتەيىك, قاسىم-جومارت توقاەۆ ەلىمىزدىڭ ماڭىزدى جوبالارىنا قولداۋ كورسەتكەنى ءۇشىن يۋنەسكو باسشىلىعىنا العىس ايتتى.