مەملەكەت باسشىسى استانادا ءوتىپ جاتقان «التىن وردا – دالا وركەنيەتىنىڭ ۇلگىسى: تاريح, ارحەولوگيا, مادەنيەت, بىرەگەيلىك» اتتى حالىقارالىق سيمپوزيۋمنىڭ اشىلۋ سالتاناتىندا ءسوز سويلەدى. قاسىم-جومارت توقاەۆ سيمپوزيۋم – التىن وردا مەن ۇلى دالا تاريحىن زەردەلەيتىن ءتۇرلى مەكتەپ وكىلدەرىنىڭ باسىن قوسىپ وتىرعانىن, بۇل – وتە ماڭىزدى ەكەنىن اتاپ ءوتتى, دەپ حابارلايدى Egemen.kz.
«ۇزاق جىلدار بويى وسى ىرگەلى تاقىرىپتى ىندەتە زەرتتەگەن رەسەيلىك عالىمداردىڭ ءرولىن اتاپ وتكەن ادىلەتتى بولار ەدى. ولار التىن وردانىڭ تىنىس-تىرشىلىگىن جان-جاقتى سيپاتتايتىن عىلىمنىڭ مول قورىن جينادى. سونىمەن قاتار التىن وردا تاقىرىبى ءبىر عانا مەملەكەتتىڭ شەڭبەرىندە شەكتەلىپ قالماي, قىتاي, موڭعوليا, اقش, ءۇندىستان, پاكىستان, جاپونيا, قىرعىزستان, وزبەكستان, مىسىر جانە بىرقاتار ەۋروپا ەلدەرى زەرتتەۋشىلەرىنىڭ نازارىن اۋدارىپ, بۇكىل الەمدى شارلاپ كەتتى دەسەك بولادى», دەدى پرەزيدەنت.
استانادا حالىقارالىق سيمپوزيۋم ءوتىپ جاتىر: 20-دان استام ەلدەن دەلەگاتسيا كەلدى
مەملەكەت باسشىسىنىڭ ايتۋىنشا, تۇپتەپ كەلگەندە, التىن وردا جىلناماسى – ادامزاتقا ورتاق تاريح. ال قازاقستان التىن وردا تاريحىن الەمدىك جىلنامانىڭ كۇردەلى, سان سالالى كەزەڭى رەتىندە قاراستىرادى.
«ويتكەنى بۇعان ءاتۇستى قاراۋعا بولمايدى. ولاي بولعان جاعدايدا الەمدىك تاريحتاعى وسىنداي بىرەگەي قۇبىلىسقا قاتىستى ۇستانىم وزگەرەدى. ال ول مەملەكەتتەر مەن حالىقتار اراسىنداعى قارىم-قاتىناسقا سىزات ءتۇسىرۋى مۇمكىن. وكىنىشكە قاراي, الەمدىك ماڭىزى بار ءىرى تاريحي وقيعالاردى بۇرمالاعان مىسالدار قازىر دە كەزدەسەدى.
گەوساياسي احۋال قۇبىلىپ تۇرعان بۇگىنگىدەي زاماندا سوعىستاردىڭ قاسىرەتتى حرونولوگياسىنا بايلانىپ قالماي, ادامزات تاريحىنداعى جاسامپاز كەزەڭدەر مەن ديالوگ الاڭدارىنىڭ ناتيجەلى ساتتەرىنە ءمان بەرگەن ءجون», دەدى قاسىم-جومارت توقاەۆ.
پرەزيدەنتتىڭ سوزىنشە, البەتتە, بۇل وڭاي مىندەت ەمەس. سەبەبى تارلان تاريحتىڭ باعزى داۋىرلەردەن باستاپ قازىرگى دەيىنگى شەجىرەسىندە سوعىستار مەن قارۋلى قاقتىعىستار وتە كوپ كەزدەسەدى.
«مۇنداي كورىنىستىڭ قالىپتاسۋى دا تۇسىنىكتى: بەيبىت كۇندەگى كۇيبەڭ تىرشىلىكتى سيپاتتاعاننان گورى قان مايدانداعى بىتىسپەس ۇرىستاردى جازعان الدەقايدا جەڭىل. ايتپاقشى, لەۆ تولستويدىڭ اتاقتى «سوعىس جانە بەيبىتشىلىك» رومانى – بەيبىتشىلىكتى ەمەس, سوعىستى ەگجەي-تەگجەيلى سۋرەتتەگەن شىعارما.
الەمدىك قوعامداستىق تاريحي جولايرىقتا تۇر. وركەنيەتتى تاڭداۋ الدىنداعى سىندارلى ساتتە ورتاق تاريحىمىزدى حالىقتاردى بىرىكتىرەتىن فاكتور رەتىندە ۇسىنۋ ءۇشىن بەدەلدى, كاسىبي عالىمداردىڭ كۇشىن ءبىر ارناعا توعىستىرعان دۇرىس», دەدى مەملەكەت باسشىسى.
پرەزيدەنت: ەلىمىز يۋنەسكو-نىڭ قولداۋىمەن كوپتەگەن ماڭىزدى جوبانى جۇزەگە اسىردى