قازاقستاننان توكيو مەن نيۋ-يورككە تىكەلەي اۋە رەيستەرىن اشۋ مەرزىمدەرى بەلگىلى بولدى. ۇكىمەت وتىرىسىندا بۇل ماسەلەنى ولجاس بەكتەنوۆ كوتەرىپ, حالىقارالىق باعىتتاردىڭ كەشىگۋ سەبەبىن سۇرادى, دەپ جازادى Egemen.kz.
كولىك ءمينيسترى نۇرلان ساۋرانباەۆ ءمالىم ەتكەندەي, توكيوعا تىكەلەي رەيستەر 2026 جىلدىڭ IV توقسانىندا, ال اقش-قا 2027 جىلدىڭ II توقسانىندا ىسكە قوسىلادى.
قازىرگى تاڭدا استانادان 34 حالىقارالىق باعىت بويىنشا رەيستەر ورىندالىپ جاتىر. جىل سوڭىنا دەيىن تاعى 5 جاڭا باعىت اشۋ جوسسپارلانعان.
ءمينيستردىڭ ايتۋىنشا, اۆياتسيا سالاسىندا جاڭا تەحنولوگيالار دا ەنگىزىلىپ جاتىر. اتاپ ايتقاندا, قالالىق اۋە تاكسيى (Urban Air Mobility) جوباسى ازىرلەنىپ جاتىر, سونداي-اق ينۆەستورلار تەستىلىك ۇشقىشسىز اپپاراتتاردى ساتىپ الۋعا كىرىسكەن.
سونىمەن قاتار ۇشۋ الاڭدارى مەن وپەراتسيالىق ورتالىقتىڭ قۇرىلىسى باستالعان.
اەروپورت ينفراقۇرىلىمىن جاڭعىرتۋ جۇمىستارى دا الداعى ءۇش جىلدا كەزەڭ-كەزەڭىمەن جۇرگىزىلەدى. ەرەكشە نازار ءىرى اۋەجايلارعا عانا ەمەس, وڭىرلىك شاعىن اۋەجايلارعا دا اۋدارىلماق.
پرەزيدەنت تاپسىرماسىنا سايكەس, تۋريستىك ايماقتاردا جاڭا اۋەجايلار سالۋ جوسپارلانعان. اتاپ ايتقاندا, قاتونقاراعاي, زايسان جانە كەندىرلى اۋماقتارىندا اۋەجاي قۇرىلىسى ءجۇرىپ جاتىر. سونداي-اق ارقالىق اۋەجايىن قايتا جاڭارتۋ قولعا الىنعان.
قازاقستان مەن ءۇندىستان اراسىنداعى اۋە رەيستەرى كوبەيەدى
ن. ساۋرانباەۆتىڭ ايتۋىنشا, اۆياتسيا سالاسىن دامىتۋ ءۇشىن كادر دايارلاۋ ماسەلەسى دە وزەكتى. قازىر سالادا 23 مىڭ مامان جۇمىس ىستەيدى, ال جىل سايىن كەمىندە 500 جاڭا مامان قاجەت.
وسى ماقساتتا شەتەلدىك سەرىكتەسپەن بىرلەسكەن سەرتيفيكاتتالعان وقۋ ورتالىعىن اشۋ جوسپارى قاراستىرىلىپ جاتىر.