قازاقستاندا 3,4 ميلليون ادام تەگىن ءدارى-دارمەك الادى. كەلەسى جىلدان باستاپ ەل ازاماتتارىن ءدارى-دارمەكپەن قامتاماسىز ەتۋدىڭ جاڭا ءتاسىلى ەنگىزىلمەك, دەپ حابارلايدى Egemen.kz.
دەنساۋلىق ساقتاۋ ۆيتسە-ءمينيسترى تيمۋر مۇراتوۆتىڭ ايتۋىنشا, قازىر ەلىمىزدە 3,4 ميلليون ادام تەگىن ءدارى-دارمەكپەن قامتىلعان. الايدا پاتسيەنتتەردىڭ وزدەرى ايتقانداي, بەرىلەتىن دارىلەردىڭ بارلىعى بىردەي قولدانىلمايدى.
ء«بىز دەربەستەندىرىلگەن وتىنىمدەر جۇيەسىنە كوشەمىز. دارىگەر ناۋقاسقا قانداي ءدارى تاعايىنداسا, ءبىز سونى ساتىپ الىپ بەرەمىز. بۇل – وتە اۋقىمدى جۇمىس. مۇندا تسيفرلىق پلاتفورما, تسيفرلىق مونيتورينگ قاراستىرىلعان. وسى باعىتتا «سك-فارماتسيا» جانە جەرگىلىكتى مەديتسينالىق ۇيىمدار مەن دارىگەرلەر ۇلكەن جۇمىس جۇرگىزىپ جاتىر. بيىل وسى جۇيەگە كوشەمىز, ال 2027 جىلدان باستاپ پاتسيەنتكە ناقتى قاجەت, دارىگەر جازىپ بەرگەن پرەپاراتتاردى بەرەمىز», دەدى تيمۋر مۇراتوۆ.
ول جۇيە سوزىلمالى اۋرۋى بار ناۋقاستارعا دارىگەر قانداي پرەپارات تاعايىندايتىنىن جيناقتاپ وتىراتىنىن ءتۇسىندىردى.
«ناۋقاسقا ونىڭ سالماعى, بويى جانە باسقا دا جەكە ەرەكشەلىكتەرىن ەسكەرە وتىرىپ, جەكە تەراپيا تاعايىنداۋعا بولادى. سودان كەيىن ءبىر جىل بويى سول دارىلەردى ساتىپ الىپ, قامتاماسىز ەتۋگە مۇمكىندىك تۋادى», دەپ اتاپ ءوتتى ۆيتسە-مينيستر.
ايتا كەتەيىك, ەلىمىزدە وندىرىلەتىن ءدارى-دارمەك كولەمى ارتىپ كەلەدى. قازىر وتاندىق ءدارى-دارمەك ۇلەسى شامامەن 40 پايىزعا جەتتى.