قازاقستان مۇسىلماندارى ءدىني باسقارماسى توراعاسى, باس ءمۇفتي ناۋرىزباي قاجى تاعان ۇلى ەلوردادا وتكەن ءباسپاسوز ءماسليحاتىندا ەل تۇرعىندارىن قۇربان ايت مەرەكەسىن ۇلتتىق داستۇرگە ساي اتاپ وتۋگە شاقىردى, دەپ حابارلايدى Egemen.kz.
باس ءمۇفتيدىڭ ايتۋىنشا, جىل باسىندا ءدىن قىزمەتكەرلەرىنە جولداعان باعدارلامالىق بايانداماسىندا قۇربان ايت پەن ورازا ايتتى قوعامدىق دەڭگەيدە, ۇلتتىق قۇندىلىقتاردى دارىپتەي وتىرىپ وتكىزۋ قاجەتتىگى ايتىلعان.
ونىڭ سوزىنشە, ايت كۇندەرى رەسپۋبليكا كولەمىندە «قۇربان ايت – ۇلىق مەرەكە» تاقىرىبىندا ءتۇرلى رۋحاني-مادەني ءىس-شارالار ۇيىمداستىرىلادى. وبلىستىق, قالالىق جانە اۋداندىق مەشىتتەردىڭ اۋلاسىندا كيىز ۇيلەر تىگىلىپ, ۇلتتىق سپورت تۇرلەرىنەن جارىستار وتەدى. سونىمەن قاتار ەلىمىزدىڭ ءار وڭىرىندە مادەني جانە رۋحاني كەشتەر ۇيىمداستىرىلماق.
ناۋرىزباي قاجى تاعان ۇلى بارشا جاماعاتتى ۇلتتىق كيىم كيىپ, ايت مەرەكەسىن قازاقى ءداستۇر مەن ۇلتتىق ناقىشتا وتكىزۋگە جانە ۇيىمداستىرىلاتىن يگى شارالارعا بەلسەندى قاتىسۋعا ۇندەدى.
ايتا كەتەيىك, ءماجىلىس دەپۋتاتى قازىبەك يسا تەرىس ءدىني اعىمدارعا زاڭمەن تىيىم سالۋدى تالاپ ەتتى.