الماتى وبلىسى اۋماعىندا ءوز ايەلىن كولىكپەن اياۋسىز قاعىپ ولتىرگەن ەر ادام قاماۋعا الىندى. قايعىلى وقيعا قوناەۆ – باقاناس تاسجولىندا بولعان, دەپ حابارلايدى Egemen.kz.
مارقۇم دارينا قابدۋلدانوۆانىڭ تۋىستارىنىڭ ايتۋىنشا, جولدا ەرلى-زايىپتىلار اراسىندا جانجال شىققان. وسىدان كەيىن كۇيەۋى ايەلىن جول جيەگىندە قالدىرىپ كەتىپ, كەيىن ارتىنان قايتادان بارىپ قاعىپ كەتكەن. ايەل العان جاراقاتتارىنان وقيعا ورنىندا كوز جۇمعان.
تۋىستارىنىڭ سوزىنشە, 37 جاستاعى كۇدىكتى اۋداندىق پوليتسيا بولىمدەرىنىڭ بىرىندە باسشىلىق قىزمەت اتقارادى جانە وقيعا كەزىندە قىزمەتتىك كولىك باسقارعان. ەرلى-زايىپتىلار بۇعان دەيىن پوليتسيا سالاسىندا بىرگە جۇمىس ىستەگەن.
ءوز ايەلىن قاعىپ ولتىرگەن: كۇدىكتى پوليتسيا قىزمەتكەرى بولۋى مۇمكىن
الماتى وبلىسى پوليتسيا دەپارتامەنتىنىڭ رەسمي وكىلى ەرنار سايديلدين كۇدىكتىنىڭ ۇستالىپ, ۋاقىتشا ۇستاۋ يزولياتورىنا قامالعانىن مالىمدەدى. ونىڭ ايتۋىنشا, اتالعان فاكتى بويىنشا قىلمىستىق ءىس قوزعالىپ, تەرگەۋ امالدارى جۇرگىزىلىپ جاتىر.
ىشكى ىستەر مينيسترلىگى بۇل اقپاراتقا قاتىستى ازىرگە تۇسىنىكتەمە بەرگەن جوق.
ايتا كەتەيىك, بۇعان دەيىن الماتى وبلىسىنداعى كولىك تىزگىندەگەن ءجاسوسپىرىم 12 جاستاعى بالانى قاعىپ كەتكەن ەدى.
اقتاۋداعى 27-شاعىناۋداندا پوليتسيا قىزمەتكەرى باسقارعان كولىك 1,5 جاستاعى بالانى قاعىپ كەتىپ, ءسابي وقيعا ورنىندا قايتىس بولدى.