قاراعاندى وبلىسىندا ءورت وشاقتارىن دەر كەزىندە انىقتاپ, جالىننىڭ تارالۋ باعىتىن بولجاۋ ءۇشىن دروندار قولدانىلىپ جاتىر. سونىمەن قاتار بيىل اۋىلدىق جەرلەردە جاڭا ءورت ءسوندىرۋ بەكەتتەرى اشىلادى, دەپ جازادى Egemen.kz.
ءورت قاۋپى جوعارى كەزەڭگە دايىندىق ماسەلەسى وبلىس اكىمدىگىندە وتكەن اپپاراتتىق كەڭەستە قارالدى.
وبلىستىق توتەنشە جاعدايلار دەپارتامەنتىنىڭ باستىعى مارعۇلان امانباەۆ وڭىردە تابيعي ورتتەرمەن كۇرەسكە 60 تەحنيكا, 571 مامان جانە ءبىر تىكۇشاق جۇمىلدىرىلعانىن ايتتى.
تاۋلىك بويى جەدەل شتاب جۇمىس ىستەيدى. ورمان القاپتارىنداعى احۋال عارىشتىق مونيتورينگ ارقىلى باقىلانىپ, بەينەباقىلاۋ جۇيەلەرىنىڭ دەرەكتەرى ساراپتالادى. ءورتتى بارلاۋ جانە ونىڭ تارالۋ قاۋپىن باعالاۋ ءۇشىن 10 درون پايدالانىلىپ جاتىر.
استانادا تازالىقتى باقىلاۋعا دروندار جۇمىلدىرىلادى
قازىرگى تاڭدا 148 ەلدى مەكەننىڭ قاۋىپسىزدىگىن قامتاماسىز ەتەتىن 66 ءورت ءسوندىرۋ بەكەتى تاۋلىك بويى كەزەكشىلىك اتقارادى. بيىل «اۋىل قۇتقارۋشىلارى» باعدارلاماسى اياسىندا اۋدانداردا تاعى 18 بەكەت اشىلىپ, قولدانىستاعى 14 نىسان جاڭعىرتىلادى.
28-29 مامىر كۇندەرى بۇيراتاۋ ۇلتتىق تابيعي پاركى اۋماعىندا ء«ورت-2026» رەسپۋبليكالىق وقۋ-جاتتىعۋى وتەدى. وقۋ-جاتتىعۋ بارىسىندا تابيعي ءورت كەزىندە بارلىق قىزمەتتىڭ ءوزارا ءىس-قيمىلى پىسىقتالادى.
وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى باقتيار سانباەۆ كۋۆ ورمان شارۋاشىلىعىن اۆياتسيالىق قورعاۋ ماسەلەسى شەشىلگەنىن مالىمدەدى. سونداي-اق وڭىردە ءورتتىڭ تارالۋىن شەكتەۋگە ارنالعان مينەرالدى جولاقتار جاسالىپ جاتىر.
ورماندى-دالالىق اۋماقتار مەن دەمالىس ورىندارىندا ءموبيلدى توپتار رەيد جۇرگىزىپ وتىر. قاۋىپسىزدىك تالاپتارىن بۇزعان 30 ادام اكىمشىلىك جاۋاپكەرشىلىككە تارتىلدى. ونىڭ ىشىندە وت جاققان, قۇرعاق ءشوپ ورتەگەن جانە ءورت قاۋىپسىزدىگى ەرەجەلەرىن ساقتاماعان ازاماتتار بار. ورمان ءورت قاۋىپسىزدىگىن بۇزۋ دەرەگى بويىنشا 7 حاتتاما تولتىرىلعان.
قازاقستاندا جول ساپاسىن دروندار باقىلايدى
وبلىس اكىمى ەرماعانبەت بولەكپاەۆ تابيعي ورتتەردىڭ الدىن الۋ شارالارىن كۇشەيتىپ, رەيدتىك جۇمىستاردى جانداندىرۋدى تاپسىردى.
«تابيعي ورتتەرگە جەدەل ارەكەت ەتۋ ءۇشىن بارلىق كۇش پەن تەحنيكانىڭ دايىندىعى قامتاماسىز ەتىلۋى قاجەت. ەڭ باستىسى – ءىرى توتەنشە جاعدايلارعا جول بەرمەۋ ءۇشىن الدىن الۋ شارالارىن ۋاقىتىلى قابىلداۋ», دەدى ءوڭىر باسشىسى.
ەسكە سالايىق, بۇعان دەيىن الاكول جاعالاۋىن دروندار باقىلايتىنى تۋرالى جازعانبىز.