الماتىداعى دەسانتتىق-شابۋىلداۋ اسكەرلەرىنىڭ 61993 اسكەري بولىمىندە «بىرىككەن ۇلتتار ۇيىمىنىڭ ءبولىنۋدى باقىلاۋ جونىندەگى كۇشتەرى» ميسسياسى قۇرامىندا قىزمەت ەتۋ ءۇشىن گولان جوتالارىنا اتتاناتىن ءۇشىنشى ۇلتتىق بىتىمگەرلىك كونتينگەنتتى سالتاناتتى تۇردە شىعارىپ سالۋ ءراسىمى ءوتتى, دەپ حابارلايدى Egemen.kz.
ءىس-شاراعا قورعانىس مينيسترلىگىنىڭ باسشىلىعى, بىتىمگەرلىك وپەراتسيالار ورتالىعىنىڭ قولباسشىلىعى, قىزمەتتەستەر, قارۋلى كۇشتەردىڭ ارداگەرلەرى, سونداي-اق اسكەري قىزمەتشىلەردىڭ تۋىستارى مەن جاقىندارى قاتىستى. ميتينگتە ءسوز العان قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى گەنەرال-مايور اسقار مۇستابەكوۆ قازاقستاننىڭ حالىقارالىق قاۋىپسىزدىكتى قولداۋ ىسىنە قاتىسۋىنىڭ ماڭىزدىلىعىنا توقتالدى.
«سىزدەر ەلىمىزدىڭ ابىرويىن اسقاقتاتىپ, بىرىككەن ۇلتتار ۇيىمىنىڭ بىتىمگەرلىك ميسسياسىنا قاتىسۋعا اتتانعالى تۇرسىزدار. بۇل – مەملەكەتتىڭ, حالىقارالىق قاۋىمداستىق پەن جاقىندارىڭىزدىڭ الدىنداعى ۇلكەن جاۋاپكەرشىلىك», دەدى گەنەرال-مايور اسقار مۇستابەكوۆ.
قازىرگى تاڭدا 150-دەن استام قازاقستاندىق بىتىمگەر بىرىككەن ۇلتتار ۇيىمىنىڭ تاياۋ شىعىستاعى جانە افريكا كونتينەنتىندەگى 7 ميسسياسىنا اسكەري باقىلاۋشى, شتابتىق وفيتسەر جانە جەكە دەربەس اسكەري كونتينگەنت رەتىندە قاتىسىپ جاتىر. اتاپ ايتساق, ليۆاندا, سيريادا, باتىس ساحارادا, وڭتۇستىك سۋداندا, كونگو دەموكراتيالىق رەسپۋبليكاسىندا, ورتالىق افريكا رەسپۋبليكاسىنداعى بۇۇ ميسسيالارىندا قازاقستاندىق بىتىمگەرلەر بار.
قازاق اسكەريلەرى گولان جوتالارىنا اتتانادى
قازاقستاندىق بىتىمگەرلەر اتىستى توقتاتۋ رەجيمىن قامتاماسىز ەتۋ, پاترۋلدەۋ, توسقاۋىل بەكەتتەرىن كۇزەتۋ, جارىلىس قاۋپى بار زاتتاردى جويۋ, سونداي-اق بۇۇ پەرسونالدارىن الىپ ءجۇرۋ مەن ەۆاكۋاتسيالاۋ جونىندەگى مىندەتتەردى ورىندايدى. ۇلتتىق كونتينگەنتتىڭ بۇعان دەيىنگى ەكى قۇرامى گولان جوتالارىندا قىزمەت ەتكەن كەزدە قويىلعان بارلىق مىندەتتەردى ويداعىداي ورىنداپ, بۇۇ ميسسياسى مەن حاتشىلىعىنىڭ باسشىلىعىنان جوعارى باعا العانىن ايتا كەتۋ كەرەك.
گولان جوتالارىندا مىڭنان اسا قاۋىپتى زات تابىلدى
ايتا كەتەيىك, بۇعان دەيىن قورعانىس ءمينيسترىنىڭ ورىنباسارى گەنەرال-مايور اسقار مۇستابەكوۆ الماتى گارنيزونىنا جۇمىس ساپارى بارىسىندا ءۇشىنشى ۇلتتىق بىتىمگەرلىك كونتينگەنتتىڭ دايىندىق بارىسىن پىسىقتادى.