ەلىمىزدە وندىرىلەتىن ءدارى-دارمەك كولەمى ارتىپ كەلەدى. دەنساۋلىق ساقتاۋ مينيسترلىگىنىڭ مالىمەتىنشە, 2025 جىلدىڭ قورىتىندىسى بويىنشا فارماتسەۆتيكالىق ءونىم ءوندىرىسىنىڭ كولەمى 191,1 ملرد تەڭگەگە جەتكەن. بۇل كورسەتكىش 2024 جىلمەن سالىستىرعاندا 8,7 پايىزعا جوعارى, دەپ حابارلايدى Egemen.kz.
دەنساۋلىق ساقتاۋ ۆيتسە-ءمينيسترى تيمۋر مۇراتوۆ فارماتسەۆتيكا سالاسىنا تارتىلعان ينۆەستيتسيا كولەمى 142,8 ملن دوللارعا جەتكەنىن ايتتى. سونداي-اق وتاندىق فارماتسەۆتيكالىق ءونىم ەكسپورتى 84 ملن دوللارعا دەيىن وسكەن.
قازىرگى تاڭدا قازاقستاندا 209 وتاندىق تاۋار ءوندىرۋشى تىركەلگەن. ونىڭ ىشىندە 43 كاسىپورىن ءدارى-دارمەك شىعارسا, 166 كومپانيا مەديتسينالىق بۇيىمدار وندىرەدى.
مينيسترلىكتىڭ دەرەگىنە سايكەس, وتاندىق وندىرۋشىلەردىڭ ۇلەسى تابيعي كولەمدە 39,8 پايىزعا جەتكەن. بۇل كورسەتكىش دارىلىك زاتتاردى تاڭبالاۋ جانە قاداعالاۋ جۇيەسىنىڭ مالىمەتتەرى ارقىلى راستالعان.
وتاندىق فارماتسەۆتيكا ءوندىرىسىنىڭ ءوسۋى ەلدىڭ ءدارى-دارمەك قاۋىپسىزدىگىن كۇشەيتىپ, يمپورتقا تاۋەلدىلىكتى ازايتۋعا مۇمكىندىك بەرەدى.
ەسكە سالايىق, ۇكىمەت قاراعاندى وبلىسىندا 74 ءتۇرلى دارىلىك زات شىعاراتىن فارماتسەۆتيكالىق زاۋىت سالۋ جوباسىن ماقۇلدادى.
دەنساۋلىق ساقتاۋ مينيسترلىگى مەن «حيمفارم» اق اراسىندا حالىقتى قولجەتىمدى ءدارى-دارمەكپەن قامتۋ جانە وتاندىق ءوندىرىستىڭ ۇلەسىن ارتتىرۋعا باعىتتالعان ينۆەستيتسيالىق كەلىسىم اياسىندا شىمكەنت فارماتسەۆتيكاسىنا 39,5 ملرد تەڭگە ينۆەستيتسيا قۇيىلادى.