قازاقستاندا «بولاشاق» باعدارلاماسى بويىنشا تولەنەتىن اي سايىنعى ستيپەنديا كولەمىن 10-15%-عا ارتتىرۋ ماسەلەسى تالقىلانىپ جاتىر. بۇل تۋرالى ۇكىمەتتەگى بريفينگتە حالىقارالىق باعدارلامالار ورتالىعى باسقارما توراعاسىنىڭ ورىنباسارى اباي راحمەت ايتتى, دەپ حابارلايدى Egemen.kz.
«ستيپەنديانى كوبەيتۋگە قاتىستى ماسەلە قازىر پىسىقتالىپ جاتىر. وزدەرىڭىز بىلەتىندەي, ستيپەنديا مولشەرى ۇزاق ۋاقىت بويى كوتەرىلگەن جوق, ال الەمدە قىمباتشىلىق بايقالۋدا», دەدى اباي راحمەت.
«بولاشاق» باعدارلاماسى: دەپۋتات بيۋدجەت قارجىسىن نەگىزسىز جۇمساعانداردىڭ ەسىمدەرىن جاريالاۋدى تالاپ ەتتى
سونىمەن قاتار ول «بولاشاق» ستيپەندياسى سوڭعى 15 جىلدان استام ۋاقىت بويى وزگەرمەگەنىن, ال وسى كەزەڭدە الەمدىك ينفلياتسيانىڭ وسكەنىن اتاپ ءوتتى. سونىڭ سالدارىنان كەيبىر ەلدەر مەن قالالاردا بولىنەتىن ستيپەنديا كۇندەلىكتى شىعىندارعا جەتكىلىكسىز بولىپ وتىرعانى ايتىلدى.
الدىن الا بولجام بويىنشا, ستيپەنديا كولەمى 10-15%-عا ءوسۋى مۇمكىن. الايدا ناقتى شەشىم مەن سوڭعى پارامەترلەر ماسەلە تولىق پىسىقتالعاننان كەيىن بەلگىلى بولادى. بۇل باعىتتاعى ناقتى جاڭالىقتار كەلەسى جىلى جاريالانباق.