جىل سايىن 28 ساۋىردە جەدەل مەديتسينالىق جاردەم قىزمەتى قىزمەتكەرلەرىنىڭ كۇنى اتالىپ وتەدى. بۇل كاسىبي مەرەكە – ادام ءومىرىن اراشالاۋ ءۇشىن تاۋلىك بويى تىنىمسىز ەڭبەك ەتەتىن مامانداردىڭ ەڭبەگىن ايشىقتايتىن كۇن, دەپ جازادى Egemen.kz.
دەنساۋلىق ساقتاۋ مينيسترلىگىنىڭ مالىمەتىنشە, 2025 جىلدىڭ وزىندە جەدەل مەديتسينالىق جاردەم قىزمەتى 8 ملن-نان استام شاقىرتۋعا قىزمەت كورسەتكەن. ال بيىلعى جىلدىڭ العاشقى ءۇش ايىندا بۇل كورسەتكىش شامامەن 1,8 ملن-عا جەتكەن.
جەدەل مەديتسينالىق جاردەم – دەنساۋلىق ساقتاۋ جۇيەسىنىڭ ەڭ ماڭىزدى ءارى جاۋاپتى بۋىندارىنىڭ ءبىرى. بريگادالار شاقىرتۋعا ءبىرىنشى بولىپ جەتىپ, ناۋقاستىڭ ومىرىنە قاۋىپ تونگەن مەزەتتە جەدەل ءارى بىلىكتى كومەك كورسەتەدى. مۇنداي جاعدايدا ءار مينۋتتىڭ باعاسى جوعارى.
قازىرگى تاڭدا قازاقستاندا جەدەل جاردەم قىزمەتى 20 دەربەس ستانتسيادان, 93 قالالىق كىشى ستانتسيادان جانە 189 اۋداندىق بولىمشەدەن تۇرادى. ولار حالىققا تاۋلىك بويى ۇزدىكسىز قىزمەت كورسەتەدى. ال جۇيەنىڭ جۇمىسىن ۇلتتىق شۇعىل مەديتسينانى ۇيلەستىرۋ ورتالىعى ۇيلەستىرەدى.
ىشىندە جۇكتى ايەل بولعان: اقتوبەدە جەدەل جاردەم كولىگى اۋدارىلدى
وبلىستىق جانە قالالىق دەڭگەيدە ءبىر اۋىسىمدا 1 652 كوشپەلى بريگادا جۇمىس ىستەيدى. ونىڭ ىشىندە 16% – دارىگەرلىك, 84% – فەلدشەرلىك بريگادالار.
2025 جىلدىڭ قورىتىندىسى بويىنشا جەدەل جاردەم بريگادالارىنىڭ قاتىسۋىمەن اۋرۋحاناعا دەيىنگى ءولىم كورسەتكىشى 0,2%-عا تومەندەگەن. سونىمەن قاتار ءساتتى رەانيماتسيا كورسەتكىشى 7,9%-عا ارتقان.
جالپى, جەدەل مەديتسينالىق جاردەم قىزمەتى ەل تۇرعىندارىنا شۇعىل كومەكتىڭ قولجەتىمدىلىگىن قامتاماسىز ەتەتىن جۇيەنىڭ نەگىزگى تىرەگى بولىپ قالا بەرەدى. سوڭعى جىلدارى بۇل سالانى دامىتۋعا ەرەكشە كوڭىل ءبولىنىپ, اۆتوپاركتار جاڭارتىلىپ, تسيفرلىق شەشىمدەر ەنگىزىلىپ, مامانداردىڭ بىلىكتىلىگى ارتتىرىلىپ كەلەدى.
الماتىدا جەدەل جاردەم قىزمەتكەرىنە شابۋىل جاساعان كۇدىكتى ۇستالدى