Reddit پلاتفورماسىندا ۇيىمداستىرىلعان «Flags of the World» (الەم تۋلارى) اتتى اۋقىمدى ونلاين-تۋرنيرىندە ەلىمىزدىڭ كوك بايراعى ءبىرىنشى ورىندى يەلەندى. بۇل جەڭىس – مەملەكەتتىك ءرامىزىمىزدىڭ ەستەتيكالىق تارتىمدىلىعى مەن مازمۇندىق تەرەڭدىگىنىڭ حالىقارالىق دەڭگەيدە مويىندالۋى.
ونلاين بايقاۋدا مەملەكەتتىك تۋلاردىڭ اسەمدىگىنە باسىمدىق بەرىلگەن. تۋرنيرگە 64 ەلدىڭ بايراعى قويىلعان. ءار راۋندتا تۋلار داۋىس بەرۋ ارقىلى جوعارى نەمەسە تومەن كوتەرىلىپ وتىرعان. التىنشى شەشۋشى راۋندتا قازاقستاننىڭ كوك بايراعى باسىم داۋىس جيناپ, ءبىرىنشى ورىندى يەلەندى. «قازاقستان – ءبىزدىڭ چەمپيون! بارشاڭىز داۋىس بەرىپ, بۇل الەمدەگى ەڭ ۇزدىك تۋ دەپ شەشتىڭىزدەر!» دەلىنگەن جاريالانىمدا.
ەكىنشى ورىنعا – كيريباتي, ءۇشىنشى – بۋتان, ال ءتورتىنشى ورىنعا سەيشەل ارالدارىنىڭ مەملەكەتتىك تۋلارى يە بولدى. سونداي-اق ۇلىبريتانيا, برازيليا, شري-لانكا, يامايكا مەن پاپۋا-جاڭا گۆينەيانىڭ تۋلارى دا قاتىسۋشىلاردىڭ قولداۋىنا يە بولىپ, كوپ داۋىس جينادى.
مەملەكەتتىك رامىزدەرىمىزگە دەگەن قۇرمەت پەن ونى ۇلىقتاۋ جولىنداعى جاۋاپكەرشىلىگىمىز الداعى ۋاقىتتا دا ارتا تۇسپەك. وسى ورايدا قىزىلوردا قالاسىنداعى قۇرىلتاي وتىرىسىندا پرەزيدەنت قاسىم-جومارت توقاەۆ مەملەكەتتىك رامىزدەرگە, ونىڭ ىشىندە كوك بايراعىمىزعا ەرەكشە توقتالعانىن اتاپ وتكەن ءجون. ۇلتتىق رامىزدەرگە قۇرمەتىمىزدى ارتتىرۋ ماقساتىندا ۇكىمەت 2020 جىلى تۋ, ەلتاڭبا بەينەلەرىن ورناتىپ, ورنالاستىرۋ, گيمننىڭ ءماتىنىن پايدالانۋ ەرەجەلەرىن بەكىتكەن ەدى. الايدا قوعامدا ءالى كۇنگە بايراعىمىزدىڭ قاشان, قاي جەردە جەلبىرەپ تۇراتىنىن بىلمەيتىندەر كوپ. وسىنى ەسكەرگەن مەملەكەت باسشىسى بۇل ماسەلەنى قايتا قوزعادى.
«قازىر قوعامدا «قازاقستاننىڭ مەملەكەتتىك تۋىن قايدا جانە قاشان قولدانعان ءجون؟» دەگەن ماڭىزدى ماسەلە تالقىلانىپ جاتىر. بۇل ماسەلە ارنايى نورمالارمەن جانە ەرەجەلەرمەن رەتتەلەدى. مەملەكەتتىك رامىزدەردى پايدالانۋعا جەڭىل-جەلپى, سالعىرت قاراۋعا بولمايدى. زاڭ تالابى ءاردايىم ورىندالۋعا ءتيىس. دەگەنمەن, ەڭ الدىمەن, زاڭنىڭ تۇپكى ءمانىن تەرەڭ ءتۇسىنۋ كەرەك. مەملەكەتتىك رامىزدەردى قادىرلەپ, ولاردى جونىمەن پايدالاناتىن وتانشىل ازاماتتاردى بارىنشا قولداۋ قاجەت. مەن ۇيلەردە, كولىكتەردە, كوشەلەردە, سونداي-اق ەلىمىزدەگى, اسىرەسە شەتەلدەگى سپورتتىق جانە مادەني ءىس-شارالاردا كوك تۋىمىز جەلبىرەپ تۇرعاندا قۋانىپ قالامىن. سول ارقىلى ەلىمىزدىڭ ازاماتتارى بىرلىگى بەكەم ۇلت ەكەنىمىزدى كورسەتەدى. ولاردىڭ ارەكەتتەرىنەن تۋعان ەلىن ماقتان تۇتاتىنى بايقالىپ تۇرادى», دەدى پرەزيدەنت V قۇرىلتاي وتىرىسىندا.
ەلىمىزدە مەملەكەتتىك رامىزدەردى قولدانۋعا قاتىستى ارنايى زاڭنامالىق ءتارتىپ بار. ءتىپتى تاۋەلسىزدىكتىڭ العاشقى جىلدارىندا ونى پايدالانۋدىڭ ءتارتىبى مەن شارتتارى بارىنشا قاتاڭداتىلعان. ول ۋاقىتتا كوك بايراعىمىزدى كەز كەلگەن جەردە جەلبىرەتۋگە تىيىم سالىندى. الايدا پرەزيدەنت مەملەكەتتىك رامىزدەردى حالىقتىڭ جاپپاي قولدانۋىنا قاتىستى بۇرىن قابىلدانعان شەكتەۋلەردى ازايتىپ, ەل ازاماتتارىنىڭ مەملەكەتتىك تۋدى ءوز تۇرعىن ۇيلەرىنىڭ بالكوندارىنا نەمەسە قابىرعاسىنا ىلۋىنە زاڭدى تۇرعىدان رۇقسات بەرۋ قاجەت دەدى.
نەگىزى مۇنداي تاجىريبە الەمنىڭ كوپتەگەن ەلىندە بار. ماسەلەن, تۇركيادا بارلىق ەلدى مەكەندە كوپقاباتتى ءۇي قابىرعالارى, بالكوندارى, جالپى ماڭىزدى نىسانداردىڭ سىرتقى قاسبەتتەرى قىزىل ءتۇستى ەل بايراعىمەن كومكەرىلىپ تۇرادى. بۇقارالىق ءىس-شارالاردا, سپورتتىق سايىستاردا, ءتىپتى جەكەمەنشىك ۇيلەردىڭ تورىندە مەملەكەتتىك تۋ ءىلىنىپ تۇرادى. ال ۇلىبريتانيادا ەرتەدە كينوتەاترلار مەن باسقا جەرلەردە فيلم كورسەتىلمەس بۇرىن مەملەكەتتىك ءانۇران وينالعان. بۇل ءۇردىس قازىر تولىقتاي ساقتالماعان, دەسە دە تاريحي قۇندىلىقتارىن قاستەرلەۋگە بەيىمدەلگەن ەلدىڭ كەيبىر قالالارىندا فيلم باستالار الدىندا ءالى دە ءانۇران شىرقالادى. وسى سەبەپتى ءار بريتاندىق ازاماتتىڭ Union Jack نەمەسە ۇلتتىق انۇرانعا قۇرمەتسىزدىك كورسەتۋى مۇمكىن ەمەس.
پرەزيدەنت تاپسىرماسىنا سايكەس, 2020 جىلى مەملەكەتتىك رامىزدەردى پايالانۋعا قاتىستى زاڭناماعا وزگەرىستەر مەن تولىقتىرۋلار ەنگىزىلىپ, ازاماتتاردىڭ مەملەكەتتىك تۋدى پاتريوتتىق ماقساتتا پايدالانۋىنا مۇمكىندىك جاسالدى. قازىر ازاماتتار ءوزى تۇراتىن ءۇيدىڭ بالكونىنا, تەرەزەسىنە نەمەسە كولىگىنە كوك تۋىمىزدى جەلبىرەتىپ ىلە الادى. تەك مەملەكەتتىك ءرامىزدىڭ تازا بولۋىنا, ونىڭ دۇرىس ىلىنۋىنە, زاڭنامادا بەلگىلەنگەن ستاندارتتارعا سايكەس بولۋىنا نازار اۋدارۋ قاجەت.