قازىر وڭىرلەردە ينكليۋزيۆتى سپورت ينفراقۇرىلىمدارى جەتكىلىكسىز. بۇعان قوسا بەيىمدى سپورت سالاسىندا بىلىكتى كادرلار تاپشى, قاجەتتى بىرىڭعاي تاسىلدەر مەن جۇمىس ادىستەمەلەرى جوق. كەشە سەنات جانىنداعى ينكليۋزيا جونىندەگى كەڭەستىڭ كەزەكتى وتىرىسىندا دەپۋتاتتار وسى ماسەلەنى كوتەردى. ولار سالالىق ۇيىمداردىڭ ساراپشىلارىمەن بىرلەسىپ, مۇگەدەكتىگى بار بالالار مەن ەرەسەكتەردى وڭالتۋ جولىندا ينكليۋزيۆتى سپورتتى دامىتۋدىڭ ماڭىزىن تالقىلادى.
«دەنە شىنىقتىرۋ مەن سپورت – الەۋمەتتىك وڭالتۋ جانە ينكليۋزيا تەتىگى» تاقىرىبىنا ارنالعان جيىندى سەنات توراعاسى ماۋلەن اشىمباەۆ اشىپ, جاڭا كونستيتۋتسيادا ادام قۇقىقتارى مەن بوستاندىقتارى مەملەكەتتىڭ ەڭ جوعارى باسىمدىعى رەتىندە ايقىندالعانىن اتاپ ءوتتى. سونداي-اق ول پرەزيدەنت قاسىم-جومارت توقاەۆ ينكليۋزيۆتى قوعام قالىپتاستىرۋعا جانە ءاربىر ازاماتقا ءوز الەۋەتىن تولىق ىسكە اسىرۋىنا قاجەتتى جاعداي جاساۋعا ەرەكشە ءمان بەرىپ وتىرعانىن ايتتى.
سونىمەن قاتار پالاتا سپيكەرى مەملەكەت باسشىسىنىڭ تاپسىرماسىمەن سالىنعان ينكليۋزيۆتى سپورت ورتالىعىنىڭ بىرەگەي ماڭىزىنا توقتالىپ, اتالعان نىساندا ازاماتتارعا جان-جاقتى قولداۋ, جاتتىعۋ مەن وڭالتۋدان باستاپ, ەمدەۋ مەن وقىتۋعا دەيىنگى اۋقىمدى قىزمەت كورسەتىلەتىنىن ايتتى.
«ينكليۋزيۆتى قوعامدى دامىتۋ ماسەلەلەرى – پرەزيدەنت قاسىم-جومارت توقاەۆ جۇرگىزىپ وتىرعان ساياساتتىڭ باسىم باعىتتارىنىڭ ءبىرى. ءبىلىم بەرۋ, سپورت جانە الەۋمەتتىك سالادا ينكليۋزيانى قولداۋ قاعيداتى – ءاربىر ازاماتقا ءوز الەۋەتىن تولىق جۇزەگە اسىرۋعا مۇمكىندىك بەرەتىن ادىلەتتى قازاقستان قۇرۋ ستراتەگياسىنىڭ اجىراماس بولىگى. وسى ورايدا مۇمكىندىگى شەكتەۋلى جاندار اراسىندا ينكليۋزيۆتى سپورت پەن دەنە شىنىقتىرۋ يدەولوگياسىن بەلسەندى دارىپتەۋ – مەملەكەت باسشىسى جۇكتەگەن ماڭىزدى مىندەتتەردىڭ ءبىرى. سوندىقتان ءبارىمىز بىرلەسىپ, قولعا الىنعان جۇمىستى جۇيەلى تۇردە جالعاستىرىپ, ناقتى ناتيجەلەرگە قول جەتكىزۋىمىز قاجەت», دەپ م.اشىمباەۆ وتكەن پاراليمپيادا ويىندارىندا جەڭىسكە جەتكەن وتاندىق پارااتلەتتەردىڭ جەتىستىكتەرىنە جوعارى باعا بەردى.
وتىرىس بارىسىندا ەلىمىزدە ينكليۋزيۆتى سپورتتى دامىتۋ باعىتىندا وڭ ديناميكا قالىپتاسقانى دا ايتىلدى. ساراپشىلار كەلتىرگەن دەرەكتەرگە سايكەس, بۇگىندە ەلىمىزدە وسى سالاعا بەيىمدەلگەن 16 كلۋب پەن 2 مامانداندىرىلعان سپورت مەكتەبى جۇمىس ىستەيدى. وندا قازىر 8 مىڭعا جۋىق ەرەكشە قاجەتتىلىگى بار سپورتشى تۇراقتى تۇردە جاتتىعادى. سونىمەن قاتار سەنات توراعاسى كۇن تارتىبىندەگى ماسەلەلەردى تالقىلاۋ كەزىندە سالاداعى بىرقاتار جۇيەلى پروبلەماعا دا توقتالدى.
كەزدەسۋگە قاتىسۋشىلاردىڭ ايتۋىنشا, بۇل سالاداعى قوردالانعان ماسەلەلەردى شەشۋگە مەديتسينا, ءبىلىم بەرۋ مەن الەۋمەتتىك قورعاۋ سالالارىنىڭ وكىلدەرى بارلىق مۇددەلى تاراپتارمەن بىرلەسىپ ۇيلەسىمدى جۇمىس اتقارۋى قاجەت. وسى ورايدا سەنات سپيكەرى قازىر دەپۋتاتتار مۇمكىندىگى شەكتەۋلى بالالاردى قولداۋدى ارتتىرۋعا ارنالعان بىرقاتار زاڭنامالىق تۇزەتۋ ازىرلەپ جاتقانىن اتاپ ءوتتى.
سونداي-اق م.اشىمباەۆ ينكليۋزيا زاڭنامالىق تەتىكتەر ارقىلى عانا ەمەس, سونىمەن قاتار مادەنيەت, وتباسى مەن مەكتەپتەگى دارىپتەۋ جۇمىستارى ارقىلى دا قالىپتاساتىنىن ايتتى. بۇل باعىتتا ءالى دە اۋقىمدى جۇمىس اتقارىلۋعا ءتيىس ەكەنىن ايتقان سەنات توراعاسى وسى ىسكە قازاقستان بوچچا فەدەراتسياسى ۇيىتقى بولعان جانە Kinopark كومپانياسىمەن بىرلەسىپ تۇسىرىلگەن «ەرەكشە» ءفيلمى تىڭ سەرپىن بەرگەنىن جەتكىزدى. ايتا كەتسەك, اتالعان فيلم 19 ناۋرىزدان باستاپ پروكاتقا شىقتى.
وتىرىستا دەپۋتاتتارمەن قاتار سەنات جانىنداعى ينكليۋزيا جونىندەگى كەڭەستىڭ توراعاسى ءلاززات قالتاەۆا, وقۋ-اعارتۋ ءمينيسترىنىڭ ءبىرىنشى ورىنباسارى مايرا مەلدەبەكوۆا, تۋريزم جانە سپورت ۆيتسە-ءمينيسترى سەرىك جاراسباەۆ, «Ski Park Pioneer» جشس ديرەكتورى جانات قاراتاي, سونداي-اق دۇنيەجۇزىلىك دەنساۋلىق ساقتاۋ ۇيىمىنىڭ وكىلدەرى, سەنات جانىنداعى ساراپشىلار كلۋبىنىڭ مۇشەلەرى مەن باسقا دا قاتىسۋشىلار ءسوز سويلەدى. كەڭەستە ايتىلعان بارلىق ۇسىنىس پەن باستاما مۇقيات زەردەلەنىپ, جۇمىستا ەسكەرۋ ءۇشىن ءتيىستى مەملەكەتتىك ورگاندارعا جولدانادى.