فرانتسيانىڭ ستراسبۋرگ قالاسىندا ەۋروپا كەڭەسىنىڭ GRECO-نىڭ (سىبايلاس جەمقورلىققا قارسى كۇرەس جونىندەگى مەملەكەتتەر توبى) 102-پلەنارلىق وتىرىسى ءوتتى. جيىندا مەملەكەتتىك قىزمەت ىستەرى اگەنتتىگى ەلىمىزدەگى سىبايلاس جەمقورلىققا قارسى جۇمىس بارىسىن تانىستىردى.
ەۋروپا كەڭەسىمەن قۇرىلعان GRECO-عا 51 قاتىسۋشى مەملەكەت كىرەدى جانە قازاقستان – وسى ۇيىمنىڭ تولىققاندى مۇشەسى.
پلەنارلىق وتىرىستا اگەنتتىك توراعاسى دارحان جازىقباي قازاقستاندا GRECO ۇسىنىمدارىنىڭ ىسكە اسىرىلۋ بارىسى, سونداي-اق سىبايلاس جەمقورلىققا قارسى مادەنيەتتى قالىپتاستىرۋ, ەلدەگى جۇيەنى دامىتۋ باعىتىنداعى جۇرگىزىلىپ جاتقان كەشەندى جۇمىس جونىنەن بايانداما جاسادى.
اگەنتتىك باسشىسى پرەزيدەنت قاسىم-جومارت توقاەۆتىڭ سىبايلاس جەمقورلىققا قارسى كۇرەستى مەملەكەتتىك ساياساتتىڭ نەگىزگى باسىمدىقتارىنىڭ ءبىرى رەتىندە ايقىندايتىنىن اتاپ ءوتتى. سونداي-اق مەملەكەت باسشىسىنىڭ باستاماسىمەن جۇزەگە اسىرىلىپ جاتقان «حالىق ۇنىنە قۇلاق اساتىن مەملەكەت» تۇجىرىمداماسى اياسىنداعى اۋقىمدى ينستيتۋتسيونالدىق وزگەرىستەرگە توقتالدى. وعان قوسا ەلىمىزدە سىبايلاس جەمقورلىقتىڭ الدىن الۋعا, وعان مۇلدەم توزبەۋشىلىك پەن ادالدىق قاعيداتتارىن ورنىقتىرۋعا باعىتتالعان جاڭا مودەلدىڭ كەزەڭ-كەزەڭىمەن ەنگىزىلىپ جاتقانىن جەتكىزدى.
باياندامادا قارجىلىق تەرگەۋلەردى دامىتۋ, قۇقىق قورعاۋ ورگاندارى اراسىنداعى وكىلەتتىكتەردى ناقتى ءبولۋ, سونداي-اق سىبايلاس جەمقورلىق قۇقىق بۇزۋشىلىقتاردى تەرگەۋدە مامانداندىرىلعان قۇرىلىمداردىڭ ءرولىن كۇشەيتۋ ماسەلەلەرى دە كورىنىس تاپتى.
ازاماتتاردىڭ شەشىم قابىلداۋ ۇدەرىسىنە قاتىسۋ مۇمكىندىگىن كەڭەيتۋ, ۋاكىلدەر ينستيتۋتىن ەنگىزۋ, قوعامدىق كەڭەستەردىڭ الەۋەتىن ارتتىرۋ جانە قوعامدىق باقىلاۋ تەتىكتەرىن زاڭنامالىق تۇرعىدا بەكىتۋ باعىتىنداعى شارالار اتالىپ ءوتتى. پارلامەنت قاراۋىنداعى بىرقاتار زاڭ جوباسىنا دا ەرەكشە نازار اۋدارىلدى.
GRECO ءىس-شاراسى اياسىندا دارحان جازىقباي ەۋروپا كەڭەسىنىڭ ادام قۇقىقتارى جانە قۇقىق ۇستەمدىگى جونىندەگى باس ديرەكتورى دجانلۋكا ەسپوزيتو جانە GRECO بيۋروسى مۇشەسى, كيپر دەلەگاتسياسىنىڭ باسشىسى الەكسيا كاليسپەرامەن كەزدەستى. ءىس-شارا كەزىندە سىبايلاس جەمقورلىققا قارسى ساياساتتى دامىتۋ, GRECO ۇسىنىمدارىن ورىنداۋ بارىسىندا ءتيىمدى تاجىريبە الماسۋ جانە حالىقارالىق ىنتىماقتاستىقتى نىعايتۋ ماسەلەلەرى ءسوز بولدى.