الماتىدا وتكەن رەفەرەندۋم بارىسىندا ايتارلىقتاي زاڭبۇزۋشىلىقتار تىركەلمەگەن. داۋىس بەرۋ ۇدەرىسىنىڭ ۇيىمداستىرىلۋ دەڭگەيى بۇرىنعى ناۋقاندارمەن سالىستىرعاندا ەداۋىر جاقسارعان. بۇل تۋرالى جازۋشى, ەكونوميست جانە قوعام قايراتكەرى بەكنۇر قيسىقوۆ ايتتى. ول رەفەرەندۋم كەزىندە تاۋەلسىز باقىلاۋشىلاردى وقىتىپ, الماتىداعى بىرنەشە ۋچاسكەدە داۋىس بەرۋ بارىسىن ءوزى دە باقىلاعان, دەپ حابارلايدى Egemen.kz.
ونىڭ ايتۋىنشا, رەفەرەندۋمدى باقىلاۋ جۇمىستارىنا قازاقستان بويىنشا «حالىق ءۇنى» قوعامدىق بىرلەستىگى اياسىندا دايىندىقتان وتكەن ەرىكتىلەر تارتىلعان.
«بۇكىل قازاقستان بويىنشا ءبىزدىڭ كواليتسيا مەن باستامامىز شەڭبەرىندە شامامەن ەكى مىڭعا جۋىق ادام بايقاۋشى رەتىندە جۇمىس ىستەدى. بۇل ادامدار ماتەريالدىق سىياقى ءۇشىن ەمەس, ءوز ەركىمەن كەلگەن جاستار بولدى. ولار ەل ومىرىندەگى ماڭىزدى ساياسي وقيعاعا قاتىسىپ, ءوز ۇلەسىن قوسقىسى كەلدى. ءبىز ولار ءۇشىن ارنايى ترەنينگتەر ۇيىمداستىرىپ, بايقاۋشىلاردىڭ قۇقىقتارى مەن مىندەتتەرىن, باقىلاۋ ەرەجەلەرى مەن قۇقىقتىق نورمالاردى تۇسىندىردىك. سونىڭ ناتيجەسىندە ولار جوعارى دەڭگەيدەگى دايىندىق پەن كاسىبي جاۋاپكەرشىلىك كورسەتتى», دەدى بەكنۇر قيسىقوۆ.
رەفەرەندۋمدى باقىلاۋ: «ەل داۋىسى» قورى الدىن الا قورىتىندىلارىن جاريالادى
ول سونداي-اق رەفەرەندۋم كەزىندە وڭىرلەردەگى سايلاۋشىلاردىڭ بەلسەندىلىگى ءارتۇرلى بولعانىن اتاپ ءوتتى. كەيبىر وبلىستاردا داۋىس بەرۋگە قاتىسۋ دەڭگەيى 87-90 پايىزعا دەيىن جەتسە, الماتىدا بۇل كورسەتكىش شامامەن 33 پايىزدى قۇراعان.
«العاش قاراعاندا 33 پايىز از كورىنۋى مۇمكىن. الايدا الماتىنىڭ ۇلكەن مەگاپوليس ەكەنىن ەسكەرۋ كەرەك. مۇندا تۇرعىندار ءموبيلدى, جۇمىس كەستەسى تىعىز, سونداي-اق ساياسي پروتسەستەرگە دەگەن كوزقاراس تا وزگەشە بولۋى مۇمكىن. سوندىقتان قالا ءۇشىن بۇل كورسەتكىشتى دە بەلگىلى ءبىر دەڭگەيدە ماڭىزدى دەپ باعالاۋعا بولادى», دەپ ءتۇسىندىردى ول.
بەكنۇر قيسىقوۆتىڭ ايتۋىنشا, باقىلاۋشىلار كەيبىر داۋلى جاعدايلاردى دا تىركەگەن. نەگىزىنەن ولار ۋچاسكەلەردەگى ونلاين-ترانسلياتسيالار, بيۋللەتەندەردى سۋرەتكە ءتۇسىرۋ نەمەسە داۋىس بەرۋ كۇنى الەۋمەتتىك جەلىلەردە ۇگىت سيپاتىنداعى جازبالار جاريالاۋ سياقتى ماسەلەلەرگە قاتىستى بولعان.
«قازىرگى كەزدە بلوگەرلەر مەن الەۋمەتتىك جەلى بەلسەندىلەرى كەيدە تىكەلەي ۋچاسكەنىڭ وزىندە ءوز پوزيتسياسىن بىلدىرۋگە تىرىسادى. كەيبىر ازاماتتار داۋىس بەرگەن بيۋللەتەندى سۋرەتكە ءتۇسىرىپ, ونى ينتەرنەتتە جاريالاعان جاعدايلار بولدى. ال زاڭ بويىنشا مۇنداي ارەكەتكە تىيىم سالىنعان. سونىمەن قاتار ونلاين-ترانسلياتسيا ماسەلەسىنە قاتىستى دا پىكىرتالاستار بولدى. زاڭنامادا بۇل ناقتى كورسەتىلمەگەنىمەن, مۇنداي ارەكەتتەر داۋىس بەرۋ قۇپياسىنا نۇقسان كەلتىرۋى مۇمكىن دەگەن تۇسىنىك بار. سوندىقتان وسى ماسەلەلەر توڭىرەگىندە كەيبىر كەلىسپەۋشىلىكتەر تۋىندادى», دەدى ول.
تمد باقىلاۋشىلارى: رەفەرەندۋمدا داۋىس بەرۋ پروتسەسى اشىق ءارى ءادىل ءوتتى
سونىمەن قاتار بەكنۇر قيسىقوۆ الماتىدا باقىلاۋشىلار تاراپىنان ورەسكەل زاڭبۇزۋشىلىقتار انىقتالماعانىن ايتتى. ونىڭ پىكىرىنشە, سايلاۋ پروتسەسىن ۇيىمداستىرۋ جىلدان جىلعا جەتىلدىرىلىپ كەلەدى.
«الدىڭعى ناۋقاندارمەن سالىستىرعاندا ۇيىمداستىرۋ دەڭگەيى ايتارلىقتاي وسكەنىن بايقادىق. ۋچاسكەلەردە اقپاراتتىق ستەندتەر, قاجەتتى بايلانىس دەرەكتەرى, داۋىس بەرۋ سحەمالارى, جاشىكتەردىڭ ورنالاسۋى – بارلىعى ستاندارت تالاپتارىنا سايكەس ورنالاستىرىلعان. ءتىپتى ماتەريالداردىڭ گەومەتريالىق ورنالاسۋى مەن ۆيزۋالدى بەزەندىرىلۋىنە دەيىن كاسىبي دەڭگەيدە دايىندالعان. جالپى العاندا, داۋىس بەرۋ تىنىش ءارى قالىپتى جاعدايدا ءوتتى», دەپ تۇيىندەدى ول.