قازاقستاندا وتكەن رەسپۋبليكالىق رەفەرەندۋم كەزىندە حالىقارالىق باقىلاۋشىلار تاراپىنان ەشقانداي زاڭبۇزۋشىلىق تىركەلمەگەن. بۇل تۋرالى ءباسپاسوز كونفەرەنتسياسىندا رەسەي فەدەراتسياسى ورتالىق سايلاۋ كوميسسياسىنىڭ حاتشىسى ناتاليا بۋدارينا مالىمدەدى, دەپ حابارلايدى Egemen.kz.
ونىڭ ايتۋىنشا, داۋىس بەرۋ پروتسەسى مەن رەفەرەندۋمدى ۇيىمداستىرۋ قازاقستان رەسپۋبليكاسىنىڭ قولدانىستاعى زاڭناماسىنا تولىق سايكەس وتكەن.
«زاڭبۇزۋشىلىقتارعا قاتىستى قانداي دا ءبىر ەسكەرتۋ ايتۋعا نەگىز جوق. ويتكەنى بارلىق راسىمدەر زاڭعا سايكەس جۇرگىزىلدى. مۇنى ءوز كوزىڭمەن كورگەندە انىق بايقايسىڭ. شىن مانىندە, مۇنىڭ ارتىندا ورتالىق كوميسسيانىڭ باسشىلىعىمەن جۇمىس ىستەگەن رەفەرەندۋم كوميسسيالارىنىڭ, سونداي-اق بارلىق جاۋاپتى ورگانداردىڭ ۇلكەن ەڭبەگى جاتىر. ولار ازاماتتاردىڭ داۋىس بەرۋىنە بارلىق مۇمكىندىكتەردىڭ جوعارى دەڭگەيدە قامتاماسىز ەتىلۋىنە جاعداي جاسادى», دەدى ن.بۋدارينا.
«حالىق ءۇنى»: ۋچاسكەلەردەگى داۋىس بەرۋ بارىسى ورتالىق كوميسسيانىڭ دەرەكتەرىنە ساي كەلەدى
ول داۋىس بەرۋ ناتيجەلەرى قازاقستاندىقتاردىڭ ازاماتتىق جاۋاپكەرشىلىگىنىڭ جوعارى ەكەنىن كورسەتەتىنىن اتاپ ءوتتى.
«مۇنى ءبىز داۋىس بەرۋ ناتيجەلەرىنەن كورىپ وتىرمىز. بۇل ازاماتتاردىڭ قوعامدىق-ساياسي ۇدەرىستەرگە جاۋاپكەرشىلىكپەن قارايتىنىن كورسەتەدى. سونىمەن قاتار داۋىس بەرۋ ءۇشىن بارلىق مۇمكىندىكتەردىڭ تولىق قامتاماسىز ەتىلگەنىن اڭعارتادى. بۇعان كوميسسيالاردىڭ داۋىس بەرۋ ءتارتىبى مەن راسىمدەرى تۋرالى جۇرگىزگەن كەڭ اۋقىمدى اقپاراتتىق-ءتۇسىندىرۋ جۇمىستارى دا ىقپال ەتتى», دەدى رەسەي وسك وكىلى.
ناتاليا بۋدارينا سونداي-اق داۋىس بەرۋ ۋچاسكەلەرىندەگى اتموسفەراعا توقتالدى.
«ۋچاسكەلەردە وتە جىلى ءارى دوستىق اتموسفەرا قالىپتاستى. مۇنى رەفەرەندۋمعا قاتىسۋشىلار دا, باقىلاۋشىلار دا بايقادى. كەيبىر جەرلەردە كەزەك بولعانىنا قاراماستان, ءبارى وتە سىپايى ءارى ۇيىمشىل جاعدايدا ءوتتى», دەپ قوستى ول.
تمد باقىلاۋشىلارى: رەفەرەندۋمدا داۋىس بەرۋ پروتسەسى اشىق ءارى ءادىل ءوتتى
ونىڭ ايتۋىنشا, اتقارىلعان جۇمىستار رەفەرەندۋمنىڭ اشىق ءارى قولجەتىمدى وتۋىنە مۇمكىندىك بەرگەن.