قازىر رەسپۋبليكانىڭ ءار وڭىرىندە كونستيتۋتسيالىق رەفورمانىڭ ءمانىن ءتۇسىندىرۋ ماقساتىندا كەزدەسۋلەر ءوتىپ جاتىر. ويتكەنى رەفەرەندۋمدا سانالى تاڭداۋ جاساۋ ءۇشىن ەڭ الدىمەن حالىقتىڭ تولىق اقپارات الۋى ماڭىزدى.
وسىنداي ماقساتتا ەلوردادا مادەنيەت جانە اقپارات مينيسترلىگىنىڭ قولداۋىمەن «جاستار» عىلىمي-زەرتتەۋ ورتالىعى س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىمەن بىرلەسە «Jastar X» الاڭىندا ستۋدەنتتەرمەن ساراپتامالىق كەزدەسۋ ۇيىمداستىرىلدى.
جاستارمەن باسقوسۋدا «ادىلەتتى قوعامنىڭ نەگىزى» تاقىرىبىندا ءسوز سويلەگەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى كونستيتۋتسيالىق جانە ازاماتتىق قۇقىق كافەدراسىنىڭ پروفەسسورى جامالادەن يبراگيموۆ كونستيتۋتسيا جوباسىنىڭ باستى ەرەكشەلىگى – ادامعا باعىتتالۋى ەكەنىن اتاپ ءوتتى. ال عىلىم جانە جوعارى ءبىلىم مينيسترلىگىنە قاراستى «مەملەكەت تاريحى ينستيتۋتى» رمم ديرەكتورى نۇربەك پۇسىرمانوۆ كونستيتۋتسيانى قوعامدى بىرىكتىرەتىن ماڭىزدى قۇجات رەتىندە سيپاتتادى.
– كونستيتۋتسيا – ەلدىڭ بولاشاق دامۋ باعدارىنىڭ ستراتەگيالىق نەگىزى. قۇجات جاي نورمالار جيىنتىعى ەمەس, ۇلتتىڭ رۋحاني تىرەگى ءارى قوعام مەن بيلىك اراسىنداعى سەنىم كەپىلى. قازىرگى ۋاقىت تالابىندا ۇلتتىق قۇندىلىقتى نىعايتۋ, ازاماتتاردىڭ قۇقىعىن قورعاۋدى كۇشەيتۋ جانە زاڭ ۇستەمدىگىن ورنىقتىرۋ ماڭىزدى. بۇل – ادىلەتتى ءارى قاۋىپسىز مەملەكەت قۇرۋ جولىنداعى جۇيەلى قادام, – دەدى ن.پۇسىرمانوۆ.
رەسپۋبليكالىق مەدياتسيا كەڭەسىنىڭ توراعاسى شەرزود پۋلاتوۆ «حالىق بىرلىگى – رەفورمالاردىڭ ءساتتى جۇزەگە اسۋىنىڭ باستى كەپىلى» تاقىرىبىندا قوعامدىق كەلىسىم مەن بىرلىكتىڭ ماڭىزىنا توقتالدى. ءوز كەزەگىندە «جاستار» عىلىمي-زەرتتەۋ ورتالىعى تالداۋ جانە كوممۋنيكاتسيا باسقارماسىنىڭ باسشىسى اليونا دميتريەۆا قازىرگى تسيفرلىق كەڭىستىكتەگى جەكە دەرەكتەردى قورعاۋ, تسيفرلىق قاۋىپسىزدىك جانە ونلاين قۇقىق ماسەلەسىنە نازار اۋداردى.
– تسيفرلىق ءداۋىر جاعدايىندا ازاماتتاردىڭ قۇقىقتارىن قورعاۋ, اقپاراتتىق قاۋىپسىزدىك پەن دەربەس دەرەكتەردى ساقتاۋ – جاڭا رەفورمالاردىڭ ماڭىزدى باعىتى رەتىندە ايقىندالىپ وتىر. سوندىقتان جاڭا كونستيتۋتسيا ەل دامۋىنىڭ كەلەسى كەزەڭىنە جول اشادى, – دەدى ا.دميتريەۆا.
نەگىزى مۇنداي اشىق كەزدەسۋلەر جاستاردىڭ قۇقىقتىق ساۋاتىن ارتتىرۋعا, كونستيتۋتسيالىق رەفورمانى تۇسىندىرۋگە, ساراپشىلار مەن ستۋدەنتتەر اراسىنداعى سەنىمدى كوممۋنيكاتسيا ورناتۋعا ءارى ازاماتتىق جاۋاپكەرشىلىكتى نىعايتۋعا باعىتتالعان. كەزدەسۋ بارىسىندا ورتالىقتىڭ عىلىمي-زەرتتەۋ جوبالارى, تسيفرلىق رەسۋرستارى جانە «Jastar AI» ۆيرتۋالدى كەڭەسشىسى دە تانىستىرىلدى.
كەزدەسۋگە جاستاردان بولەك, پرەزيدەنت جانىنداعى ۇلتتىق قۇرىلتاي مۇشەلەرى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جانە س.سەيفۋللين اتىنداعى قازاق اگروتەحنيكالىق ۋنيۆەرسيتەتى پروفەسسور-وقىتۋشىلارى, ۆەدومستۆولىق كوميتەتتەر مەن عىلىمي ينستيتۋت وكىلدەرى, ساراپشىلار, قوعام بەلسەندىلەرى قاتىستى.