نادەجدا پارەتسكايا داۋى: ءبىزدىڭ تورەشى شايدوروۆ پەن سامودەلكينانىڭ ونەرىن ادەيى تومەن باعالادى ما؟

كەز كەلگەن سپورتتىڭ قاتارداعى كورەرمەن تۇسىنە بەرمەيتىن قىر-سىرى بولاتىنى انىق. سول سەكىلدى مۇز ۇستىندەگى «سۇلۋ ونەردىڭ» تەحنيكالىق ءارى شىعارماشىلىق قاتپارلارى قاراپايىم ازاماتتارعا قاراعاندا مايتالمان ماماندارعا, سالاعا سان جىلدارىن ارناعان كاسىپقويلارعا انىعىراق كورىنەدى. وسى ۇستانىم نەگىزىندە ۇزاق جىلدار بويى مانەرلەپ سىرعاناۋ سپورتىن زەردەلەپ, وسى تاقىرىپتا قالام تەربەپ جۇرگەن ليليانا ءالجانوۆادان جەلى قولدانۋشىلارىنىڭ نادەجدا پارەتسكاياعا ارتىپ وتىرعان كىناسى قانشالىقتى ورىندى ەكەنىنە قاتىستى پىكىرىن بىلدىك.

(ليليانا ءالجانوۆا – سپورت كوممەنتاتورى)

سپورت كوممەنتاتورى وتاندىق تورەشىگە قاتىستى ماسەلەدە بايىپپەن باعامدايتىن تۇستار بار ەكەنىنە نازار اۋداردى.

«كەيبىر كورەمەن-جانكۇيەرلەر ماسەلەنىڭ بايىبىنا بارماي جاتىپ, ارتىق جازىپ جاتقاندارىن وقىپ قالدىم. مانەرلەپ سىرعاناۋدا مۇز جانىندا وتىراتىن 9 تورەشىدەن باسقا دا ماماندار بار. ولار: رەفەري, تەحنيكالىق بريگادا, ۆيدەوپەراتور, مالىمەت ەنگىزۋشى وپەراتور. ەل اتىنان اتتانعان ن.پارەتسكايا – سول توعىز تورەشەنىڭ بىرەۋى. ولار سپورتشى مۇزعا شىعىپ جاتتىعۋىن ورىنداعان سوڭ, سونىڭ بارىسىندا ىستەلگەن ەلەمەنتتىڭ ساپاسى مەن ورىندالۋىنا عانا باعا بەرەدى», دەپ تۇسىندىرگەن ليليانا ءالجانوۆا بۇل رەتتە ءاۋ باستا بەلگىلەنگەن باعدارلاماسىن تولىق ورىنداماي, مۇزدا سۇرىنگەن سپورتشىنىڭ جوعارى ورىننان كورىنبەۋى قاجەت ەكەنىن ايتىپ, دابىل قاققان قوعام پىكىرى دە ورىنسىز ەمەس دەيدى.

«قوعامنىڭ سىن ساداعىنا ىلىنگەن – قۇلاعان سپورتشى 1-ورىن الماۋى كەرەك دەگەن كوزقاراس تا ورىندى. ال سول سپورتتىڭ مامانى رەتىندە دە ونىڭ ونەرىنىڭ سالىستىرمالى تۇردە جوعارىراق باعالانۋى دا ورىندى ەكەنىن ايتپاي كەتۋگە بولماس. سەبەبى ا.پەتروسيان وليمپياداعا قاتىسقان قىزداردىڭ اراسىندا جالعىز ءوزى عانا ءتورت اينالىمدى سەكىردى. ءيا, قاتەلەستى. ول – فاكت. ال بۇل سپورت تۇرىندە تورەشىلەردىڭ جارىس الدىنداعى رەسمي دايىندىقتارعا باراتىنى بەلگىلى. سول دايىندىقتاردا تورەشىلەر كىمنىڭ, قانداي قابىلەتى بار ەكەنىن بايقاپ, كورىپ سول سپورتشى تۋرالى وي قالىپتاستىرادى. ا.پەتروسيان سوڭعى توپتا ەكىنشى بوپ مۇزعا شىقتى. ال سوڭعى توپتا ونەر كورسەتكەن سپورتشىعا كوبىنە جوعارى ۇپاي قويىلادى. ال سول ەركىن جاتتىعۋداعى 12 ەلەمەنت بويىنشا باعالاردى ءبولىپ قاراساق, پارەتسكايانىڭ كوپشىلىكتەن اسىپ باعالاعان تۇسىن كورمەيسىز. سول تورتتىكتەن قۇلاعانىنا GOE – 5, ياعني بارلىق تورەشىلەردىكىندەي تەڭ ۇپاي ۇلەستىرگەن», دەدى ليليانا ءالجانوۆا.

(نادەجدا پارەتسكايا – مانەرلەپ سىرعاناۋ سپورتى بويىنشا تورەشى)

قازاقستان قۇراماسىنىڭ قىسقى وليمپياداداعى جولى: جىلدار مەن ناتيجەلەر

«پارەتسكايانىڭ پەتروسيانعا قويعان باعاسى ەسەپكە الىنعان جوق»...

پارەتسكايا داۋىنا ءدۇبىر قوسقان كەلەسى جانكۇيەرلەر سىنى قورىتىندى ەسەپتە ۇزدىك وندىقتان كورىنگەن وتانداسىمىز سوفيا سامودەلكينا باعاسىنىڭ سالىستىرمالى تۇردە تومەن بولۋى. حاتتاماعا كوز سالساق ن.پارەتسكايا ا. پەتروسيان ونەرىنە – 147,04 ۇپاي بەرسە, باعدارلاماسىن ءمىنسىز ورىنداعان س.سامودەلكينا شەبەرلىگىن – 138, 60 بالعا باعالاعان. ءوز كەزەگىندە سپورت كوممەنتاتورى ءبىزدىڭ تورەشىنىڭ تورەلىكتى اسىرا پايدالانباعانىن اتاپ ءوتتى. سپيكەردىڭ سوزىنشە, ماماننىڭ بۇلاي باعالاۋىنا بىرنەشە سەبەپ بار.

«مانەرلەپ سىرعاناۋ – سپورتتىڭ سۋبەكتيۆتى ءتۇرى. بۇل جەردە ەلەمەنتتەر مەتر, سەكۋندپەن ولشەنبەيدى. ءسىز بەن ءبىز سياقتى ادام باعا بەرەدى. سوندىقتان دا ءار ادامنىڭ سول ەلەمەنت ساپاسىنا دەگەن كوزقاراسى ءارتۇرلى بولادى. حالىقارالىق كونكيشىلەر وداعى سپورتشىلاردى باعالاۋ ءادىل ءوتۋى ءۇشىن ەڭ كوپ جانە ەڭ از باعانى الىپ تاستايدى, ياعني ول ەسەپكە الىنبايدى. سوندىقتان پارەتسكايانىڭ پەتروسيانعا قويعان باعاسى ەسەپكە الىنعان جوق», دەدى ليليانا ءالجانوۆا.

سپورت كوممەنتاتورى 19 جاستاعى جەرلەسىمىز س.سامودەلكيناعا قويىلعان باعانى دا باعامداپ كوردى.

(سوفيا سامودەلكينا – ميلان-كورتينا-2026 وليمپياداسىنىڭ قاتىسۋشىسى)

«س.سامودەلكينا ءۇشىنشى توپتا ونەر كورسەتتى. بۇل دەگەنىڭىز – الدا ءالى مىقتى ء(تورتىنشى, سوڭعى) توپ بار دەگەن ءسوز. سوندىقتان تورەشىلەر ءبارىبىر بۇدان دا مىقتى سپورتشىلار مۇزعا كەشىرەك شىعاتىنىن ەسكەرىپ وتىرادى. پارەتسكايانىڭ سامودەلكيناعا قويعان باعاسى كوپپەن بىردەي. جاقسى باعاسىن قويعان. حاتتامالاردى اشىپ قاراساق, ن.پارەتسكايا قالعان تورەشىلەر بەرگەن باعا اۋماعىندا. ول – بىرنەشە جىلدان بەرى گران-پري, الەم جانە ءتورت قۇرلىق چەمپيوناتتارى, ۋنيۆەرسيادا مەن ازيادالاردا تورەلىك ەتىپ جۇرگەن بىلىكتى مامان», دەپ اتاپ ءوتتى ول.

قازاقستاننىڭ تورەشىسى سامودەلكينا مەن شايدوروۆتىڭ بالىن قولدان تومەندەتتى مە؟

جەلىدەگى جازبالاردىڭ مازمۇنىنا ۇڭىلسەك, نادەجدا پارەتسكايانىڭ ميحايل شايدوروۆتىڭ قىسقا باعدارلاماداعى ونەرىن جەتكىلىكتى دەڭگەيدە باعالاماۋى, ونى مۇز ۇستىندە بەس رەت ءتورت اينالىم ەلەمەنتىن ورىنداۋ ءۇشىن تاۋەكەل ەتۋگە يتەرمەلەگەن. جانكۇيەرلەردىڭ بۇل سىنىنا دا ماماننىڭ ايتار ءۋاجى بار.

«مانەرلەپ سىرعاناۋ ەكى جارىستان تۇرادى. قىسقا جانە ەركىن باعدارلاما. قىسقا باعدارلامادا جاقسى ۇپاي جيناپ, ەركىن جاتتىعۋدا سوڭعى, ءتورتىنشى توپتا ونەر كورسەتۋ وتە ماڭىزدى. م.شايدوروۆتىڭ ءوزى دە قىسقا باعدارلاماداعى ماقساتىم سوڭعى توپقا ءتۇسۋ بولدى دەپ ايتتى. سوندىقتان 3-توپتا ونەر كورسەتكەن سوفياعا تورەشىلەر جاقسى باعا بەردى. وليمپيادا كەزىندە ۇزدىك وندىقتا بولۋ وڭاي ەمەس. ناۋرىزدىڭ سوڭىندا پراگادا وتەتىن الەم چەمپيوناتىن سامودەلكينا تاعى دا وندىقتان كورىنسە, كەلەسى جىلعى چەمپيوناتقا بىزدەن ەكى سپورتشى اپارۋعا مۇمكىندىك تۋادى. سوندىقتان دا سوفيا وتە جاقسى ورىن الدى دەپ ويلايمىن. سونداي-اق وليمپيادا كەزىندە ءبىزدىڭ تورەشىنىڭ ەرلەر مەن ايەلدەر جارىسىنىڭ ەكى جاتتىعۋىنا دا تۇسكەنى قايتا جاقسى بولدى. جەرەبە بىزگە سولاي ءساتتى ءتۇستى. مىسالى, قىزدار اراسىنداعى سىندا امەريكالىق تورەشى ەركىن باعدارلامادا تورەلىك ەتۋگە وتپەي قالدى. سوندىقتان دا پارەتسكايانىڭ جەرەبەدەن ءوتىپ ءتورت باعدارلامادا دا وتىرۋى ءبىز ءۇشىن ءتيىمدى بولدى. ول وتانداستارىمىزعا قاتتى كومەكتەسىپ, باعانى اسىرا سىلتەپ نەمەسە كەمىتكەن جوق. باعا كوريدورىنان شىقپاي, سپورتشىلارىمىزعا دەمەۋ بولدى دەپ ايتار ەدىم», دەدى ليليانا ءالجانوۆا.

(ميحايل شايدوروۆ – ميلان-كورتينا-2026 وليمپياداسىنىڭ چەمپيونى)

قاپ, اتتەگەن-اي... وليمپيادا ويىندارىندا ەليزابەت تۇرسىنباەۆا نەلىكتەن تورەلىك ەتپەدى؟

جەلى قولدانۋشىلارىنىڭ كەلەسى كۇيبەڭى ميلاندا تورەلىك ەتۋگە مانەرلەپ سىرعاناۋ بويىنشا ايەلدەر اراسىندا قازاقستاننان شىققان تۇڭعىش الەم چەمپيونى ەليزابەت تۇرسىنباەۆانى جىبەرۋ كەرەك ەدى دەگەن وكىنىشپەن ءورىلىپ وتىر. دەسە دە ليليانا ءالجانوۆا ءتورت جىلدا ءبىر ۇيىمداستىرىلاتىن جاھاندىق جارىسقا قازىلىق ەتۋ ءۇشىن ارنايى ليتسەنزيا يەلەنۋ كەرەك ەكەنىن جەتكىزدى.

«وليمپيادا تورەشىلەرىن ۇلتتىق وليمپيادا كوميتەتى نەمەسە سپورت مينيسترلىگى تاڭدامايدى. بۇل – جىلدار بويى جۇرەتىن پروتسەسس. ەرەجە مەن ەلەمەنتتەردى بىلەتىن كەز-كەلگەن ادام تورەشى بولا الادى. ول ءۇشىن سەمينارلارعا قاتىسىپ, سەرتيفيكات الۋ قاجەت. سودان كەيىن ءوز قالاڭىزداعى كىشىگىرىم جارىستارعا تورەلىك ەتە باستايسىز. بەلگىلى ءبىر مەجەگە جەتكەن سوڭ (مىسالى شامامەن 10 جارىس) قالا چەمپيوناتتارىندا تورەلىك ەتەسىز. تاعى دا ونى بەلگىلى ءبىر سانعا تولتىرىپ, رەسپۋبليكاعا شىعاسىز. جىل سايىن (بولجاممەن قاتارىنان ءۇش رەت) ەل چەمپيوناتىندا تورەلىك ەتكەن سوڭ, حالىقارالىق دەڭگەيگە شىعۋىڭىزعا بولادى», دەگەن سپورت كوممەنتاتورى حالىقارالىق ارەنادا الەم سپورتشىلارىنىڭ ونەرىن باعالاۋ ءۇشىن حالىقارالىق كونكيشىلەر وداعىنىڭ (ISU) تالاپتارىن دا ورىنداۋ كەرەك دەيدى.

«سونىمەن قاتار حالىقارالىق كونكيشىلەر وداعىنا (ISU) ءوتىنىش ءبىلدىرىپ, ەل چەمپيوناتتارىندا تورەلىك ەتكەنىڭىزدى دالەلدەيتىن قۇجاتتارىڭىزدى كورسەتىپ, اعىلشىن تىلىندە ەمتيحان تاپسىراسىز. سوسىن بىرتىندەپ كىشىگىرىم حالىقارالىق جارىستارعا تورەلىك ەتەسىز. ەشكىم ءسىزدى بىردەن وليمپياداعا تورەلىك ەتۋگە المايدى. گران-پري, ەۋروپا, ءتورت قۇرلىق چەمپيوناتتارىندا جۇرەسىز. سودان كەيىن عانا اق وليمپياداعا بارۋعا كونكۋرسقا قاتىسۋعا بولادى. جوعارىدا جازىلعان جولدى ءجۇرىپ وتكەن ماماندى ISU ءوزى تاڭدايدى. ولارعا ءتىپتى كەرەمەتتەي اقشا دا تولەنبەيدى. ولار – ءوز ەركىمەن تورەشى بولىپ جۇرگەن ماماندار. قازاقستاندا وسىنداي حالىقارالىق دەڭگەيدەگى تورەشى مەن بىلسەم, تەك ءتورت-بەسەۋ عانا. ال وليمپيادا ويىندارى دەڭگەيىنە جەتكەنى ن.پارەتسكايا عانا», دەپ اتاپ ءوتتى سپورت كوممەنتاتورى.

(ەليزابەت تۇرسىنباەۆا – پحەنچحان وليمپياداسىنىڭ قاتىسۋشىسى)

ليليانا ءالجانوۆا مانەرلەپ سىرعاناۋدان تورەشى بولۋ ءۇشىن مانەرلەپ سىرعاناۋشى بولۋ شارت ەمەس ەكەنىن العا تارتىپ, بۇل تۇرعىدا الدىمەن, ەليزابەت تۇرسىنباەۆانىڭ تورەشىلىك ليتسەنزياسى بار-جوعىن انىقتاۋ قاجەت ەكەنىن دە تىلگە تيەك ەتتى.

ەسكە سالا كەتەيىك, 21 جاستاعى ميحايل شايدوروۆ مانەرلەپ سىرعاناۋدان وليمپيادا چەمپيونى اتاندى. مەملەكەت باسشىسىنىڭ شەشىمىمەن ميحايل شايدوروۆ II دارەجەلى «بارىس» وردەنىمەن ناگرادتالدى. ال تورتجىلدىقتىڭ باستى دوداسىندا ايەلدەر اراسىنداعى مانەرلەپ سىرعاناۋدان ەل نامىسىن سوفيا سامودەلكينا قورعادى. جالپى ەسەپتە 207,46 ۇپاي جيناعان سامودەلكينا جەكە رەكوردىن جاڭارتىپ, جارىستى 10-ورىنمەن اياقتادى.