بەلگىلى كاسىپكەر ارسەن تومسكي مانەرلەپ سىرعاناۋدان ميلان-كورتينا-2026 وليمپياداسىنىڭ التىن مەدال يەگەرى ميحايل شايدوروۆتىڭ اكەسى ستانيسلاۆ شايدوروۆقا Audi Q8 كولىگىن تارتۋ ەتتى, دەپ جازادى Egemen.kz.
بۇل تۋرالى كاسىپكەردىڭ ءوزى «تاريحي جەڭىستىڭ باستاۋىندا تۇرعان ادامعا كولىك سىيلادىم» دەپ جازبا جاريالادى.
«ميحايل شايدوروۆتىڭ جەتىستىگى قازاقستان مەن شەتەلدەگى ميلليونداعان ادامعا شابىت بەردى. الايدا بۇل سالتاناتتىڭ ارتىندا جىلدار بويعى كۇندەلىكتى ەڭبەك, ءتارتىپ پەن جانقيارلىق جاتىر.
ءبىر كەزدە ستانيسلاۆ الەكساندروۆيچ ۇلىنىڭ بيىك شىڭعا جەتۋ جولىن قولداۋ ءۇشىن ءوز كولىگىن ساتقان ەدى. بۇل وقيعا ماعان ەرەكشە جاقىن. مەن دە سەنگەن ءىسىم ءۇشىن ەكى رەت كولىگىمدى ساتتىم», دەدى ارسەن تومسكي.
ديماش قۇدايبەرگەن ميحايل شايدوروۆقا كولىك سىيلايتىن بولدى
سونداي-اق كاسىپكەر سىيدى تابىستاۋ ساتىندەگى ستانيسلاۆ شايدوروۆتىڭ تولقىعانىن جەتكىزدى.
«كولىكتى تابىستاۋ راسىمىندە ستانيسلاۆ الەكساندروۆيچ كوز جاسىن تىيا المادى. بۇل – ۇلىمەن بىرگە ۇزاق جولدى ءجۇرىپ وتكەن جانە ءوزىنىڭ سەنىمى وليمپيادالىق التىنعا اينالعانىن كورگەن ادامنىڭ كوز جاسى. ءار چەمپيوننىڭ ارتىندا ءبىر كەزدە «مەن ساعان سەنەمىن» دەگەن جان تۇرادى. ۇلى جەڭىستەر ءاردايىم سەنىمنەن باستالادى», دەپ جازدى ول.
ميحايل شايدوروۆ جالاقىسى تۋرالى مالىمدەگەن سپورت مينيسترلىگىنە رەنىشىن ءبىلدىردى