قازاقستان قۇراماسىنىڭ قىسقى وليمپياداداعى جولى: جىلدار مەن ناتيجەلەر

بيىل وتانداستارىمىز ەل تاريحىنداعى توعىزىنشى قىسقى وليمپيادادا ونەر كورسەتتى. بۇعان دەيىنگى قىسقى وليمپيادا ويىندارىندا التىن جۇلدە تەك نورۆەگيانىڭ ليللەحامەر قالاسىندا وتكەن دودادا قورجىنعا تۇسكەن ەدى. ەلىمىز ءۇشىن ەرەكشە جۇلدەنى شاڭعىشى ۆلاديمير سميرنوۆ ەنشىلەگەن. ال يتاليا تورىندەگى مانەرلەپ سىرعاناۋشى ميحايل شايدوروۆتىڭ التىنى قازاقستان ەنشىسىنە 32 جىلدان كەيىن بۇيىردى.

قىسقى وليمپيادا: قازاقستان قۇراماسىنىڭ ناتيجەلەرى

جەرلەستەرىمىز 1994 جىلى نورۆەگيانىڭ ليللەحامەر قالاسىندا وتكەن قىسقى وليمپياداعا تۇڭعىش رەت قاتىسىپ,ء بىر التىن جانە ەكى كۇمىس مەدالدى قانجىعالادى. وسىلايشا, ەلىمىز جالپى كوماندالىق ەسەپتە 12-ورىنعا تابان تىرەدى. ءۇش جۇلدەنى دە ەل قورجىنىنا شاڭعىشى ۆلاديمير سميرنوۆ سالدى. اتالعان وليمپيادادا ەل اتىنان 29 سپورتشى سپورتتىڭ سەگىز تۇرىنەن باق سىناعان ەدى.

اراعا ءتورت جىل سالىپ سپورتشىلارىمىز جاپونيانىڭ ناگانو قالاسىندا وتكەن اق وليمپياداعا اتتاندى. بايراقتى باسەكەدە 60 سپورتشىنىڭ ىشىندە تاعى دا شاڭعىشى ۆلاديمير سميرنوۆ دارالانىپ, ەل قورجىنىنا قولا جۇلدە سالدى. سول سايىستا بۇيىرعان ەكىنشى قولانى كونكيمەن جۇگىرۋ سپورتىنىڭ وكىلى ليۋدميلا پروكاشەۆا يەلەندى. قولانى قاناعات تۇتقان قۇراما بۇل جولى تۋرنيرلىك كەستەنىڭ 20-شى ساتىسىنا جايعاستى.

2002 جانە 2006 جىلعى قىسقى وليمپيادا اقش-تىڭ سولت-لەيك-سيتي جانە يتاليانىڭ تۋرين قالاسىندا ءوتتى. مۇحيتتىڭ ارعى بەتىندەگى ويىندارعا قازاقستان قۇراماسىنان 52 سپورتشى, تۋريندەگى باسەكەگە 43 سپورتشى قاتىستى. وكىنىشكە قاراي, ەكى وليمپيادادا دا ەل سپورشىلارى جەڭىس تۇعىرىنان كورىنە المادى.

2010 جىلى كانادانىڭ ۆانكۋۆەر قالاسىندا جالاۋى جەلبىرەگەن اق وليمپيادادا 37 سپورتشىمىز باق سىناپ,ء بىر كۇمىس جۇلدە عانا بۇيىردى. جالعىز جۇلدەنى بياتلون باسەكەسىندە ونەر كورسەتكەن ەلەنا حرۋستالەۆا جەكەلەي سايىستا ەنشىلەدى.

2014 جىلى رەسەيدىڭ سوچي قالاسىندا وتكەن جاھاندىق جارىستا دا جالعىز مەدال قولعا ءتۇستى. وليمپيادانىڭ سوڭعى كۇندەرىندە مۇز ايدىنعا شىققان مانەرلەپ سىرعاناۋشى دەنيس تەن ۇشىنشى تۇعىردان كورىنىپ, ەلىمىزگە قولا مەدال سىيلاپ قۋانتتى. بۇل وليمپياداعا جالپى سانى 51 سپورتشى اتتانعان ەدى.

2018 جىلعى وليمپيادا كورەيا رەسپۋبليكاسىنىڭ پحيونچحان قالاسىندا ۇيىمداستىرىلىپ, جارىسقا قازاقستان قۇراماسى ساپىنان 44 سپورتشى قاتىستى. بۇل وليمپيادادا قازاقستان قۇراماسىنىڭ قورجىنى بوس قايتقان جوق. فريستايل-موگۋل وكىلى يۋليا گالىشەۆا 77,40 ۇپاي جيناپ, پحيونچحان وليمپياداسىنىڭ قولا جۇلدەگەرى اتاندى.

ال 2022 جىلى اق وليمپيادا الاۋى قىتايدىڭ بەيجىڭ قالاسىندا تۇتاندى. بۇل دوداعا قازاقستان قۇراماسىنان 34 سپورتشى (17 ەر, 17 ايەل) قاتىستى. بۇعان دەيىنگى سولت-لەيك-سيتي (اقش) جانە تۋرين (يتاليا) وليمپيادالارى سەكىلدى بۇل باسەكەدە دە وتانداستارىمىز جۇلدەسىز قالدى. دەگەنمەن, شورت-ترەكشى ابزال اجىعاليەۆ ءتورتىنشى ساتىعا تابان تىرەپ, جۇلدەگە ءبىر قادام جەتپەي توقتادى. سونداي-اق ارالاس ەستافەتاداعى وتاندىق شورت-ترەك كومانداسى ابزال اجىعاليەۆ, دەنيس نيكيشا, ولگا تيحونوۆا, يانا حان بەسىنشى ورىننان كورىندى.

ميلان جانە كورتينا-2026: شايدوروۆ شىڭى. ۇزدىك وندىق

يتاليانىڭ قوس قالاسىندا وتكەن XXV قىسقى وليمپيادادا ۇلتتىق قۇراما ساپىندا 10 ديستسيپلينا بويىنشا 18 ەر, 18 ايەل, جالپى جيىنى – 36 سپورتشى جارىس جولىنا شىقتى. تورتجىلدىقتىڭ باستى باسەكەسىنە ەلىمىزدىڭ 11 ءوڭىرى, الماتى, استانا جانە شىمكەنت قالالارى, سونداي-اق اقمولا, شىعىس قازاقستان, الماتى, پاۆلودار, قوستاناي, سولتۇستىك قازاقستان, قاراعاندى جانە اباي وبلىستارى ۇكىلەپ ءۇمىت قوستى. بۇل كورسەتكىش ەلىمىزدە قىسقى سپورت گەوگرافياسىنىڭ كەڭەيىپ كەلە جاتقانىن ايقىن اڭعارتتى. تۋريزم جانە سپورت مينيسترلىگىنىڭ مالىمەتىنشە, 2022 جىلعى قىسقى ويىندارعا – 10 ءوڭىردىڭ, 2018 جىلى – 9 ءوڭىردىڭ, ال 2014 جىلى – 10 ءوڭىردىڭ وكىلدەرى قاتىسقان.

وتاندىق سپورت ءۇشىن بيىلعى وليمپيادانىڭ ەڭ ءىرى جەتىستىگى 13 اقپان كۇنى تىركەلدى. سول كۇنى وتانداسىمىز ميحايل شايدوروۆ مانەرلەپ سىرعاناۋدان وليمپيادا چەمپيونى اتاندى. بۇل – قازاقستاننىڭ قىسقى وليمپيادادا كەيىنگى 32 جىلدا جەڭىپ العان التىن مەدالى ءارى مانەرلەپ سىرعاناۋدان ەل تاريحىنداعى العاشقى وليمپيادا چەمپيونى. بۇعان دەيىن مانەرلەپ سىرعاناۋدان قازاقستان قورجىنىندا تەك قولا جۇلدە بولعان. ءجونى بولەك ول جۇلدەنى ەلىمىزگە 2014 جىلعى قىسقى وليمپيادادا دەنيس تەن تارتۋ ەتكەن.

ەركىن باعدارلامادا جەرلەسىمىز ەركىن كوسىلدى. ميحايل ءاۋ باستا ءتورت اينالىم ەلەمەنتىن ءتورت مارتە جاسايمىن دەگەنمەن, مۇز ۇستىندە بەس رەت ءتورت اينالىم ەلەمەنتىن, ودان كەيىن ءۇش اينالىم اكسەلگە ءتورت اينالىم سالحوۆ ەلەمەنتىن قوسا ءساتتى ورىندادى. جۇلدە جولىندا مانەرلەپ سىرعاناۋشىلاردىڭ ەشبىرى بۇل ەلەمەنتتى قايتالاي العان جوق. وتانداسىمىز ەركىن باعدارلامادا قازاقستاننىڭ حالىق ءارتىسى ديماش قۇدايبەرگەننىڭ ورىن­داۋىنداعى تۋىندىنىڭ اۋەنىمەن ونەر كورسەتىپ, قوس سايىس قورىتىندىسى بويىنشا 291,58 ۇپايمەن كوش باستادى.

بۇدان بولەك وتانداستارىمىز قىسقى سپورت تۇرلەرىنە ماشىقتانعان الەم ەلدەرىنىڭ وكىلدەرىنە لايىقتى قارسىلىق تانىتتى. بىرنەشە وتانداسىمىز ۇزدىك وندىقتان ويىپ ورىن الدى. ماسەلەن, 19 جاستاعى مانەرلەپ سىرعاناۋشى سوفيا سامودەلكينا وليمپياداداعى دەبيۋتىندە 207,46 ۇپاي جيناپ, جەكە رەكوردىن جاڭارتىپ, 10-ورىن يەلەندى. بۇل – قازاقستان تاريحىنداعى ايەلدەر اراسىنداعى مانەرلەپ سىرعاناۋدان وليمپياداداعى ەڭ جوعارى ناتيجە. كونكيمەن جۇگىرۋدەن نادەجدا موروزوۆا 3000 مەتر قاشىقتىقتا 6-ورىن, 5000 مەتردە 10-ورىن الىپ, 1998 جىلدان بەرگى وتاندىق كونكيشىلەردىڭ ەڭ ۇزدىك كورسەتكىشىن تىركەدى. ەليزاۆەتا گولۋبەۆا 1500 مەتردە 7-ناتيجە كورسەتىپ, 3000 مەتردە ۇزدىك وندىققا ەندى. سونىمەن قاتار ايەلدەر قۇراماسى كوماندالىق جارىستا وليمپيادانىڭ ەڭ ۇزدىك سەگىز كومانداسىنىڭ قاتارىنا قوسىلدى.

وزگە سپورت تۇرلەرىندە دە ايتارلىقتاي ىلگەرىلەۋ بايقالىپ وتىر. شاڭعىمەن تۇعىردان سەكىرۋدەن 19 جاستاعى يليا ميزەرنىح ۇلكەن ترامپليندە 8-ورىن الىپ, وسى سپورت ءتۇرى بويىنشا قازاقستاننىڭ وليمپيادا تاريحىنداعى ەڭ ۇزدىك ناتيجەسىن كورسەتتى. شورت-ترەكتە دەنيس نيكيشا 500 مەتر قاشىقتىقتا 7-ورىنعا يە بولىپ, الدىڭعى وليمپياداداعى ناتيجەسىن جاقسارتتى.

فريستايل-موگۋلدا بىردەن ەكى سپورتشىمىز ۇزدىك وندىققا ەندى: اناستاسيا گورودكو 8-ورىن, پاۆەل كولماكوۆ 9-ورىن الىپ, 2022 جىلعى ويىندارداعى كورسەتكىشتەرىن وڭ تاراپقا جاقسارتتى. سونداي-اق كونكيمەن جۇگىرۋ سايىسىندا ەۆگەني كوشكين 500 مەتر قاشىقتىقتا 9-ورىن, فريستايل-اكروباتيكادان (ميكست) كوماندالىق باسەكەدە جەرلەستەرىمىز 7-ورىنعا تابان تىرەدى.

وسىلايشا, قازاقستان قۇراماسى قىسقى سپورت تۇرلەرىندە ءداستۇرلى تۇردە جۇلدە الىپ, ۇزدىكتەر قاتارىندا جۇرەتىن فينليانديا مەن بەلگيا قۇرامالارىن ارتتا قالدىردى.