جەڭىس جالاۋىن جەلبىرەتكەن جاساق

ەلىمىزدىڭ ايبىنىن اسقاق­تاتقان بەس ارنايى جاساق كومانداسى – مەملەكەتتىك كۇزەت قىزمەتى, ۇلتتىق قاۋىپسىزدىك كوميتەتى جانە ىشكى ىستەر مينيسترلىگىنە قاراستى تاڭداۋلى بولىمشەلەر حالىقارالىق تۋرنيردە, ايگىلى «ارنايى جاساق وليم­پيا­داسىندا» ەل نامىسىن قورعادى.

بۇل جارىس جەتىنشى رەت بىرىككەن اراب امىرلىكتەرىندە 7-11 اقپان ارالىعىندا ۇيىمداستىرىلدى. قازاقستان كوماندالارى جارىستىڭ ءار كەزەڭىندە جوعارى ناتيجە كورسە­تىپ, 48 ەلدىڭ 109 كومانداسىن شاڭ قاپتىردى. جالپى كوماندالىق ەسەپتە Kaz SWAT Team C ءبىرىنشى ورىندى قانجىعالاسا, ال Kaz SWAT Team A ەكىنشى ورىندى يەلەندى. وسىلايشا, بايراقتى باسەكەدە ەل تاريحىنداعى ۇزدىك ناتيجە كورسەتتى.

سونىمەن قاتار Kaz SWAT Team B سەگىزىنشى ورىنعا, ال Kaz SWAT Team D جيىرماسىنشى ورىنعا تۇراقتادى.

– بۇعان العاش رەت قاتىسىپ وتىرمىن. ەڭ ەستە قالعانى – جىلدامدىق پەن تەمىردەي تارتىپكە قۇرىلعان ۇيلەسىمدى ارەكەت. ناتيجەنىڭ كىلتى ستارت الدىنداعى سالقىن­قاندىلىقتا جاتىر. جاتتىعۋ بارىسىندا ءبارى جەڭىل كورىنگەنىمەن, جارىس الاڭىندا جاۋاپكەرشىلىك جۇگى ەكى ەسە ارتادى. اينالا تولى كورەرمەن مەن كامەرا – ءار قيمىلىڭ نازاردا. مۇنداي ساتتە ءوز-ءوزىڭدى مەڭگەرۋ, ىشكى تولقىنىستى تىزگىندەۋ اسا ماڭىزدى. پسيحولوگيالىق دايىندىق پەن كوماندانىڭ بىرلىگى دە شەشۋشى ءرول اتقاردى. ءبىز التى اي بويى تىنىمسىز جاتتىعىپ, جىلدامدىقتى شىڭداۋعا, ارنايى تاكتيكالىق تاسىلدەردى جەتىلدىرۋگە, جۇگىرۋ مەن توزىمدىلىكتى ارتتىرۋعا ايرىقشا ءمان بەردىك, – دەدى Kaz SWAT Team C قۇرامىنىڭ مۇشەسى ءمۇسلىم.

ايتا كەتۋ كەرەك, Tomiris ايەل­دەر كومانداسى ءتۋرنيردىڭ ۇزدىگى اتانىپ, كەيبىر ەرلەر كوماندالارىن ارتقا قالدىردى. بۇعان دەيىن دە قازاقستاننىڭ ارنايى بولىمشەلەرى تۋرنيرلەردە جۇلدەلى ورىن العان ەدى.

ەسكە سالساق, ەل پرەزيدەنتى قاسىم-جومارت توقاەۆ دۋباي­دا وتكەن تەرروريزمگە قارسى بولىمشە­لەر اراسىنداعى UAE SWAT Challenge – 2026 حالىقارالىق جارىسىندا ۇزدىك ناتيجەگە قول جەتكىزگەن وتاندىق كوماندالاردى ارنايى قۇتتىقتادى.