ءار اتا-انا اسكەرگە اتتانعان ۇلىن مەملەكەتكە اماناتتاپ تاپسىرادى. وسى سەنىمگە سەلكەۋ تۇسىرمەس ءۇشىن قورعانىس مينيسترلىگى تۇراقتى نەگىزدە اشىق ەسىك كۇنىن ۇيىمداستىرىپ كەلەدى. ءىس-شارا بارىسىندا اتا-انالار بالاسى بورىشىن وتەپ جاتقان ءبولىمنىڭ تىنىس-تىرشىلىگىمەن تانىسىپ, باسشىلىقپەن ەركىن پىكىر الماسادى.
جاقىندا قورعانىس ءمينيسترى اۆياتسيا گەنەرال-لەيتەنانتى داۋرەن قوسانوۆتىڭ بۇيرىعىمەن وسىنداي ءىس-شارا ءوتىپ, ساربازداردىڭ 4 مىڭنان اسا تۋعان-تۋىسى اسكەري بولىمدەردى ارالادى. كەلۋشىلەرگە قارۋ-جاراق پەن اسكەري تەحنيكا كورمەلەرى ۇيىمداستىرىلدى. وقۋ-جاتتىعۋ الاڭدارىندا ساربازدار قارۋمەن ساپتىق تاسىلدەردى, قويان-قولتىق ۇرىس ەلەمەنتتەرىن جانە وقۋ-جاۋىنگەرلىك تاپسىرمالاردى ورىنداۋ شەبەرلىگىن كورسەتتى.
تاربيە جۇمىسىن ۇيىمداستىرۋ, اسكەري ءتارتىپتى ساقتاۋ جونىنەن قورعانىس ۆەدومستۆوسى تاراپىنان قابىلدانىپ جاتقان شارالار تۋرالى جان-جاقتى اقپارات بەرىلدى. سونىمەن قاتار قارۋدى قولدانۋ, ءارتۇرلى ساباقتار مەن جاتتىعۋلار وتكىزۋ كەزىندەگى قاۋىپسىزدىك قالاي قامتاماسىز ەتىلەتىنى ەگجەي-تەگجەي ءتۇسىندىرىلدى. اتا-انالار اسحانالاردا تاماقتاندىرۋ قالاي ۇيىمداستىرىلعانىن كورىپ, تاعام راتسيونىنىڭ ءتارتىبى مەن الۋان تۇرلىلىگىن باعالادى.
وسىلايشا, قورعانىس مينيسترلىگىنىڭ بۇل باستاماسى مەرزىمدى اسكەري قىزمەتشىلەردىڭ تۋعان-تۋىستارىنا جاۋىنگەرلىك دايىندىقتىڭ ۇيىمداستىرىلۋىمەن, قىزمەت جانە تۇرمىس جاعدايلارىمەن تانىسۋعا مۇمكىندىك بەردى. قوناقتار كازارمالاردى ارالاپ, تۇرمىستىق ايماقتاردى دا كورىپ شىقتى.
اسكەري بولىمدەردەگى الىستان ات تەرلەتىپ جەتكەن جاس قوناقتاردى دا ەرەكشە اتاپ وتكەن ءجون. ماسەلەن, تاراز قالاسىنان ون جاستاعى الەنا «وڭتۇستىك» وڭىرلىك قولباسشىلىعىنا قاراستى بايلانىس پولكىندە قىزمەت ەتەتىن اعاسى ۆلاديمير رومانوۆقا كەلگەن. گۆاردەيسك گارنيزونىنداعى تانك بريگاداسىنىڭ بارلاۋ باتالونىندا قىزمەت ەتەتىن ايبار كاليفانوۆتىڭ ءۇش جاسار ءىنىسى امىرە دە اعاسىنا كەلىپ, اسكەري تەحنيكالاردى قىزىعا تاماشالادى.
ەلورداداعى بريگاداعا قاراعاندى, شىمكەنت, قىزىلوردا, قوستاناي, استانا قالاسىنان بارلىعى 170-تەن اسا اتا-انا جينالدى. ولار ءتيردى, سپورت زالىن, كىتاپحانانى ارالاپ, جاۋىنگەرلەر جاتتىعاتىن تاكتيكالىق الاڭدا بولدى.
قاتارداعى جاۋىنگەر دياس بازكەنوۆتىڭ اكەسى اسحات پەن تۋعان اعاسى ءسابيت بازكەنوۆ قاراعاندى قالاسىنان ارنايى كەلگەن. جاۋىنگەرلىك جارىستىڭ جەڭىمپازى اتانعان دياس بازكەنوۆتىڭ سۋرەتى بولىمشەنىڭ قۇرمەت تاقتاسىنا ىلىنگەن ەدى. ءسابيت بازكەنوۆتىڭ ءوزى كەزىندە تاجىك-اۋعان شەكاراسىندا اسكەري بورىشىن وتەگەن. ول قازىرگى اسكەردىڭ جاعدايىن كورىپ, ەرەكشە اسەر العانىن ايتتى.
– ءبىزدىڭ كەزىمىزدەگى اسكەري ءومىردىڭ قيىندىعى از بولعان جوق. بۇگىنگى جاستاردىڭ اسكەري بورىشىن ابىرويمەن وتەپ جۇرگەنىن كورىپ, كوڭىلىم مارقايدى. دياس سياقتى ءتارتىپتى, نامىستى ۇلدار ەلدىڭ قورعانى بولارى ءسوزسىز. جاستارعا ايتارىم – وتان الدىنداعى پارىزدى ادال اتقارىپ, اسكەري تارتىپكە ءاردايىم بەرىك بولىڭىزدار. بالامىزدىڭ قىزمەت ەتۋ جاعدايىن ءوز كوزىمىزبەن كوردىك. باستىسى, بارلىق قاجەتتى جاعداي جاسالعان, ءتارتىپ پەن تالاپ تا بار. وسىندا جينالعانداردىڭ بارلىعى اسكەريلەرمەن تۇسكى اس ءىشتى. بۇل قاراپايىم عانا جۇزدەسۋدە كەشە عانا ءجاسوسپىرىم بولعان ۇلىمدى سەنىمدى, ءتارتىپتى, ءبىر-بىرىنە قولداۋ كورسەتۋگە دايىن ناعىز ەر-ازاماتتاردىڭ ورتاسىندا جۇرگەنىنە ىشتەي ريزا بولدىم. سوندىقتان اسكەري ءبولىم قولباسشىلىعىنا العىسىمدى ايتامىن, – دەدى ول.
ال اقتاۋ گارنيزونىنىڭ اسكەري بولىمدەرى 400-دەن اسا قوناقتى قابىلدادى. اسكەري-تەڭىز كۇشتەرىنىڭ ارتەكتى كەمەلەر ديۆيزيونىندا اتا-انالار تەڭىز قىزمەتىنىڭ اتموسفەراسىنا قانىقتى. ولار ماتروستاردىڭ تۇرمىسىمەن تانىسىپ, كايۋت-كومپانيالار مەن كامبۋزدى ارالادى.
تەڭىز جاياۋ اسكەرلەرى بريگاداسىندا اتا-انالاردىڭ قاتىسۋىمەن سپورتتىق جارىستار ۇيىمداستىرىلدى. ماڭعىستاۋ وبلىسى مەن اقتاۋ قالاسى بويىنشا «انالار جۇرەگى» سارباز انالارى كوميتەتىنىڭ توراعاسى گۇلميرا جانىسباەۆا جارىستىڭ باستاماشىسى بولدى.
دەسانتتىق-شابۋىلداۋ اسكەرلەرىنىڭ بولىمشەلەرى دە 400-دەن اسا قوناقتى قارسى الدى. 37-دەسانتتىق-شابۋىلداۋ بريگاداسىندا قوناقتارعا ءپاراشيۋتتى قالاي ەڭسەرۋ كەرەكتىگى كورسەتىلىپ, ارنايى كەشەندە اۋە-دەسانتتىق دايىندىق ەلەمەنتتەرى تانىستىرىلدى.
ءىس-شاراعا قاتىسا الماعان اتا-انالار مەن جاقىندارى ءۇشىن اسكەري بولىمدەردىڭ باسشىلىعى «وتباسىمەن بەينەقوڭىراۋ» ارقىلى بايلانىس ۇيىمداستىردى. وسىلايشا, 26363 اسكەري ءبولىمى كومانديرىنىڭ تاربيە جانە يدەولوگيالىق جۇمىس جونىندەگى ورىنباسارى كاپيتان ماديار مۇحتاروۆ قاتارداعى جاۋىنگەر بەگمات مىرزابەكتىڭ اناسى دۇيسەگۇل اقجىگىتوۆامەن حابارلاسىپ, تىلدەستى.
اڭگىمە بارىسىندا اناسىنا ساربازدىڭ قىزمەتتەگى جەتىستىكتەرى تۋرالى ايتتى. اسىرەسە دەسانتتىق-شابۋىلداۋ اسكەرلەرى اسكەري قىزمەتشىلەرى اراسىندا وتكەن قازاقشا كۇرەستە بەگمات مىرزابەك ءۇشىنشى ورىندى يەلەنگەنىن حابارلادى. سونداي-اق ول ۇلىن لايىقتى تاربيەلەگەنى ءۇشىن دۇيسەگۇل اقجىگىتوۆاعا شىنايى ريزاشىلىعىن ءبىلدىردى.
بىرىڭعاي اشىق ەسىك كۇنى اتا-انالارعا ۇلدارىنىڭ كاسىبي كومانديرلەردىڭ باسشىلىعىمەن قىزمەت اتقارىپ, جان-جاقتى قولداۋعا يە بولىپ وتىرعانىنا كوز جەتكىزۋگە مۇمكىندىك بەردى. بۇل ءىس-شارا – ارميا تۋرالى قالىپتاسقان ستەرەوتيپتەردى ەڭسەرۋگە, سونداي-اق ساربازدارعا دەگەن قامقورلىقتىڭ قارۋلى كۇشتەر ءۇشىن ءسوزسىز باسىمدىق ەكەنىن نىعايتا تۇسۋگە باعىتتالعان ماڭىزدى قادام.