روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمىندا «كونستيتۋتسيا – تاۋەلسىزدىكتىڭ كەپىلى» اتتى دوڭگەلەك ۇستەل جيىنى ءوتتى.
جيىندا كونستيتۋتسيانىڭ جاڭا جوباسى تالقىلاندى. ۇسىنىلعان وزگەرىستەر قۇقىقتىق مەملەكەتتى ودان ءارى نىعايتۋعا جانە ادامنىڭ قۇقىقتارى مەن بوستاندىقتارىنا كەپىلدىكتەردى كەڭەيتۋگە باعىتتالعان. كەزدەسۋگە قاتىسۋشىلار رەفورمانىڭ قۇندىلىقتىق جانە گۋمانيتارلىق قىرلارىنا نازار اۋدارىپ, جاڭا نورمالاردىڭ قوعامدىق ساناعا اسەرى جايىندا وي ءبولىستى.
– الدىڭعى كەزەكتە اتا زاڭنىڭ جاڭا ماتىنىندە ءبىلىم مەن عىلىمعا, تاريحي-مادەني مۇرانى ساقتاۋ, ءتول مادەنيەتتى قولداۋ, مادەنيەت پەن يننوۆاتسياعا باسىمدىق بەرىلگەنى كوڭىل قۋانتادى. بۇل 3-باپتىڭ 1-تارماعىندا ايقىن جازىلادى. ودان بولەك 40-باپتا قازاقستان رەسپۋبليكاسىنىڭ ازاماتتارى تاريحي جانە مادەني مۇرانىڭ ساقتالۋىنا قامقور بولۋعا, تاريح پەن مادەنيەت ەسكەرتكiشتەرiنە ۇقىپتى قاراۋعا مiندەتتi ەكەنى ايتىلعان. سەبەبى ەلىمىزدىڭ بولاشاعى ادام كاپيتالىنا, ازاماتتاردىڭ ءبىلىمى مەن جەتىستىكتەرىنە نەگىزدەلەتىنىن كورسەتەدى. مۇنداي باعىت جاستاردىڭ الەۋەتىن اشۋعا, شىعارماشىلىق پەن زياتكەرلىك دامۋدى قولداۋعا جول اشادى, – دەپ اتاپ ءوتتى روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمىنىڭ ديرەكتورى اقان ابدۋاليەۆ.
جيىندا ءسوز العان قازاقستاننىڭ ەڭبەك سىڭىرگەن قايراتكەرى جانعالي ءجۇزباي ونەر ادامدارىنىڭ شىعارماشىلىعىنا قولداۋ كورسەتۋ جونىندە ءوز ويىن ورتاعا سالدى.
– قازىر ونەردىڭ بارلىق سالاسى جان-جاقتى دامىپ جاتىر. اتاپ ايتقاندا, ۇلتتىق ونەر, كلاسسيكالىق ونەر, ەسترادا ونەرى, قازاق بي ونەرى, حور ونەرى, كينو جانە تەاتر ونەرىنىڭ دامۋىن اتاپ وتۋگە بولادى. مىسالى, «قازاقكونتسەرت» ۇيىمىنداعى «حالىق قازىناسى» ۇلتتىق ونەر ورتالىعىندا حالىقتىڭ ءانى, جىرى, كۇيى مەن داستانى كەڭىنەن قامتىلعان. دەمەك, ورتالىقتىڭ نەگىزگى مىندەتى – كونستيتۋتسيادا كورسەتىلگەندەي, تاريحي-مادەني مۇرانى ساقتاۋ جانە ءتول مادەنيەتتى قولداۋ قىزمەتىن اتقارۋ. بۇدان بولەك جاڭا رەفورمالار ۇلتىمىزدىڭ مادەنيەتى, مەنتاليتەتى جانە الەۋمەتتىك ماسەلەلەردىڭ دامۋىنا, سونداي-اق قوعامنىڭ ءبىلىم دەڭگەيى مەن زياتكەرلىك الەۋەتىنىڭ ارتۋىنا ىقپال ەتەدى, – دەدى ول.
ال قازاقستاننىڭ ەڭبەك سىڭىرگەن قايراتكەرى, ەركەعالي راحماديەۆ اتىنداعى مەملەكەتتىك اكادەميالىق فيلارمونيا كامەرالىق حورىنىڭ باس ديريجەرى گۇلميرا قۇتتىباداموۆا قازىر ناق وزگەرىس قاجەت كەزەڭدە تۇرعانىمىزدى ايتادى.
– قازىر ءبىز تەز وزگەرىپ جاتقان الەمدە ءومىر ءسۇرىپ جاتىرمىز. ونىڭ ۇستىنە, تسيفرلاندىرۋ ويلاۋ جۇيەمىز بەن سانامىزدى تۇبەگەيلى وزگەرتىپ, ءوز ىقپالىن تيگىزۋدە. ۋاقىتتىڭ وسى شىنايى تالاپتارى مەن سىن-قاتەرلەرى, ءسوزسىز, وزگەرىستەر مەن جاڭارۋلاردىڭ قاجەتتىلىگىن العا تارتادى. كونستيتۋتسيا جوباسىمەن مۇقيات تانىسىپ شىقتىم. ءبىلىم بەرۋ مەن تاربيەلەۋ جۇيەسىنىڭ زايىرلى سيپاتى بولەك اتاپ كورسەتىلگەن. سونداي-اق زياتكەرلىك مەنشىكتى قورعاۋ تۋرالى ەرەجەنى ماڭىزدى دەپ سانايمىن: كونستيتۋتسيا دەڭگەيىندە مەملەكەتتىڭ ازاماتتاردىڭ زياتكەرلىك قۇقىقتارىن قورعاۋدى ءوز مىندەتىنە الاتىنى بەكىتىلگەن. بۇل – مادەنيەت پەن شىعارماشىلىقتىڭ دامۋىنا جاڭا مۇمكىندىكتەر اشىپ, ەركىن شىعارماشىلىقپەن اينالىسۋعا جاعداي جاسايتىن اسا ماڭىزدى قادام, – دەدى گ.قۇتتىباداموۆا.
سونداي-اق ءىس-شاراعا قاتىسۋشىلار ەلدىڭ ۇزاقمەرزىمدى جاڭعىرۋى كونتەكسىندە الداعى وزگەرىستەردىڭ ماڭىزىنا توقتالدى. ولار مادەنيەت پەن ونەردىڭ قوعام ومىرىندەگى ءرولىن كۇشەيتەتىن تەتىكتەردى ەگجەي-تەگجەيلى قاراستىرىپ, ازاماتتاردىڭ قۇقىقتىق ساناسىن قالىپتاستىرۋدا سول مادەنيەت پەن ونەردىڭ قالاي كومەكتەسەتىنى جونىندە پىكىر ءبىلدىردى.
كەزدەسۋدە شىعارماشىلىق باستامالاردى ودان ءارى قولداۋعا قاتىستى ۇسىنىستار تىڭدالدى. مادەنيەت سالاسىنىڭ وكىلدەرى جاڭارتىلعان كونستيتۋتسيانىڭ تالانتتاردى اشۋعا جانە ۇلتتىق مۇرانى قورعاۋعا بەرىك نەگىز قالىپتاستىراتىنىن جانە ۇلتتىڭ ينتەللەكتۋالدى الەۋەتىن دامىتۋ ءۇشىن شەشۋشى شارت ەكەنىنە باسا نازار اۋداردى. اتالعان جيىنعا مادەنيەت جانە ونەر سالاسىنىڭ وكىلدەرى جانە «قازاقكونتسەرتتىڭ» شىعارماشىلىق ۇجىمدارىنىڭ كوركەمدىك جەتەكشىلەرى قاتىستى.