«زاڭ جانە ءتارتىپ» تۇجىرىمداماسىن ىسكە اسىرۋ اياسىندا قولعا الىنعان جوبا قۇقىق بۇزۋشىلىقتىڭ الدىن الۋعا باعىتتالعان. جوبانىڭ تانىستىرىلىمىندا وڭىردە تىركەلگەن ءاربىر ەكى قىلمىستىڭ بىرەۋى قوستاناي قالاسىندا جاسالاتىنى ايتىلدى, دەپ جازادى Egemen.kz.
قالا پروكۋرورى ەرمەك شۋاقپاەۆتىڭ سوزىنشە, قوستاناي قالاسى ەسىرتكىگە تاۋەلدىلىك جانە ناشاقورلار سانى جاعىنان رەسپۋبليكا بويىنشا كوش باستاپ تۇر.
ء«سوزدىڭ اشىعىنا كەلسەك, قىلمىسپەن كۇرەس جۇمىستارىندا ءتۇيىنى تارقاماعان ماسەلەلەر جەتكىلىكتى. وتكەن جىلى كىسى ءولتىرۋ, اۋىر جاراقات الۋ جانە تۇرمىستىق زورلىق-زومبىلىق قىلمىستارى تاعى ءوستى. قوعامدىق ورىنداردا جاسالعان قىلمىستىق قۇقىق بۇزۋشىلىقتاردىڭ سانى كوپ. كامەلەتكە تولماعاندارعا قاتىستى قىلمىس دەڭگەيى بارلىق رەكوردتاردى جاڭارتىپ وتىر. 2000 جىلمەن سالىستىرعاندا سوڭعى جىلدار كورسەتكىشى 13-تەن 44-كە دەيىن ءوستى. قالادا ورەسكەل بۇزاقىلىق ادەتكە اينالدى. كوپتەگەن ويىن-ساۋىق ورىندارىنا بارۋدىڭ ءوزى قورقىنىشتى», دەدى ەرمەك شۋاقپاەۆ.
جيىندا قوستانايداعى تۇنگى كلۋبتار مەن كافە-بارلاردىڭ ادامدى ۇرىپ-سوعۋدىڭ, توبەلەس پەن جانجالدىڭ ورتاسىنا اينالىپ وتىرعانى ايتىلدى. بۇل سارىنداعى قوڭىراۋلاردىڭ پوليتسيا قىزمەتىنە كۇن سايىن ءتۇسىپ وتىرۋى ءتىپتى قالىپتى جاعدايعا اينالعان. ماسەلەن, 2025 جىلى «نە حابار» كلۋبىندا 85, «پاناەحالي» بارىندا 68, «ۆولنا» بارىندا 46 ءتارتىپ بۇزۋشىلىق انىقتالعان. بىلتىر جەرگىلىكتى پوليتسيا قىزمەتىنە اتالعان ءۇش نىساننان تارتىپسىزدىك تۋرالى 199 حابارلاما كەلىپ ءتۇستى. مۇنداعى كەلەڭسىز وقيعانىڭ ءبارى ىشىمدىكتىڭ سالدارىنان بولعان.
الاياقتاردىڭ ايلاسى وزگەردى: ەندى اقشانى «كۋرەر» بولىپ الىپ كەتەدى
«تىركەلگەن ۇرلىق كورسەتكىشى دە باسقا وڭىرلەرمەن سالىستىرعاندا ايتارلىقتاي جوعارى. وبلىستاعى ءاربىر ەكىنشى جول-كولىك وقيعاسى قالادا تىركەلدى. سالدارىنان سەگىز ادام قازا تاۋىپ, 800-دەن استام ادام جاراقات الدى. الاياقتاردىڭ داۋرەنى ءجۇرىپ تۇر. 2025 جىلى الدانعاندار سانى 1200 ادامنان استى. وسى تەكتەس قۇقىق بۇزۋشىلىقتاردى ازايتۋ جانە بولدىرماۋ ءۇشىن ءبىز «ايقىن ناتيجە» جوباسىن ۇسىنىپ وتىرمىز», دەدى قوستاناي پروكۋرورى.
قوستانايدا سۋ قۇبىرى جارىلدى: تۇرعىندار قاقاعان سۋىقتا سۋسىز وتىر