مۇنايلى وڭىردە ءسابي سۇيگىسى كەلەتىندەر از ەمەس. ماسەلەن, 2021–2025 جىلدار ارالىعىندا «اڭساعان ءسابي» باعدارلاماسىنا جۇگىنگەن 467 ايەل ءسابيىن ومىرگە اكەلدى.
الايدا جىل سايىن اتالعان باعدارلامامەن ءسابي سۇيگەن ايەلدەر سانىنىڭ ازايعانى بايقالادى. وبلىستىق دەنساۋلىق ساقتاۋ باسقارماسىنىڭ دەرەگىنە قاراعاندا, 2021 جىلى – 154, 2022 جىلى – 131, 2023 جىلى – 98, ال 2024 جىلى 84 ايەل انا باقىتىنا بولەنىپتى.
«بىلتىر «اڭساعان ءسابي» باعدارلاماسى بويىنشا ەكۇ پروتسەدۋراسىنان وتكەن 44 ايەلدىڭ جۇكتىلىگى تىركەلدى. قازىر اتالعان باعدارلاماعا قاتىسقان ايەلدەردىڭ كوپشىلىگى دارىگەرلەردىڭ تۇراقتى باقىلاۋىمەن ەمدەۋ, وڭالتۋ كەزەڭىنەن ءوتىپ جاتىر», دەپ حابارلادى باسقارمانىڭ ءباسپاسوز قىزمەتى.
ال وبلىستىق پەريناتالدىق ورتالىقتا 36 جاستاعى ايەل التىنشى پەرزەنتىنە جارىق ءومىر سىيلادى. ءبىر ەرەكشەلىگى, ءسابيدىڭ سالماعى – 5,8 كگ, بويى 61 سانتيمەتر. ونىڭ سالماعى مەن بويى وڭىردەگى ورتاشا ستاتيستيكالىق كورسەتكىشتەن جوعارى ەكەنى تىركەلىپ وتىر.
جۇكتى ايەل باستاپقىدا ورتالىقتاعى جۇكتىلىك پاتولوگياسى بولىمشەسىنە جاتقىزىلدى. ۋلترادىبىستىق زەرتتەۋ قورىتىندىسىمەن ءسابيدىڭ سالماعى شامامەن 6,5 كگ بولۋى مۇمكىن ەكەنىنە بولجام جاسالدى. مۇنداي سالماقتاعى ءسابيدى وتا ارقىلى امان الىپ قالۋعا بولادى. سول سەبەپتەن, جۇكتى ايەلگە كەسار تىلىگىمەن وتا جاساۋعا شەشىم قابىلداندى.
«وتا ءساتتى ءوتتى. انا مەن بالا دارىگەرلەردىڭ تۇراقتى باقىلاۋىنا الىندى. قازىر ولاردىڭ جاعدايى جاقسى», دەپ حابارلادى ورتالىقتىڭ ءباسپاسوز قىزمەتى.
اتىراۋ وبلىسى