ءوڭىر حالقىمەن كەزدەسىپ, الەۋمەتتىك نىسانداردى ارالاعان سەناتورلار اۋىل-ايماق تۇرعىندارىمەن پرەزيدەنت قاسىم-جومارت توقاەۆتىڭ «Turkistan» گازەتىنە بەرگەن سۇحباتىن تالقىلادى. مەملەكەت باسشىسى اتاپ وتكەن ەل دامۋىنىڭ باسىم باعىتتارىن ءتۇسىندىردى.
سەناتور بيبيگۇل جەكسەنباي پرەزيدەنت سۇحباتىندا بەلگىلەنگەن كولىك ساياساتىنىڭ نەگىزگى باعىتتارىن ساراپشىلارمەن بىرگە تالقىلادى. بۇعان قوسا «اقمولا ۆاگون جوندەۋ زاۋىتى» اق ۇجىمىمەن كەزدەسۋ كەزىندە مەتاللۋرگيا جانە مەحانيكالىق قۇراستىرۋ ءوندىرىسى, ۆاگوندارعا ارنالعان بىرقاتار بولشەكتى دانەكەرلەۋ, دايىنداۋ مەن مونتاجداۋدىڭ تەحنولوگيالىق ۇدەرىسىمەن, سونداي-اق ءوندىرىستى جاڭعىرتۋ بارىسىمەن تانىستى. ول كاسىپورىن قىزمەتكەرلەرىنىڭ ەلدىڭ كولىكتىك-لوگيستيكا الەۋەتىن دامىتۋعا قوسقان ەلەۋلى ۇلەسىن اتاپ ءوتتى.
ال دەپۋتات نۇرلان بەكەنوۆ اقمولا وبلىسىندا كوممۋنالدىق ينفراقۇرىلىمدى جاڭعىرتۋدىڭ ماڭىزىن تۇرعىندارمەن بىرگە تالقىلادى. سونىمەن قاتار سەناتور قوسشى قالاسىندا قالالىق جاڭا ەمحانا, جەدەل باسقارۋ ورتالىعى, قوعامدىق مادەني-سپورت كەشەنى قۇرىلىسىنىڭ بارىسىمەن تانىستى. قوسشى قالاسىنىڭ اكىمى, قالالىق ءماسليحاتتىڭ توراعاسى جانە جەرگىلىكتى اتقارۋشى ورگانداردىڭ وكىلدەرىمەن كەزدەستى. وندا مەملەكەت باسشىسىنىڭ قالاداعى قوعامدىق كەڭىستىكتى اباتتاندىرۋ جونىندەگى تاپسىرماسىن, سونداي-اق پرەمەر-ءمينيستردىڭ تازارتۋ قۇرىلىستارى مەن كۆارتالىشىلىك سۋ بۇرۋ جەلىلەرى كەشەنىنە ورتالىق جەتكىزۋشى كوللەكتوردىڭ قۇرىلىسىن قارجىلاندىرۋ جونىندەگى تاپسىرماسىن ورىنداۋعا بايلانىستى ماسەلەلەرگە توقتالدى.
سەنات دەپۋتاتتارى سۇيىندىك الداشەۆ پەن بەكبول ورىنباساروۆ ماڭعىستاۋ وبلىسى مەملەكەت باسشىسىنىڭ بيىلعى سۇحباتىندا بەلگىلەنگەن ستراتەگيالىق باعىتقا تولىق سايكەس كەلەتىنىن, سونداي-اق ەلىمىزدىڭ ەنەرگەتيكالىق, كوممۋنالدىق ينفراقۇرىلىمىن جاڭعىرتۋعا ەرەكشە نازار اۋدارىلعانىن ايتادى. قازىر اقتاۋدا «اقتاۋ حالىقارالىق تەڭىز پورتىنىڭ» سولتۇستىك شەكاراسى اۋدانىندا سۋ جيناۋ ارناسى سالىنىپ جاتىر. بۇل نىسان ءوڭىردىڭ ەنەرگەتيكالىق, كوممۋنالدىق ينفراقۇرىلىمىن سۋمەن تۇراقتى قامتاماسىز ەتۋگە باعىتتالعان. سەناتورلار وسى جوبانىڭ تەحنيكالىق جاي-كۇيى مەن ونى ىسكە اسىرۋ كەزەڭدەرىمەن تانىستى. سونداي-اق «ماەك» جشس-دە بولىپ, تەحنولوگيا, تاريف ماسەلەلەرىمەن, جەو-1 جانە جەو-2-گە تۇسەتىن سۋ كولەمىن ۇلعايتۋ جونىندەگى جۇمىستاردىڭ بارىسىمەن تانىستى. ايتا كەتسەك, اتالعان نىساندارعا رەسپۋبليكالىق بيۋدجەتتەن قارجى قاراستىرىلعان.
ءلاززات رىسبەكوۆا مەن ارمان وتەعۇلوۆ باتىس قازاقستان وبلىسىنىڭ اقجايىق اۋدانىندا بولدى. سەناتورلار جۇرتشىلىقپەن كەزدەسۋدە پرەزيدەنتتىڭ ەكونوميكالىق تۇرعىدان ءوزىن-ءوزى قامتاماسىز ەتەتىن اۋىلداردى قالىپتاستىرۋ, كووپەراتسيانى كەڭەيتۋ مەن اۋىلدا تۇراقتى جۇمىس ورىندارىن قۇرۋعا باستى نازار اۋدارىپ وتىرعانىن ايتتى. تۇرعىندار بولسا اۋىلدا مادەنيەت ءۇيىن سالۋ تۋرالى ۇسىنىسىن جەتكىزدى.
سەناتور ەرنۇر ايتكەنوۆ پاۆلودار وبلىسىنا بارعان ساپارىندا «اۋىل اماناتى» باعدارلاماسىنىڭ ىسكە اسىرىلۋ بارىسى مەن مال بورداقىلاۋ الاڭىنىڭ جۇمىسىمەن تانىستى. فەرمەرلەرمەن كەزدەسكەن دەپۋتات مەملەكەت باسشىسىنىڭ اۋىل شارۋاشىلىعىن مەملەكەتتىك قولداۋدىڭ تيىمدىلىگىن ارتتىرۋ, مال شارۋاشىلىعىن دامىتۋ مەن فەرمەر قوجالىقتارىنىڭ كووپەراتسياسىن اۋىلدى تۇراقتى دامىتۋدىڭ نەگىزگى فاكتورى رەتىندە ەرەكشە اتاپ وتكەنىن ايتتى.
جانبولات جورگەنباەۆ پەن زاكيرجان كۋزيەۆ جۇمىس ساپارىمەن الماتى وبلىسىنىڭ ەڭبەكشىقازاق, تالعار اۋداندارىندا بولدى. وندا اگروونەركاسىپ كەشەنى مەن لوگيستيكا سالاسىنداعى كاسىپورىنداردىڭ قىزمەتىمەن تانىستى. وبلىس تۇرعىندارىمەن كەزدەسۋدە پرەزيدەنتتىڭ جۋىرداعى «قازاقستان جاڭا جاڭعىرۋ كەزەڭىنە اياق باستى» سۇحباتىندا بەلگىلەنگەن مىندەتتەرىن اتاپ ءوتتى. ولاردىڭ ايتۋىنشا, ەلىمىزدە اۋىل شارۋاشىلىعى سالاسىن قولداۋ ماقساتىندا اۋقىمدى جۇمىستار جۇرگىزىلىپ جاتىر, الايدا ەلگە كەلىپ جاتقان ينۆەستيتسيانىڭ تيىمدىلىگىن ارتتىرۋ قاجەت.
ال سەناتورلار نۇرلان بەكنازاروۆ پەن ايگۇل قاپباروۆا پرەزيدەنت بەلگىلەگەن «زاڭ جانە ءتارتىپ» قاعيداتى تۋرالى اڭگىمەلەدى. شىمكەنت قالالىق پروكۋراتۋراسىندا بولدى. قاداعالاۋ ورگانىنىڭ باسشىلىعىمەن كەزدەسۋ بارىسىندا قۇقىق بۇزۋشىلىقتىڭ الدىن الۋ, ەسىرتكى قىلمىسى مەن كيبەرقىلمىسقا قارسى ءىس-قيمىل بويىنشا جۇرگىزىلىپ جاتقان جۇمىستار ءسوز بولدى. قازىرگى كەزدە پروكۋراتۋرا جانىنان كيبەرالاياقتىقتىڭ الدىن الۋ جونىندەگى كولل-ورتالىق جۇمىس ىستەپ تۇر, تۇرمىستىق زورلىق-زومبىلىق بويىنشا 150 جابىرلەنۋشىگە كومەك كورسەتىلگەن.
دەپۋتات اسەم راحمەتوۆا سقو, ياۆلەنكا اۋىلىندا بولىپ, «Nomads-AI» شىعارماشىلىق ورتالىعىنىڭ قىزمەتىمەن تانىستى. سونداي-اق ينفراقۇرىلىم نىساندارىن ارالادى. تۇرعىندارمەن كەزدەسۋدە پرەزيدەنت سۇحباتىنداعى تسيفرلىق جاڭعىرۋدىڭ باسىمدىقتارىنا توقتالدى.
سەناتورلار رۋسلان رۇستەموۆ پەن ناۋرىزباي بايقاداموۆ قىزىلوردادا پرەزيدەنت بەلگىلەگەن الەۋمەتتىك-ينفراقۇرىلىمدىق ساياساتتىڭ باسىمدىقتارىن تالقىلادى. قىزىلوردا تۇرعىندارى ينجەنەرلىك, الەۋمەتتىك ينفراقۇرىلىمدى دامىتۋ, تۇرعىن ءۇي-كوممۋنالدىق شارۋاشىلىعى, سونداي-اق زاڭدى ساقتاۋ, ازاماتتاردىڭ قۇقىقتارىن قورعاۋعا قاتىستى ماسەلەلەردى كوتەردى. سەناتورلار قولدانىستاعى زاڭناما شەڭبەرىندە ءاربىر وتىنىشكە تۇسىنىكتەمە بەرىپ, ۇسىنىستار قۇزىرەتتى مەملەكەتتىك ورگاندارعا جولداناتىنىنا ۋادە بەردى.
ال جاننا اسانوۆا مەن سەرگەي ەرشوۆ الماتىداعى جول قاۋىپسىزدىگى ماسەلەلەرىن تالقىلادى. الماتى قالالىق پوليتسيا دەپارتامەنتىندە دەپۋتاتتار كوشە-جول جەلىسىنىڭ تىعىزدىعى, جول قوزعالىسىن ۇيىمداستىرۋدىڭ جەكەلەگەن پروبلەمالىق ماسەلەلەرىنەن حاباردار بولدى. «الماتى سياقتى ءىرى مەگاپوليستەگى جول قاۋىپسىزدىگى ماسەلەلەرى ءاتۇستى شەشىمدەردى ەمەس, بارلىق مۇددەلى مەكەمەلەردىڭ جۇيەلى جانە ۇيلەسىمدى ءتاسىلىن تالاپ ەتەدى», دەپ اتاپ ءوتتى ج.اسانوۆا.
شاكارىم بۇقتۇعۇتوۆ ريددەر قالاسىندا الەۋمەتتىك سالانى دامىتۋ ماسەلەلەرىن تۇرعىندارىمەن بىرگە تالقىلادى. پرەزيدەنت بەلگىلەگەن مەملەكەتتىك ساياساتتىڭ باسىمدىقتارى بويىنشا جۇزەگە اسىپ جاتقان جوبالار قامتىلدى. دەپۋتات, اسىرەسە, مەديتسينالىق قىزمەتتەردىڭ قولجەتىمدىلىگى مەن ساپاسى ماسەلەلەرىنە ەرەكشە نازار اۋداردى. ونىڭ ايتۋىنشا, ءوڭىر تۇرعىندارى قاجەتتى مەديتسينالىق قىزمەتتەرگە تەڭدەي قول جەتكىزۋى قاجەت.
سەناتور بەكبولات ورىنبەكوۆ جامبىل وبلىسىنىڭ جامبىل, بايزاق, تۇرار رىسقۇلوۆ, مەركى, شۋ اۋداندارىندا بولدى. دەپۋتات جاڭا بيۋدجەت جانە سالىق كودەكستەرىنىڭ نەگىزگى ەرەجەلەرى تۋرالى باياندادى. اتالعان زاڭ مەملەكەت باسشىسىنىڭ سۇحباتىندا بەلگىلەگەن ماقساتتارمەن استاسىپ جاتقانىن اتاپ ءوتتى سەناتور.