سەنات توراعاسى ماۋلەن اشىمباەۆ ۇلىبريتانيا جانە سولتۇستىك يرلانديا بىرىككەن كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ساللي دجەين اكسۋورسيمەن كەزدەستى.
ماۋلەن اشىمباەۆ ەلشىنى تاعايىندالۋىمەن قۇتتىقتاي وتىرىپ, ۇلىبريتانيا قازاقستاننىڭ ەۋروپاداعى ماڭىزدى سەرىكتەستەرىنىڭ ءبىرى ەكەنىن اتاپ ءوتتى. سونداي-اق ول ەكى ەل اراسىندا ديپلوماتيالىق قارىم-قاتىناستىڭ ورناعانىنا 30 جىلدان اسا ۋاقىت وتكەنىن, بۇگىندە ءوزارا بايلانىس دوستىق, سەنىم, قۇرمەت جانە ورتاق مۇددەلەرگە تابان تىرەيتىنىن ايتتى.
«قازىرگى تاڭدا قازاقستان – بريتان قاتىناستارى ءتۇرلى سالادا قارقىندى دامىپ كەلەدى. ەڭ جوعارى دەڭگەيدە بەرىك جانە سىندارلى ساياسي ديالوگ قالىپتاستى. بىلتىر قاراشا ايىندا باكۋدە وتكەن COP29 جاھاندىق كليماتتىق ءسامميتى الاڭىندا قازاقستان پرەزيدەنتى قاسىم-جومارت توقاەۆ پەن ۇلىبريتانيا پرەمەر-ءمينيسترى كير ستارمەردىڭ كەزدەسۋى ەلدەرىمىز اراسىنداعى ىنتىماقتاستىققا جاڭا سەرپىن بەردى. سونداي-اق 2024 جىلعى ساۋىردە بىرىككەن كورولدىكتىڭ سىرتقى ىستەر ءمينيسترى دەۆيد كەمەروننىڭ قازاقستانعا ساپارى كەزىندە ستراتەگيالىق سەرىكتەستىك پەن ىنتىماقتاستىق تۋرالى كەلىسىمگە قول قويىلعانى بەلگىلى. قازاقستان پارلامەنتى وسى كەلىسىمدى ىسكە اسىرۋعا ءوز سەپتىگىن تيگىزۋگە دايىن», دەدى سەنات توراعاسى.
تاراپتار پارلامەنتارالىق ىنتىماقتاستىقتى كەڭەيتۋ ماسەلەسىنە دە توقتالدى. سۇحبات كەزىندە ەكى ەلدىڭ پارلامەنتتەرىندە جۇمىس ىستەيتىن دوستىق توپتارى اياسىندا ءوزارا ءىس-قيمىلدى ودان ءارى ارتتىرۋ جونىندەگى مىندەت بەلگىلەندى.
سونىمەن قاتار پالاتا سپيكەرى مەملەكەت باسشىسىنىڭ باستاماسىمەن قازاقستاندا جۇرگىزىلىپ جاتقان ساياسي جانە الەۋمەتتىك-ەكونوميكالىق رەفورمالارعا نازار اۋداردى. ماۋلەن اشىمباەۆ قازاقستاننىڭ ساياسي جۇيەسىن دەموكراتيالاندىرۋ ماسەلەلەرىنە جانە پرەزيدەنت جولداۋىنداعى جاڭا باستامالارعا جان-جاقتى توقتالىپ, جۇرگىزىلىپ جاتقان وزگەرىستەردىڭ ستراتەگيالىق ماڭىزىن اتاپ ءوتتى. سونداي-اق ول الەمدىك جانە ءداستۇرلى دىندەر كوشباسشىلارىنىڭ سەزىنە ۇنەمى قولداۋ كورسەتىپ, بەلسەندى قاتىسىپ كەلە جاتقانى ءۇشىن انگليكان شىركەۋىنىڭ رۋحاني وكىلدەرىنە ريزاشىلىق ءبىلدىردى.
ءوز كەزەگىندە ساللي دجەين اكسۋورسي پارلامەنت سەناتىمەن ەكىجاقتى قارىم-قاتىناستىڭ كەڭ اۋقىمدى ماسەلەلەرى بويىنشا ىنتىماقتاستىقتى ودان ءارى نىعايتۋعا مۇددەلى ەكەنىن ايتتى.