حالىق قايىرىمدىلىققا سەنە مە؟

قازاقستاندىق قوعامدىق دامۋ ينستيتۋتىنىڭ زەرتتەۋىنە سۇيەنسەك, ەل ازاماتتارىنىڭ 23,9 پايىزى عانا ۆولونتەرلىك ۇيىمداردىڭ قىزمەتىن بىلەدى, ال 56,8 پايىزى, ياعني كوپشىلىگى بۇل قىزمەت تۋرالى ەستىگەن. قالعان 19,3 پايىزى ۆولونتەرلىك باستامالار تۋرالى ەشتەڭە بىلمەيدى.

«ۆولونتەردىڭ الەۋمەتتىك-دەموگرافيالىق پورترەتىن ايتار بولساق, جوعارى ءبىلىمى بار, ەكونوميكالىق جاعدايى تۇراقتى, جۇمىس ىستەيتىن نەمەسە وقۋمەن قاتار ەڭبەك ەتەتىن جاستار. سونداي-اق ۆولونتەرلەر ۇلەسى سالىستىرمالى تۇردە قالا تۇرعىندارى اراسىندا كوبىرەك. گەندەرلىك ايىرماشىلىق ايقىن ەمەس. پسيحولوگيالىق تۇرعىدان ۆولونتەرلەر ءوزىن باقىتتىراق سەزىنەدى, بولاشاققا دەگەن سەنىمى جوعارى», دەيدى قازاقستاندىق قوعامدىق دامۋ ينستيتۋتىنىڭ ساراپشىسى گۇلسايران نۇرتاي.

 ۆولونتەرلەر الترۋيستەر عانا ەمەس, ولار جەكە قۇندىلىقتارىن قالىپتاستىرۋعا, تاجيرىبە جيناقتاۋعا, الەۋمەتتىك قارىم-قاتىناس ورناتىپ, ءوزىن-ءوزى دامىتۋعا ۇمتىلادى. كوبىنەسە ۆولونتەرلىك قىزمەت – اقىلى جۇمىسقا جول سالادى, بۇل جەردە ادام ءوزىن جاقسى جاقتان كورسەتە الادى, ءوزىن ءتۇرلى قىزمەت اياسىندا سىناپ كورۋگە مۇمكىندىگى مول.

ال حالىقتىڭ قايىرىمدىلىق تۋرالى حاباردار بولۋ دەڭگەيىنە كەلسەك, ازاماتتاردىڭ 46,1 پايىزى مۇنداي ۇيىمداردىڭ جۇمىسى تۋرالى جاقسى بىلەدى, 38,6 پايىزى بۇل تۋرالى ەستىگەن. ال ەشتەڭە بىلمەيتىندەر ۇلەسى – 15,4 پايىز.

زەرتتەۋگە سايكەس, ازاماتتاردىڭ شامامەن 24,8 پايىزى قايىرىمدىلىق قورلارىنا مۇلدەم سەنبەيتىنىن ايتقان, ياعني شارتتى تۇردە ءار ءتورتىنشى ازامات سەنىمسىزدىك بىلدىرگەن. قايىرىمدىلىق قورلارىنا تولىقتاي سەنەتىندەر ۇلەسى دە وسى شامادا – 26,4 پايىز. ال رەسپوندەنتتەردىڭ 45 پايىزدان استامى قايىرىمدىلىق قورلارىنا ءىشىنارا سەنەدى, اتاپ ايتقاندا, ولاردىڭ 29,6 پايىزى تەك كەيبىر قايىرىمدىلىق قورلارىنا سەنىم بىلدىرسە, 15,8 پايىزى قورلارعا ەمەس, قايىرىمدىلىقپەن جەكە اينالىساتىندارعا سەنەتىنىن ايتقان.

 جالپى, كەيىنگى 12 ايدا رەسپوندەنتتەردىڭ ⅔ بولىگى قايىرىمدىلىقپەن اينالىسقان, ادامدار كوبىنە تىكەلەي مۇقتاج جاندارعا كومەكتەسۋدى ءجون كورەدى. ال قورلار ارقىلى كومەكتەسەتىندەر ۇلەسى – بار-جوعى 10 پايىز شاماسىندا.

زەرتتەۋ ەلدىڭ بارلىق ءوڭىرىن – استانا, الماتى, شىمكەنت قالالارى مەن 17 وبلىس ورتالىعىن, سونداي-اق اۋىلدىق ەلدى مەكەندەردى قامتىعان.

«2021 جىلى جۇرگىزىلگەن زەرتتەۋمەن سالىستىرساق, كەيىنگى ءتورت جىل ىشىندە ەل ازاماتتارىنىڭ قايىرىمدىلىق قىزمەتىنە دەگەن كوزقاراسى تۇبەگەيلى وزگەرمەگەنىن اتاپ وتكەن ءجون, حالىقتىڭ باسىم كوپشىلىگى قايىرىمدىلىقتى بەلگىلى ءبىر دەڭگەيدە وڭ قابىلدايدى. 2021–2025 جىلدار ارالىعىندا الەۋمەتتىك جەلىلەردى پايدالانۋشىلار ۇلەسى ايتارلىقتاي ارتتى (قولدانبايتىندار 15 پايىزدان 5,1 پايىزعا دەيىن ازايدى). الايدا ونداعى كومەك تۋرالى جازبالاردى ەلەمەۋ, ولاردى لايك, رەپوست ارقىلى تاراتۋ دەڭگەيى بۇرىنعى كۇيىندە قالدى. سونىمەن قاتار كومەك تۋرالى پوستتارعا جاۋاپ رەتىندە اقشالاي نەمەسە م ۇلىكتىك كومەك كورسەتۋ ءبىرشاما جيىلەگەنى بايقالادى», دەيدى گ.نۇرتاي.