ءوڭىردى وركەندەتۋدەگى ىلكىمدى ىستەر

بيىل 10 ايدا وبلىس ەكونوميكاسىنا 892 ملرد تەڭگە ينۆەستيتسيا تارتىلعان. جالپى قۇنى 110 ملرد تەڭگەدەن اساتىن جەل ەلەكتر ستانساسى, قوي ءجۇنىن وڭدەۋ تسەحى, اگروحيميكاتتار, گوفروقاپتاما, ورتكە قارسى قۇرالدار شىعاراتىن كاسىپورىندار مەن ERG Green «قازحروم» تۇك» اق فلوتاتسيالىق ۋچاسكەسى جۇمىسىن باستاعان.

«اتاپ وتسەم, «KazFeltec» كومپانيا­سى­نىڭ باستاماسىمەن ەلىمىزدە العاش رەت قوي ءجۇنىن تەرەڭ وڭدەپ, ودان قۇرىلىس ماتە­ريالدارىن شىعاراتىن جاڭا تسەح اشىلىپ وتىر. جىل سوڭىنا دەيىن جالپى قۇنى شامامەن 350 ملرد تەڭگەنى قۇ­رايتىن 4 جوبانى ىسكە اسىرۋدى جوسپارلاپ وتىرمىز. بۇعان قوسا الداعى جىلدارى كارباميد, بيتۋم, تسەمەنت وندىرەتىن زاۋىت سالىنادى», دەدى ا.شاحاروۆ.

ينۆەستورلاردى تارتۋعا دا قولايلى جاعداي قاجەت. وبلىس ءاليا مولداعۇلوۆا اتىنداعى حالىقارالىق اۋەجاي بازاسىندا جالپى اۋدانى 858 گەكتاردى قامتيتىن «اقتوبە» ارنايى ەكونوميكالىق ايماعى مەن حرومتاۋ قالاسىندا جالپى اۋماعى 150 گەكتاردى قۇرايتىن رەسپۋبليكالىق ماڭىزى بار «حرومتاۋ» يندۋستريالىق ايماعىن قۇرعان.

اۋىل شارۋاشىلىعى – وبلىس دامۋىنىڭ باسىم باعىتتارىنىڭ ءبىرى. بيىل سالاعا 15 ملرد تەڭگە بولىنگەن. بۇل قاراجات مال, وسىمدىك شارۋاشىلىعىن قولداۋعا, پايىزدىق مولشەرلەمەلەردى سۋبسيديالاۋعا, ينۆەستيتسيالىق جوبالاردى جۇزەگە اسىرۋعا جۇمسالعان. ناتي­جەسىندە مال باسى ورتا ەسەپپەن 7 پايىزعا وسكەن. اتاپ ايتقاندا, ءىرى قارا – 100,7, قوي – 105,3, جىلقى – 113,1, تۇيە باسى 108,6 پايىزعا ارتقان.

«مال باسىن ارتتىرۋدا سولتۇستىك قازاقستان وبلىسىنىڭ تاجىريبەسىن ەنگىزدىك. ماسەلەن, «ايس» ءسۇت-تاۋار فەرماسىن (1 600 باسقا دەيىن) كەڭەيتۋگە 2,5 پايىزبەن 7,5 ملرد تەڭگە كولەمىندە جەڭىلدەتىلگەن نەسيە بەرىلدى. بۇگىن­نىڭ وزىندە 800 باس ءىرى قارا مال اكەلىنىپ, ءبىرىنشى كەزەڭى ىسكە قوسىلدى. جالپى, ءسۇت ءوندىرىسىن قوسىمشا 20 مىڭ تونناعا ۇلعايتۋ جوسپارىمىز بار. ناتيجەسىندە, ءوڭىر وڭدەلگەن سۇتپەن 90 پايىزعا قامتاماسىز ەتىلەدى, قازىر بۇل – 62 پا­يىز. ال وسىمدىك شارۋاشىلىعىنا كەلەر بولساق, كوكتەمگى ەگىس پەن كۇزگى وراق جۇمىسىنا جالپى 5 پايىزبەن 5,9 ملرد تەڭگە جەڭىلدەتىلگەن نەسيە بەرىلدى. بۇل دا ناتيجەلى بولىپ, بيىل 554 مىڭ توننا ءونىم الدىق. بۇل بىلتىرعى جىلمەن سالىستىرعاندا 40 مىڭ تونناعا ارتىق», دەدى ءوڭىر باسشىسى.

اقتوبە وبلىسى گەوگرافيالىق جاعى­نان اۋقىمدى ترانزيتتىك الەۋەتكە يە. سوندىقتان جول ساپاسى الىس-بەرىسكە كەدەرگى كەلتىرمەۋى قاجەت. بيىل جول جۇ­مىس­تارىنا 68 ملرد تەڭگەگە جۋىق قارا­جات بولىنگەن. اكىمنىڭ ايتۋىنشا, بۇل قارجىعا جەرگىلىكتى ماڭىزى بار جول­دار, قالالىق, اۋىلدارعا كىرەبەرىس, اۋىلىشى­لىك جولدار سالىنىپ جاتىر. وڭىردە وسى جىلى 565 شاقىرىم جول جابىن­دىسى (ونىڭ ىشىندە اسفالت 371,8 شاقىرىم) توسەلگەن. بۇل رەتتە وبلىس ورتالىعى اقتوبە قالاسى دا قامتىلعان. جىل سوڭىنا دەيىن 150-دەن اسا كوشە جوندەلمەك.

«حالىقارالىق ماڭىزى بار «سامارا – شىمكەنت» اۆتوجولىنىڭ «اقتوبە – ۇلعايسىن» باعىتىنداعى 262 شاقىرىمى قايتا جاڭعىرتىلىپ جاتىر. سونىڭ ىشىندە اقتوبە – حرومتاۋ ۋچاسكەسىندە (اقجار اۋىلىنان جازىق ستانساسىنا دەيىنگى) جاڭا وتپەلى كوپىر مەن 28 شاقى­رىم جول جوندەلدى. 4 جولاقتى جول­دىڭ (791–819 شاقىرىم) 2 جولاعى كولىك قوزعالىسىنا اشىلدى. سونىمەن قاتار رەسپۋبليكالىق ورتالىق – باتىس كولىك دالىزىندە ورنالاسقان «قاندىاعاش – ەمبى – شالقار – ىرعىز» اۆتوجولىندا ورتاشا جوندەۋ جالعاسىپ جاتىر. بيىلعا جوسپارلانعان 110 شاقىرىمدى تولىق اياقتاپ, پايدالانۋعا بەردىك», دەدى وبلىس اكىمى.

ا.شاحاروۆ ءوڭىردى تولىقتاي گاز, اۋىزسۋمەن قامتۋ ۇزدىكسىز جالعاسىپ جاتقانىن ايتادى. جىل سوڭىنا دەيىن تابيعي گاز 12,3 مىڭ تۇرعىنى بار 28 اۋىلعا جەتكىزىلمەك, وسىلايشا وبلىس 97 پايىز گازبەن قامتىلادى. قازىر 28 اۋىلدىڭ 22-ءسى گاز قولدانىپ وتىر.

سونىمەن قاتار بيىل 1,3 مىڭ تۇرعىنى بار 4 اۋىل ورتالىقتاندىرىلعان سۋمەن جابدىقتاۋ جۇيەسىنە قوسىلعان. جىل سوڭىنا دەيىن شامامەن 2 مىڭ تۇرعىنى بار تاعى 6 اۋىلعا اۋىزسۋ تارتىلماق.

تۇرعىن ءۇي قۇرىلىسى دا قارقىن الىپ كەلەدى. 10 ايدا 745 مىڭ شارشى مەتر تۇرعىن ءۇي پايدالانۋعا بەرىلگەن. جىل سوڭىنا دەيىن 1 ملن شارشى مەتر تۇرعىن ءۇي سالىنباق. الەۋمەتتىك وسال ساناتتاعى وتباسىلارعا تۇرعىن ءۇي ساتىپ الۋعا 14,3 ملرد تەڭگە ءبولىنىپ, 419 وتباسى باسپانالى بولعان.

«سونداي-اق اۋىلدىق جەرلەردە 22 مەديتسينالىق نىسان سالىنىپ, قاجەتتى جابدىق, ماماندارمەن قامتاماسىز ەتىلدى. ال جىل سوڭىنا دەيىن 7 نىسان قۇرىلىسى اياقتالىپ, تاعى 4 مىڭنان اسا ادام مەديتسينالىق كومەكپەن قامتىلماق. ولار شالقار اۋدانىنداعى توعىز, سارىساي, شوقىسۋ اۋىلدارىندا, ىرعىز اۋدانىنداعى نۇرا اۋىلى, مۇعالجار اۋدانىنداعى جارىق, قايىندى اۋىلدارىندا, قوبدا اۋدانىنداعى بەگالى اۋىلىندا اشىلادى», دەدى وبلىس باسشىسى.

ءبىلىم سالاسىندا «كەلەشەك مەك­تەپ­تەرى» ۇلتتىق جوباسى اياسىندا وبلىستا 3 500 ورىندىق 5 جاڭا مەكتەپ پايدالا­نۋ­عا بەرىلىپ, تاعى ءبىر مەكتەپ ۇكىمەت رەزەرۆى ەسەبىنەن سالىنعان. جىل سوڭىنا دەيىن 5 800 ورىندىق 7 جايلى مەكتەپ اشىلماق, ونىڭ تورتەۋى – اقتوبە قالاسىندا, ۇشەۋى – اۋىلدىق جەرلەردە. سونىمەن قاتار اششىساي, جازىق, ويىلدا جاڭا مەكتەپتەر, قوسىمشا سپورت زالدارى مەن جاپسارلاس عيمارات­تار سالىنىپ جاتىر.

سونىمەن قاتار مەملەكەت باسشى­سىنىڭ تاپسىرماسىمەن اقتوبەدە جاڭا زاماناۋي دراما تەاترى سالىنىپ جاتىر.

مۇمكىندىگى شەكتەۋلى جاندارعا ار­نالعان ينكليۋزيۆتى سپورت كەشەنى­نىڭ قۇرى­لىسى دا اياقتالۋعا جاقىن, وندا 25 سپورت ءتۇرى بويىنشا وقىتۋ جوس­پارلانىپ وتىر. ۋەفا-نىڭ ءتورتىنشى كاتەگوريا­سىنا ساي كەلەتىن 35 مىڭ ورىندىق جاڭا ستاديوننىڭ قۇرىلىسى دا باستالعان.

مەملەكەت باسشىسىنىڭ جاپپاي تسيفر­لاندىرۋ تاپسىرماسى اياسىندا بىرقاتار جۇمىس اتقارىلعان. ماسەلەن, ءوڭىر تۇرعىندارىنىڭ قاۋىپسىزدىگىن قامتاماسىز ەتۋگە وبلىس اۋماعىنداعى 19 600-دەن اسا بەينەباقىلاۋ كامەراسى جەدەل باسقارۋ ورتالىعىنا قوسىلعان. ونىڭ ىشىندە 834 كامەرا جاساندى ينتەللەكت جۇيەسىمەن جابدىقتالعان.

«بيىل اقتوبە وبلىسىنىڭ كوپسا­لالى اۋرۋحاناسى بازاسىندا «احۋالدىق ورتالىق» ىسكە قوسىلدى. وعان تەلەمە­دي­تسينا مەن PACS ينفورماتسيالىق جۇيەسى ەنگىزىلدى. تەلەمەديتسينا باعىتى ءوڭىرى­مىزدىڭ شالعاي اۋداندارىنداعى ناۋقاستارعا زاماناۋي تسيفرلىق تەحنولوگيالار نەگىزىندە ساپالى كەڭەس بەرەدى. سونداي-اق ناۋقاستاردىڭ بارلىق راديولوگيالىق زەرتتەۋلەرىنە (كت, مرت, رەنتگەن) جاساندى ينتەللەكت قولدانا وتىرىپ, PACS اقپاراتتىق جۇيەسى ارقىلى ورتالىقتاندىرۋ مەن وڭدەۋ جۇزەگە اسىرىلادى. بۇعان قوسا ەلىمىزدە العاشقى وبلىستاردىڭ ءبىرى بولىپ «ياندەكس.كارتالار» پلاتفورماسى ارقىلى ءبىرىنشى ساناتتاعى جەدەل جاردەم كولىكتەرىنىڭ قوزعالىسىن ناقتى ۋاقىت رەجىمىندە باقىلاۋ جوباسى ىسكە قوسىلدى», دەدى ا.شاحاروۆ.

كەلەر جىلعا دا جوسپار كوپ. ءوڭىردىڭ ەكونوميكالىق ءوسىمى كەمىندە 105 پايىزدى قۇراۋ قاجەت ەكەنىن ايتتى اكىم. ونەركاسىپ سالاسىندا 3 ترلن تەڭگە ءونىم وندىرىلمەك. سونداي-اق ۇكىمەت قويعان جوسپارعا سايكەس وبلىسقا 2 ترلن تەڭگەگە جۋىق ينۆەستيتسيا تارتىلادى. ال نورماتيۆتىك جاعدايداعى اۆتوجولداردىڭ ۇلەسى 85 پايىزعا جەتكىزىلەدى. ءوڭىر حالىقتى كوگىلدىر وتىنمەن قامتاماسىز ەتۋ ماقساتىندا 2 مىڭنان اسا تۇرعىندى قامتيتىن 3 وتپەلى جوبانى اياقتاپ, 3 جاڭا جوبانى جۇزەگە اسىرۋدى جوسپارلاپ وتىر. بارلىق قارجىلاندىرۋ كوزىنەن 1,1 ملن شارشى مەتر تۇرعىن ءۇيدى دە پايدالانۋعا بەرۋ جالعاسادى. بۇعان قوسا شالعاي اۋىلداردا جەرگىلىكتى بيۋدجەت پەن باسقا قارجى كوزدەرىنەن 3 300 ورىندىق 12 ءبىلىم نىسانى سالىنادى. ال رەسپۋبليكالىق قاراجات ەسەبىنەن اقتوبە قالاسىندا «وبلىستىق قان ورتالىعىنىڭ» قۇرىلىسى باستالادى. 35 مىڭ ادامعا شاقتالعان فۋتبول ستاديونىنىڭ, 5 مىڭ ورىندىق كوپفۋنكتسيونالدى سپورت كەشەنىنىڭ, جاڭا دراما تەاتردىڭ قۇرىلىسى جالعاسادى.

وبلىس باسشىسىنىڭ ايتۋىنشا, قازىرگى ۋاقىتتا ءوڭىردىڭ الەۋمەتتىك-ەكونوميكالىق دامۋى, قوعامدىق-ساياسي احۋالى تۇراقتى. وزەكتى ماسەلەلەردىڭ بارلىعى اكىمنىڭ باقىلاۋىندا.