ۇكىمەت تاراپىنان ازىق-ت ۇلىك باعاسىنا باقىلاۋ كۇشەيتىلەدى

قاراشا ايىنىڭ العاشقى ەكى اپتاسىندا قازاقستاندا الەۋمەتتىك ماڭىزى بار ازىق-ت ۇلىك تاۋارلارىنىڭ جالپى باعاسى 0,1% ءوستى. بىرقاتار كوكونىستىڭ باعاسى ارزانداپ جاتىر. مىسالى ءسابىز 1,7%-عا, ورامجاپىراق 1,8%-عا, پياز 0,4%-عا ارزاندادى. دەگەنمەن, كارتوپ باعاسى ءوسىپ وتىر. ول سوڭعى اپتادا 0,2%-عا, قاراشانىڭ العاشقى ەكى اپتاسىندا 2,2%-عا كوتەرىلدى. ەل بويىنشا كارتوپتىڭ ورتاشا باعاسى – كيلوگرامىنا 188 تەڭگە.

ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆانىڭ مالىمەتىنشە, كارتوپ باعاسىنىڭ سوڭعى 4-5 اپتادا 4,5%-عا قىمباتتاۋىنا ەكسپورتتىڭ قايتا جاندانۋى اسەر ەتكەن.

«ەكى ايدا كارتوپ ەكسپورتى 300 مىڭ توننانى قۇرادى. ال جاقىن ۋاقىتقا جوسپارلانعان ەكسپورتتىق كەلىسىمشارتتار كولەمى شامامەن 200 مىڭ توننا. وسىلايشا, ءبىز ەلدىڭ ازىق-ت ۇلىك قاۋىپسىزدىگى ءۇشىن قاۋىپسىز بولىپ سانالاتىن 500 مىڭ توننالىق جوسپارلى شەككە جاقىنداپ كەلەمىز», دەدى ايجان بيجانوۆا.

ۆيتسە-پرەمەر ساۋدا جانە ينتەگراتسيا مينيسترلىگىنە كارتوپ قورىنىڭ جەتكىلىكتى كولەمىن قامتاماسىز ەتۋ ماسەلەسىن سىرتقى ساياسات جانە حالىقارالىق ەكونوميكالىق ۇيىمدارعا قاتىسۋ جونىندەگى ۆەدومستۆوارالىق كوميسسيانىڭ قاراۋىنا ەنگىزۋدى تاپسىردى.

قاراشانىڭ ەكى اپتاسى ىشىندە تاۋىق جۇمىرتقاسى مەن قۇس ەتىنىڭ باعاسى دا 0,4%-عا ءوستى. بۇعان نەگىزىنەن جەم-ءشوپ پەن يمپورتتىق قۇرامداس بولىكتەردىڭ قىمباتتاۋى سەبەپ بولىپ وتىر. ايجان بيجانوۆانىڭ ايتۋىنشا, كۇنباعىس مايىن وندىرۋشىلەر قۇس فابريكالارىن جەم وندىرىسىنە قاجەتتى ارزانداتىلعان ماي كولەمىمەن قامتاماسىز ەتكەن. باعانى ۇستاپ تۇرۋ ءۇشىن ارزانداتىلعان استىق تا قاجەت. وسىعان بايلانىستى سەرىك جۇمانعارين ازىق-ت ۇلىك كورپوراتسياسىنا قىسقا مەرزىمدە قۇس فابريكالارىن رەزەرۆتەن جەمدىك استىقپەن قامتاماسىز ەتۋدى جانە اۋىل شارۋاشىلىعى جارمەڭكەلەرىندە قولجەتىمدى قۇس ەتىنىڭ كولەمىن ارتتىرۋدى تاپسىردى.

قاراقۇمىق جارماسىنىڭ باعاسى قاراشا ايىنىڭ العاشقى ەكى اپتاسىندا 1,3%-عا قىمباتتاعاندىقتان, ازىق-ت ۇلىك كورپوراتسياسىنا بۇل ءونىمنىڭ قوسىمشا كولەمىن تۇراقتاندىرۋ قورلارىنا تىكەلەي ساتىپ الىپ بەرۋ ارقىلى تولىقتىرۋ مىندەتى جۇكتەلدى.

«كوممۋنالدىق قىزمەت تاريفتەرىن وزگەرتۋ ۋاقىتشا توقتاتىلعان. قازىرگى تاڭدا ينفلياتسياعا ىقپال ەتىپ وتىرعان جانە مەملەكەتتىك شارالارمەن رەتتەۋگە بولاتىن نەگىزگى فاكتور – ازىق-ت ۇلىك تاۋارلارى. بۇل تەك الەۋمەتتىك ماڭىزى بار ونىمدەرگە عانا ەمەس, ازىق-ت ۇلىك قورجىنىنا كىرەتىن ءارى مەملەكەتتىك رەتتەۋ اياسىنان تىس قالعان بارلىق تاۋارلارعا دا قاتىستى. ساۋدا جانە ينتەگراتسيا مينيسترلىگى ازىق-ت ۇلىك قورجىنىنىڭ قۇرامىنا تالداۋ جۇرگىزىپ, باعانى تۇراقتاندىرۋعا باعىتتالعان ناقتى ۇسىنىستار ازىرلەۋى ءتيىس», دەدى سەرىك جۇمانعارين.

سونداي-اق تاۋار اينالىمى تولىق قاداعالانۋى قاجەت. ارتىق دەلدالداردى جويۋ, باقىلاۋ مەن قۇجات اينالىمىن كۇشەيتۋ – نارىقتىڭ اشىقتىعىن ارتتىرۋعا جانە شىعىنداردى ازايتۋعا مۇمكىندىك بەرەدى. بۇل ءوز كەزەگىندە باعانىڭ قولجەتىمدى دەڭگەيدە ساقتالۋىنا ىقپال ەتەدى.