ەلىمىزدىڭ قورعانىس سالاسى تسيفرلىق جوبالاردى ارتتىرماق. وسىعان وراي اسكەردى باسقارۋ, شاقىرۋ, دايارلاۋ مەن وقىتۋ ۇدەرىسى وزگەرەدى.
قورعانىس ءمينيسترىنىڭ تسيفرلاندىرۋ جونىندەگى ورىنباسارى دارحان احمەديەۆتىڭ ايتۋىنشا, قازىرگى ارميا – تەك كۇش پەن قۋات ەمەس, ول ەڭ الدىمەن ينتەللەكت. بۇل تسيفرلىق ترانسفورماتسيا – پرەزيدەنت ايقىنداعان ستراتەگيالىق باعىتتاردىڭ ءبىرى.
تسيفرلاندىرۋ جانە ءىت قىزمەتكەرلەرى كۇنى قارساڭىندا ۇيىمداستىرىلعان كورمەدە مينيسترلىك نەگىزگى تسيفرلىق جوبالاردى تانىستىردى. كورمەدە 16 ينتەراكتيۆتى الاڭ جۇمىس ىستەدى. وندا تسيفرلىق سەرۆيستەردىڭ جۇمىسى ناقتى ۋاقىت رەجىمىندە كورسەتىلدى.
نەگىزى مينيسترلىك جىل سوڭىنا دەيىن كادرلىق ەسەپ جۇيەسىندە ءىسساپار, دەمالىس بيلەتتەرى, زاتتىق اتتەستات پەن اسكەري اتاق مەرزىمىن كورسەتەتىن ينديكاتور سەكىلدى 8 جاڭا ءمودۋلدى ىسكە قوسۋدى جوسپارلاپ وتىر. وسى ماقساتتا «Smart اسكەري كوميسساريات» جوباسى ىسكە قوسىلادى. بۇل اسكەرگە شاقىرۋ تۋرالى SMS-حابارلامالار جىبەرىپ, اۆتوماتتى تىركەۋ, كەيىنگە قالدىرۋدى ونلاين راسىمدەۋگە مۇمكىندىك بەرەدى. سونداي-اق د.احمەديەۆتىڭ ايتۋىنشا, جۋىق ارادا مەديتسينالىق تەكسەرۋ دە تسيفرلانادى.
«كەلىسىمشارتپەن قىزمەتكە ونلاين قابىلداۋ Jauynger.gov.kz پورتالى ارقىلى جۇزەگە اسىرىلادى. قازىرگى ۋاقىتتا اسكەري-تەحنيكالىق ماماندىقتار بويىنشا وقۋعا كەزەككە قويۋ جانە جولداۋ جۇيەسى اۆتوماتتاندىرىلدى. Sarbaz 2.0 مەرزىمدى اسكەري قىزمەتشىلەردىڭ جەتىستىكتەرىن تىركەپ, ءبىلىم گرانتتارىن ءادىل بولۋگە كومەكتەسەدى. ال Askeri Ziyat بىرىڭعاي ءبىلىم بەرۋ پلاتفورماسى قورعانىس مينيسترلىگىنىڭ كوللەدجدەرى مەن جوو-لارىنا ونلاين ءوتىنىم بەرۋگە مۇمكىندىك بەرەدى. بۇعان قوسا اسكەري قىزمەت ماسەلەلەرى بويىنشا Armia.kz «تسيفرلىق كەڭەسشىسى» جۇمىس ىستەيدى. ول زاڭناما وزگەرگەن جاعدايدا مالىمەتتەردى اۆتوماتتى تۇردە جاڭارتىپ وتىرادى. «بەس قارۋ» جوباسى بولسا جاساندى ينتەللەكت ارقىلى اسكەري دايىندىق ناتيجەلەرىن تالداپ, اتىس, دەنە دايارلىعى جانە ارنايى پاندەر بويىنشا جەكە ۇسىنىستار بەرەدى», دەپ ءتۇسىندىردى د.احمەديەۆ.
مينيسترلىك وكىلى مۇنداي تسيفرلىق شەشىمدەر ۋاقىتتى ۇنەمدەپ, بيۋدجەت شىعىندارىن قىسقارتىپ, ادامي فاكتوردى ازايتاتىنىن ايتادى.