رەسەي فەدەراتسياسى قورعانىس مينيسترلىگى ورتالىق مۇراعاتىنىڭ 11.09.2014 ج. №44116س-1950 ج. انىقتاماسىن نەگىزگە الىپ ماسكەۋ قالالىق اسكەري كوميسسارى ۆ. ششەپيلوۆ: «قاتارداعى جاۋىنگەر الماس قۇرمانعاليەۆ 1903 جىلى الماتى وبلىسى, جامبىل اۋدانى, ۇزىناعاش اۋىلىندا تۋعان. فرۋنزە اۋداندىق اسكەري كوميسسارياتىنان 1941 جىلى 22 قاڭتاردا اسكەرگە شاقىرىلىپ, 1943 جىلى اسكەري مىندەتىن ورىنداۋ كەزىندە ەرلىكپەن مەرت بولدى. باۋىرلاستار بەيىتىنە جەرلەنگەن, دەپ باستاپتى حاتىن.
سودان سوڭ تاعى ءبىر قاتارداعى جاۋىنگەر جولداس قۇرمانعاليەۆ تۋرالى ايتا كەلىپ: «ول 1897 جىلى الماتى وبلىسى, لەنين اۋىلدىق كەڭەسى, لەنين كولحوزىندا تۋعان. فرۋنزە اۋداندىق اسكەري كوميسسارياتىنان اسكەرگە شاقىرىلىپ, 126 وسۆ, - 11ا, س-3 مايدانى قۇرامىندا شايقاستى. 1942 جىلى لەنينگراد وبلىسى, پولاۆسك اۋدانى, يۆاشەۆو سەلوسى ءۇشىن شايقاستا باتىرلىعىمەن ەرلىك كورسەتىپ, اۋىر جارالاندى. سول جاراقاتىنىڭ سالدارىنان 1942 جىلدىڭ 10 جەلتوقسانىندا قازا بولىپ, يۆاشەۆو سەلوسىنداعى №18 بەيىتكە جەرلەندى», – دەپتى الماتى وبلىسى بويىنشا قورعانىس ىستەرى جونىندەگى دەپارتامەنتىنىڭ باستىعى, پولكوۆنيك مۇرات دارمانقۇلوۆقا جولداعان حاتىندا. سونداي-اق, ماسكەۋ قالاسىنىڭ اسكەري كوميسسارى ۆ. ششەپيلوۆ جەڭىستىڭ 70 جىلدىعىنا وراي الماس قۇرمانعاليەۆكە تۋىپ-وسكەن اۋىلى ۇزىناعاشتان ءبىر كوشەنىڭ اتىن بەرۋدى سۇراعان 17.03.2015 ج. № ورگ 1019 مىنەزدەمەسىن دە جىبەرىپتى. قوش. اسكەري قىزمەتكەرلەر ءتول مىندەتىن ادال ورىندادى دەگەن حابارمەن توقتالماي مايدانگەرلەر تۋرالى ماعلۇماتتى ىندەتە تۇسۋىمىزگە ۇرپاعىنىڭ ۇلاعاتتى ءىسى سەبەپ بولىپ وتىر. جولداس قۇرمانعاليەۆتىڭ شوبەرەسى رۋسلان 2014 جىلدىڭ كۇزىندە اتاسىنىڭ ءمايىتى جاتقان قابىر باسىنا بارىپ, ءتاۋ ەتىپ, ءتيىستى ورىندار كەلىسىمىمەن ءبىر ۋىس توپىراقتى بەت ورامالىنا ءتۇيىپ اكەلىپ, ۇرپاقتارىنىڭ اتىنان ارناپ ورناتىلعان ەسكەرتكىش, ەڭسەلى ءمارمار تاس تۇبىنە مۇسىلماندىق راسىممەن سالدى. «ەرتەرەكتە اكەي دە قوس ارىسقا ىزدەۋ سالعان ەكەن. بەرتىندە شەشەم قىزتىلەۋ وقتىن-وقتىن ويىما سالا بەردى. سودان رەسەيدەگى ارىپتەستەرىمنىڭ قولداۋىمەن ۇلىم رۋسلاندى وسىناۋ يگىلىكتى ءىستى اتقارۋعا مۇمكىندىك جاسادىم. ناتيجەسىن حالىق كورىپ, العىستارىن جاۋدىرۋدا», دەيدى قر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى الماتى وبلىستىق باسقارماسىنىڭ باستىعى جۇماگەلدى قۇرمانعاليەۆ. نەگىزى ەكى مەملەكەت اراسىندا جانە وزگە ەل ىشىندە ەركىن ءجۇرۋ, دىتتەگەن جەرىنە بەلگىلەنگەن ۋاقىتتا بارىپ قايتۋ ءۇشىن قاجەتتى قۇجاتتاردى رەتتەستىرۋ ءاۋ باستا كوزدەگەن ماقساتقا قالاي دا جەتۋگە دەگەن ۇمتىلىستان تۋارى انىق. ەڭ باستىسى, پەرزەنتتىك پارىزدى وتەۋ بولىپ سانالادى. وسى تۇستا باسا ايتار ءبىر جايت – مارقۇم جولداس قۇرمانعاليەۆتىڭ سۇيەگى رەسەي فەدەراتسياسىنىڭ پرەزيدەنتى ۆلاديمير پۋتين تۋىپ-وسكەن يۆاشەۆو سەلوسىندا جەرلەنگەندىگى بولىپ وتىر. سول سەلودا جالعىز ۇلى اۋەسحاننىڭ قولىنان ۇستاپ, زايىبى جانە قايىنبيكەسىمەن قاتار وتىرىپ تۇسكەن فوتوسۋرەت تە قالعان شىعار. ويتكەنى, ىشكى دۇنيەسى سەزدىردى مە ەكەن سول ەستەلىك فوتوسۋرەتكە قالاي دا ءتۇسىپ, ءتوس قالتاسىنا سالىپ اكەتۋ جولداس قۇرمانعاليەۆتىڭ شەشىمى بولىپتى. بۇل فوتوسۋرەت بىزگە ءبىر فاكت بولىپ, ۇرپاعىنىڭ قۇندىلىعىنا اينالدى. قورىتا ايتقاندا, ماسكەۋ قالالىق اسكەري كوميسسارىنىڭ ۇسىنىسىن ءبىز دە قولداپ, ءتيىستى ورىندار نازارىنا ۇسىنامىز.
نۇربول الدىباەۆ,
«ەگەمەن قازاقستان».
الماتى وبلىسى.