مەملەكەت باسشىسى قاسىم-جومارت توقاەۆ وڭىرلىك ەكولوگيالىق ءسامميتتىڭ پلەنارلىق وتىرىسىندا ءسوز سويلەدى. پرەزيدەنت ەكولوگيالىق ساياساتتى قالىپتاستىرۋ بارىسىندا ءارتۇرلى ەلدەردىڭ, اسىرەسە ەكونوميكالىق دامۋشى مەملەكەتتەردىڭ قاجەتتىلىكتەرى ەسكەرىلۋى كەرەكتىگىنە اتاپ ءوتتى, دەپ حابارلايدى Egemen.kz.
مەملەكەت باسشىسى بۇل تۇرعىدا دامىعان ەلدەر قازىرگى ەكولوگيالىق ستاندارتتارعا ۇزاق يندۋستريالاندىرۋ ۇدەرىسى ارقىلى جەتكەنى نازارعا الىنۋى تيىستىگىن جەتكىزدى.
️«مەنىڭ ويىمشا, ەكولوگيا ماسەلەسىندە تاڭداۋلىلارعا باسىمدىق بەرۋ ابەستىك. كوپ جاعدايدا ەكولوگيالىق كۇن ءتارتىبىن ازىرلەۋ نەمەسە قالىپتاستىرۋ بارىسىندا ءتۇرلى ايماقتار مەن ەلدەردىڭ, اسىرەسە, ەكونوميكالىق الەۋەتىن نىعايتۋعا دەن قويعان دامۋشى مەملەكەتتەردىڭ قاجەتتىلىكتەرى مۇلدەم ەسكەرىلمەيدى. الايدا دامىعان ەلدەر قازىرگى ەكولوگيالىق ستاندارتتارعا يندۋستريالاندىرۋدىڭ ۇزاققا سوزىلعان ۇدەرىسىنىڭ ناتيجەسىندە جەتكەنىن ەستەن شىعارمايىق. سوندىقتان جاھاندىق ەكولوگيالىق مودەلگە كوشۋ ءۇردىسى ءادىل, تەڭگەرىمدى جانە ىنتالاندىرۋشى سيپاتتا وربۋگە ءتيىس», دەدى پرەزيدەنت.
مەملەكەت باسشىسى وڭىرلىك ەكولوگيالىق ءسامميتتىڭ پلەنارلىق وتىرىسىندا ءسوز سويلەدى
پرەزيدەنتتىڭ پايىمىنشا, بارشامىز اقىلعا قونىمدى, مۇقيات ويلاستىرىلعان پراگماتيكالىق تاسىلگە جۇگىنۋىمىز كەرەك.
«سوندا عانا مەملەكەتتەر ورنىقتى دامۋ قاعيداتتارىنا ساي العا جىلجىپ, ءوزىنىڭ ەكونوميكالىق ءوسىمى مەن پروگرەسىنە قاۋىپ توندىرمەيدى. قورشاعان ورتانى قورعاۋ سالاسىنداعى ىنتىماقتاستىق ءبىزدى بولمەي, كەرىسىنشە ءبىر ماقساتقا بىرىكتىرۋگە ءتيىس. ەشكىم ءبىر-ءبىرىن جاريا تۇردە ايىپتاماۋى, وزگەدەن ءمىن ىزدەمەۋى قاجەت. بەيبىتشىلىك پەن ورنىقتى دامۋعا مۇددەلى سەرىكتەستەر رەتىندە جاۋاپكەرشىلىكتى سەزىنىپ, ناقتى ارەكەت ەتكەنىمىز دۇرىس».