تۇركىستان وبلىسى, وتىرار اۋدانىندا قالىڭ جۇرت كورنەكتى اقىن, ۇلت قايراتكەرى, قازاقستاننىڭ حالىق جازۋشىسى مۇحتار شاحانوۆپەن قوشتاستى. اقىننىڭ اماناتىنا ساي, جانازاسى وقىلىپ, تۋعان جەرىنىڭ توپىراعىنا جەرلەندى, دەپ حابارلايدى Egemen.kz.
قوشتاسۋ راسىمىنە ەلىمىزدىڭ ءار وڭىرىنەن كەلگەن زيالى قاۋىم وكىلدەرى, اقىن-جازۋشىلار, مەملەكەت جانە قوعام قايراتكەرلەرى, وقىرماندار قاتىسىپ, اقىن رۋحىنا تاعزىم ەتتى. قارالى جيىندا تۇركىستان وبلىسىنىڭ اكىمى نۇرالحان كوشەروۆ ءسوز سويلەپ, مۇحتار شاحانوۆتىڭ قازاق رۋحانياتىنداعى ورنى ايرىقشا ەكەنىن اتاپ ءوتتى.
«قازاق رۋحانياتى اۋىر قازاعا ۇشىرادى. مۇحتار شاحانوۆ – ۇلت مۇددەسىن بارىنەن بيىك قويعان قايسار تۇلعا. ول سانالى عۇمىرىن ءتىل مەن ءداستۇردى ۇلىقتاۋعا ارنادى, پوەزيانى جاڭا بيىككە كوتەردى», دەدى ءوڭىر باسشىسى.
جيىندا سونداي-اق ءماجىلىس دەپۋتاتتارى مەن زيالى قاۋىم وكىلدەرى ءسوز الىپ, اقىننىڭ ازاماتتىق ۇستانىمى مەن شىعارماشىلىق مۇراسىن ەرەكشە قۇرمەتپەن ەسكە الدى. اس بەرىلىپ, قۇران باعىشتالىپ, مارقۇمنىڭ رۋحىنا دۇعا جاسالدى.
مەملەكەت باسشىسى مۇحتار شاحانوۆتىڭ وتباسىنا كوڭىل ايتۋ جەدەلحاتىن جولدادى
مۇحتار شاحانوۆ – پوەزيا ارقىلى حالىقتىڭ ار-وجدانىن, ۇلتتىق نامىسىن اسقاقتاتقان ءىرى تۇلعا. ول قوعامدىق ومىردە دە بەلسەندى بولىپ, جەلتوقسان وقيعاسى, ءتىل تاعدىرى, ۇلتتىق سانا ماسەلەلەرىن باتىل كوتەردى. ءار جىلدارى كسرو حالىق دەپۋتاتى, پارلامەنت ءماجىلىسىنىڭ دەپۋتاتى, قازاقستاننىڭ قىرعىز رەسپۋبليكاسىنداعى توتەنشە جانە وكىلەتتى ەلشىسى قىزمەتتەرىن اتقاردى.
اقىننىڭ شىعارماشىلىق مۇراسى اسا باي. ونىڭ تۋىندىلارىندا ادامگەرشىلىك, ماحاببات, رۋحانيات پەن وركەنيەت تاعدىرى تەرەڭ كورىنىس تاپقان.
مۇحتار شاحانوۆتىڭ ەڭبەگى جوعارى باعالانىپ, ول «قازاقستاننىڭ ەڭبەك ەرى», «قازاقستاننىڭ حالىق جازۋشىسى», «قىرعىز رەسپۋبليكاسىنىڭ حالىق اقىنى» اتاقتارىنا يە بولدى.
اقىننىڭ ارتىندا قالعان مول رۋحاني مۇراسى مەن تاعىلىمدى جولى كەلەر ۇرپاققا قىزمەت ەتە بەرەتىنى انىق.
الماتىدا مۇحتار شاحانوۆتى اقتىق ساپارعا شىعارىپ سالدى