قازاق فۋتبولىنىڭ جانكۇيەرلەرى سوڭعى ۋاقىتتا داستان ساتپاەۆتىڭ بولاشاعىنا ەرەكشە قىزىعۋشىلىق تانىتىپ وتىر. جاس شابۋىلشىنىڭ ەۋروپاعا جول تارتۋى جانە ونىڭ «چەلسي» جۇيەسىندەگى مۇمكىندىگى كوپتەگەن تالقىلاۋعا ارقاۋ بولدى. اسىرەسە, الەمدىك فۋتبولدا جاس تالانتتاردى دامىتۋىمەن كوزگە تۇسكەن حابي الونسو سەكىلدى ماماننىڭ قول استىندا ويناۋ مۇمكىندىگى فۋتبولسۇيەر قاۋىمنىڭ قىزىعۋشىلىعىن ارتتىرا ءتۇستى, دەپ حابارلايدى Egemen.kz.
Qazsport تەلەارناسىنىڭ كوممەنتاتورى ەرنۇر دۇيسەنعازىنىڭ ايتۋىنشا, ساتپاەۆ ءۇشىن شەشۋشى كەزەڭ ماۋسىم الدىنداعى وقۋ-جاتتىعۋ جيىنى بولماق. بارلىق ويىنشىلاردىڭ باسىن قوساتىن جيىندا باپكەر ءار فۋتبولشىنىڭ دەڭگەيىن باعالايدى.
«ەگەر داستان ءوزىنىڭ دارىنى مەن مۇمكىندىگىن كورسەتە السا, نەگىزگى قۇرامنان ورىن الۋى دا عاجاپ ەمەس. ويتكەنى سوڭعى ماۋسىمدا «چەلسيدىڭ» شابۋىل شەبىندەگى ويىنشىلاردىڭ بارلىعى بىردەي تۇراقتى ويىن كورسەتە العان جوق», دەيدى ول.
ساراپشىنىڭ پىكىرىنشە, داستاننىڭ باستى ارتىقشىلىقتارىنىڭ ءبىرى − ونىڭ بىرنەشە شابۋىل پوزيتسياسىندا ويناي الۋى. سوندىقتان باپكەر ونى تەك ورتالىق شابۋىلشى رەتىندە عانا ەمەس, قاپتالداعى شابۋىلشى نەمەسە ەركىن شابۋىلشى رولىندە دە پايدالانا الادى. دەگەنمەن, «چەلسي» سەكىلدى الپاۋىت كلۋبتا باسەكەلەستىك وتە جوعارى. ەرنۇر دۇيسەنعازىنىڭ ايتۋىنشا, نەگىزگى قۇرامعا بىردەن وتە الماعان جاعدايدا ساتپاەۆ كلۋبتىڭ سەرىكتەس كومانداسى سانالاتىن فرانتسيانىڭ «ستراسبۋر» كلۋبىنا جىبەرىلۋى مۇمكىن. بۇل ونىڭ ويىن تاجىريبەسىن ارتتىرىپ, كەيىن نەگىزگى قۇرامعا ورالۋىنا مۇمكىندىك بەرەدى.
داستان ساتپاەۆتىڭ جەيدەسى بۋداپەشتتەگى ارنايى كورمەگە قويىلدى
فۋتبول جانكۇيەرلەرىنىڭ پىكىرىنشە دە حابي الونسونىڭ ويىن فيلوسوفياسى ساتپاەۆقا قولايلى بولۋى ىقتيمال. يسپانيالىق مامان جاس ويىنشىلارمەن جۇمىس ىستەۋدە جاقسى ناتيجەلەر كورسەتىپ كەلەدى جانە شابۋىلداعى جىلدام, تەحنيكالىق فۋتبولشىلارعا سەنىم ارتادى. داستاننىڭ جىلدامدىعى, تەحنيكاسى جانە شابۋىلداعى بەلسەندىلىگى ونىڭ بىرنەشە پوزيتسيادا ويناۋىنا مۇمكىندىك بەرەدى.
ال سپورت ءجۋرناليسى حالىم كۇزەۋحان جاس فۋتبولشىنىڭ بىردەن نەگىزگى قۇرامنان ورىن الۋى ەكىتالاي ەكەنىن ايتادى. ونىڭ پىكىرىنشە, «چەلسي» الەمنىڭ تۇكپىر-تۇكپىرىنەن تالانتتى ويىنشىلاردى جينايتىن كلۋب بولعاندىقتان, ءار ورىن ءۇشىن كۇرەس وتە جوعارى دەڭگەيدە جۇرەدى.
«مۇنداي كلۋبتاردا جاستارعا مۇمكىندىك بەرىلەدى. بىراق ولاردىڭ ارقايسىسى الدىمەن ءوز دەڭگەيىن دالەلدەۋى كەرەك. سوندىقتان ساتپاەۆ ءۇشىن ەڭ ماڭىزدىسى − تۇراقتى دامۋ مەن ويىن تاجىريبەسىن جيناقتاۋ», دەيدى ول.
ال «Aladop.kz» سپورتتىق پورتالىنىڭ ءتىلشىسى ونەر ايبولاتتىڭ پىكىرىنشە, داستان ساتپاەۆ سوڭعى بىرنەشە جىلدا ءوزىن دالەلدەپ كەلە جاتقان تالانتتى فۋتبولشىلاردىڭ ءبىرى. الايدا ول دا ەۋروپانىڭ الپاۋىت كلۋبىندا نەگىزگى قۇرامعا بىردەن ەنۋ وڭاي ەمەس ەكەنىن اتاپ ءوتتى. شىندىققا تۋرا قاراساق, 18 جاستاعى قازاق فۋتبولشىسىنىڭ بىردەن اعىلشىن پرەمەر-ليگاسىندا ويناپ كەتۋى وتە قيىن. «چەلسيدەگى» باسەكەلەستىك دەڭگەيى جوعارى. سوندىقتان العاشقى كەزەڭدە ونى جاستار قۇراماسىندا نەمەسە سەرىكتەس كلۋبتاردىڭ بىرىندە سىناپ كورۋى مۇمكىن. بۇل قالىپتى تاجىريبە. ەڭ باستىسى − ويىن تاجىريبەسىن جوعالتپاي, دامۋ جولىن جالعاستىرۋ. سوندا عانا بولاشاقتا نەگىزگى قۇرامعا جول اشىلادى.
داستان ساتپاەۆتىڭ كومانداسى: حابي الونسو «چەلسيدىڭ» باس باپكەرى اتاندى
«شىن مانىندە, بۇگىنگى فۋتبولدا جاس ويىنشىنىڭ بىردەن پرەمەر-ليگا دەڭگەيىندە جارقىراپ كەتۋى سيرەك كەزدەسەدى. سوندىقتان ساتپاەۆ ءۇشىن ەڭ ءتيىمدى جول − كلۋب جۇيەسىندە قالىپ, تاجىريبە جيناۋ. ەگەر ول ءوز مۇمكىندىگىن دۇرىس پايدالانىپ, فيزيكالىق ءارى تاكتيكالىق تۇرعىدان وسسە, بولاشاقتا نەگىزگى قۇرامعا جول اشىلۋى ابدەن مۇمكىن», دەيدى ونەر ايبولات.
قورىتىندىلاي ايتقاندا, داستان ساتپاەۆتىڭ «چەلسي» جۇيەسىنە قوسىلۋى ونىڭ مانسابىنداعى عانا ەمەس, قازاق فۋتبولى ءۇشىن دە ماڭىزدى بەلەس. الايدا ۇلكەن كلۋبتىڭ تابالدىرىعىن اتتاۋ مەن سول كلۋبتا تۇراقتى ويناۋدىڭ اراسى جەر مەن كوكتەي. سوندىقتان بۇگىننەن باستاپ ونى پرەمەر-ليگانىڭ جۇلدىزىنا اينالدىرىپ جىبەرۋ دە, كەرىسىنشە مۇمكىندىگىن جوققا شىعارۋ دا اسىعىستىق بولار ەدى. قازىر داستانعا ەڭ قاجەت نارسە − تۇراقتى دامۋ, ەڭبەك جانە شىدام. ەگەر ول جوعارى دەڭگەيدەگى باسەكەگە توتەپ بەرىپ, ءوز مۇمكىندىگىن دالەلدەي السا, «چەلسيدىڭ» نەگىزگى قۇرامىنا جول تابۋى ابدەن مۇمكىن. ال بۇل تەك ءبىر فۋتبولشىنىڭ جەتىستىگى ەمەس, وتاندىق فۋتبولدىڭ جاڭا بەلەسكە كوتەرىلگەنىن كورسەتەتىن ماڭىزدى وقيعا بولماق.
«چەلسي» جانكۇيەرلەرى داستان ساتپاەۆتىڭ گولىنا ءتانتى بولدى
جاناسىل زايتيمحان,
ەۇۋ ستۋدەنتى