الەمدى انىمەن الديلەگەن ديماش قۇدايبەرگەن بىزگە – شەكاراشىلارعا قوناققا كەلدى. ول ۇقك شەكارا قىزمەتى الماتى وبلىسى دەپارتامەنتىنە قاراستى رايىمبەك اۋدانى شەكارا باسقارماسىنىڭ تاۋلى شەكارا بولىمشەسىنە تابان تىرەدى. ءۇش مەملەكەتتىڭ شەكاراسى تۇيىسكەن قاسيەتتى وڭىرگە كەلگەن ونەر يەسىنىڭ بۇل ساپارى شەكاراشىلار ءۇشىن كۇتپەگەن ءارى ەرەكشە وقيعا بولدى.
بۇل كەزدەسۋدىڭ باستاۋىندا مادەنيەت جانە اقپارات مينيسترلىگىنىڭ تاپسىرىسى بويىنشا ۇلتتىق كينونى قولداۋ ورتالىعى شەكاراشىلار تۋرالى ءتۇسىرىلىپ جاتقان «تايماس» كوركەم ءفيلمى ارقاۋ بولىپ تۇر. فيلم جەلىسى ادام مەن ءيتتىڭ اراسىنداعى ادال دوستىققا قۇرىلعان. ءبىر كۇنى يەسىنەن قاپيادا ايىرىلعان قىزمەتتىك يت ومىرگە دەگەن قىزىعۋشىلىعىن جوعالتادى. سول ساتتە بولىمشەگە شەكارا قىزمەتىنىڭ قىزمەتتىك كينولوگيا ورتالىعىنان وفيتسەر كەلەدى. ونىڭ دا تاعدىرى اۋىر ەدى. وزىنە ادال قىزمەت ەتكەن ءتورت اياقتى سەرىگىن جوعالتقان شەكاراشى قىزمەتتەن كەتۋگە بەل بۋعان بولاتىن. الايدا تاعدىردىڭ توسىن سىيى وفيتسەر مەن شەكاراشى ءيتتى جولىقتىرىپ, ارالارىندا ەرەكشە بايلانىس ورناتادى.
ديماش قۇدايبەرگەننىڭ اكەسى «پاراسات» وردەنىمەن ماراپاتتالدى
بايىنكول وزەنىنىڭ بويىندا ورنالاسقان شەكارا بولىمشەسىندە كۇن-ءتۇن دەمەي ەڭبەك ەتىپ جاتقان ءتۇسىرىلىم توبىنىڭ ماقساتى – ادام مەن يت اراسىنداعى شىنايى دوستىق پەن ادالدىقتى دارىپتەۋ. وسىنداي قاربالاس جۇمىس ۇستىنە كەلگەن ديماش قۇدايبەرگەن شىعارماشىلىق ۇجىمعا ساتتىلىك تىلەپ, قولداۋ ءبىلدىرۋدى ازاماتتىق پارىزى ساناعانداي اسەر قالدىردى.
كورشى قىتاي ەلىندە وتكەن «I اm a singer» بايقاۋىندا توپ جارعان ديماش قۇدايبەرگەن بۇگىندە قازاقستاندى كۇللى الەمگە تانىستىرىپ, ءوزىنىڭ وشپەس ونەرى ارقىلى ۇلت مادەنيەتىن ۇلىقتاۋدى جالعاستىرىپ كەلەدى. حالىقتىڭ ۇلى بولعان ديماشتى دەپارتامەنت باستىعى پولكوۆنيك تالعات تاليپوۆ باستاعان وفيتسەرلەر مەن ساربازدار قۇشاق جايا قارسى الىپ, سۇحباتتاستى, ەستەلىككە سۋرەتكە ءتۇستى. وتان الدىنداعى بورىشىن ەل شەتىندە, جەل وتىندە اتقارىپ جۇرگەن ساربازداردىڭ ساۋالدارى كەزدەسۋگە ەرەكشە مازمۇن بەردى. ديماش تا ولاردىڭ بىردە-ءبىر سۇراعىن جاۋاپسىز قالدىرعان جوق.
«مايكل دجەكسون كەيدە ءتۇن ورتاسىندا ستۋدياسىنا جۇگىرىپ باراتىن بولعان. سەبەبى كەلگەن شابىتتى جوعالتىپ العىسى كەلمەگەن. ول مۇنى قۇدايدىڭ بەرگەن سىيى دەپ قابىلداعان. مەن دە بولاشاقتا اللانىڭ قالاۋىمەن سونداي ەرەكشە شابىت كەلسە, وتان تۋرالى, ەلىمىزدىڭ تىنىشتىعىن كۇزەتىپ جۇرگەن شەكاراشىلار تۋرالى ءان جازۋىم مۇمكىن. بۇل كەز كەلگەن ۋاقىتتا بولۋى ىقتيمال. سونداي ءسات تۋسا, مەن دە ونى قالت جىبەرمەيمىن», دەدى ءانشى.
وسى سوزدەردەن كەيىن شەكاراشىلار مەن شىعارماشىلىق توپتىڭ ريزاشىلىق كوڭىلى دۋ قول شاپالاققا ۇلاستى.
ديماش قۇدايبەرگەننىڭ «كوكجيەكتەن اسقان ءۇن» جوباسى 2 ميللياردتان استام قارالىم جينادى
تۋعان جەردىڭ شەتىندە وتكەن تاعىلىمدى كەزدەسۋدىڭ سوڭىندا ديماش قۇدايبەرگەن بولىمشەنىڭ تىلەك كىتابىنا جۇرەكجاردى لەبىزىن قالدىردى. ول ءفيلمنىڭ باستى كەيىپكەرى تايماستىڭ جانىندا تۇرىپ, باس رەجيسسەر عالىم اسىلوۆ جەتەكشىلىك ەتىپ جاتقان «تايماس» كوركەم ءفيلمىنىڭ حالىق ىقىلاسىنا بولەنەتىنىنە سەنىم ءبىلدىردى. سونداي-اق ءتۇسىرىلىم توبىنا ساتتىلىك تىلەدى. شەكاراشىلار بۇل كۇندى ۇزاق ۋاقىت ۇمىتپايتىنى انىق.
تامارا داۋلەتباەۆا,
ۇقك شەكارا قىزمەتى
الماتى وبلىسى بويىنشا دەپارتامەنتى.