اقش-تىڭ فلوريدا شتاتىنىڭ بيلىگى OpenAI كومپانياسىن جانە ونىڭ باس ديرەكتورى سەم التماندى سوتقا بەردى. ولاردىڭ ايتۋىنشا, ChatGPT اسىرەسە كامەلەتكە تولماعاندار ءۇشىن ۇلكەن قاۋىپ توندىرەدى, دەپ حابارلايدى Egemen.kz.
CNN حابارلاۋىنشا, فلوريدا – OpenAI ءونىمىنىڭ ىقتيمال قاۋپىنە بايلانىستى كومپانيانى سوتقا بەرگەن العاشقى شتات. تالاپ-ارىزدا كومپانيا ساپاسىز ءونىم ءۇشىن جاۋاپكەرشىلىك تۋرالى زاڭداردى بۇزدى, سالعىرتتىق تانىتتى جانە تۇتىنۋشىلاردى جاڭىلىستىردى دەگەن ايىپتار تاعىلعان.
فلوريدا شتاتىنىڭ باس پروكۋرورى دجەيمس ۋتمايەردىڭ ايتۋىنشا, كومپانيا جاساندى ينتەللەكت (جي) تەحنولوگياسىن دامىتۋ جارىسىندا بالالار قاۋىپسىزدىگىن ەكىنشى ورىنعا ىسىرىپ قويعان.
«سەم التمان مەن ChatGPT بالالارىمىزدىڭ قاۋىپسىزدىگىنەن گورى جاساندى ينتەللەكت سالاسىنداعى باسەكەنى تاڭدادى. ولار قوعامدىق قاۋىپسىزدىكتەن پايدانى جوعارى قويدى. فلوريدادا بۇعان جول بەرىلمەيدى», دەدى ول.
تالاپ-ارىزدا OpenAI ChatGPT قولدانۋعا بايلانىستى بىرقاتار تاۋەكەلدەردى جاسىردى دەگەن ءۋاج كەلتىرىلگەن. اتاپ ايتقاندا, جۇيە جاپپاي كىسى ءولتىرۋدى جوسپارلاۋعا كومەكتەسۋى, وزىنە قول جۇمساۋعا يتەرمەلەۋى, جاسوسپىرىمدەردى اتا-انا باقىلاۋىنسىز پايدالانۋعا داعدىلاندىرۋى جانە قولدانۋشىلاردىڭ سىني ويلاۋ قابىلەتىنە كەرى اسەر ەتۋى مۇمكىن ەكەنى ايتىلعان.
ChatGPT كامەلەتكە تولماعانداردى اۆتوماتتى تۇردە انىقتاي باستايدى
سونداي-اق تالاپكەرلەر سەم التماندى فلوريدا تۇرعىندارىنا كەلتىرىلگەن ىقتيمال زيان ءۇشىن جەكە جاۋاپكەرشىلىككە تارتۋدى سۇراپ وتىر.
ءىس ماتەريالدارىندا بۇل OpenAI-عا قاتىستى جۇرگىزىلگەن العاشقى قىلمىستىق تەرگەۋ ەكەنى كورسەتىلگەن. تەرگەۋ بارىسىندا كومپانيانىڭ 2025 جىلى فلوريدا مەملەكەتتىك ۋنيۆەرسيتەتىندە بولعان قارۋلى شابۋىلعا قانداي دا ءبىر دارەجەدە قاتىسى بار-جوعى قاراستىرىلعان. سول وقيعا كەزىندە شەريف ورىنباسارىنىڭ ۇلى 2 ادامدى اتىپ ءولتىرىپ, تاعى 4 ادامدى جارالاعان ەدى.
ءوز كەزەگىندە OpenAI وكىلى اتالعان قايعىلى وقيعاعا بايلانىستى مالىمدەمە جاساپ, «بۇل ۇلكەن تراگەديا بولعانىمەن, ChatGPT قىلمىس ءۇشىن جاۋاپتى ەمەس» دەگەن ۇستانىمىن جەتكىزگەن.
جاساندى ينتەللەكت: قازاقستاندا 50 مىڭ ادام جۇمىسسىز قالۋى مۇمكىن