ەلىمىز 1992 جىلى بۇۇ-عا مۇشە بولعان سوڭ, بىرتىندەپ ايماقتىق, الەمدىك ۇيىمداردىڭ قۇرامىنا ەنە باستادى. بىرقاتارىنا توراعالىق تا ەتتى. ەلشىلىك, كونسۋلدىقتارمەن قاتار حالىقارالىق ۇيىمداردا تۇراقتى وكىلدىكتەرىن اشتى. ديپلوماتيالىق ميسسيالاردى ورىنداپ, بىتىمگەرلىك جولعا ءوز الاڭىن ۇسىندى. سونداي-اق ەلىمىز – ەۋرووداقتىڭ ورتالىق ازياداعى باستى سەرىكتەسى.
وسىدان 10 جىل بۇرىن قازاقستان مەن ەۋروپا وداعى كەڭەيتىلگەن سەرىكتەستىك پەن ىنتىماقتاستىق تۋرالى كەلىسىمگە قول قويدى. باتىس ەلدەرىمەن مۇنداي بايلانىس ورناتقان ەلىمىز – ورتالىق ازياداعى العاشقى مەملەكەت. قازىرگە دەيىن وسى قۇجات اياسىندا ەكونوميكا, ينۆەستيتسيا, ەنەرگەتيكا, كولىك, قورشاعان ورتا, عىلىم, يننوۆاتسيا, قۇقىق سەكىلدى 29 باعىتتا ناقتى كەلىسىمدەر جاسالعان.
بۇگىندە ەلىمىز الەمنىڭ 200-گە جۋىق ەلىمەن ديپلوماتيالىق قارىم-قاتىناستا. بارلىق قۇرلىقتا وكىلدىكتەرى بار, سىرتقى ىستەر مينيسترلىگىنىڭ اقپاراتىنا سايكەس, 75 ەلشىلىك, 33 كونسۋلدىق تىركەلگەن. 54 حالىقارالىق ۇيىم, قور, باعدارلامالارمەن جۇمىس ىستەپ كەلەدى. ونىڭ ىشىندە 8 ايماقتىق ۇيىم – ەۋروپاداعى قاۋىپسىزدىك جانە ىنتىماقتاستىق ۇيىمى (ەقىۇ), يسلام ىنتىماقتاستىق ۇيىمى (يىۇ), ازياداعى ءوزارا ءىس-قيمىل جانە سەنىم شارالارى جونىندەگى كەڭەس (اوسشك), ەكونوميكالىق ىنتىماقتاستىق ۇيىمى (ەىۇ), شانحاي ىنتىماقتاستىق ۇيىمى (شىۇ), بۇۇ ازيا جانە تىنىق مۇحيت ايماعىندا بەيبىتشىلىك جانە قارۋسىزداندىرۋ جونىندەگى وڭىرلىك ورتالىعى, ەسىرتكى قۇرالدارىنىڭ, پسيحوتروپتىق زاتتار مەن ولاردىڭ پرەكۋرسولارىنىڭ زاڭسىز اينالىمىنا قارسى كۇرەس جونىندەگى ورتالىق ازيا وڭىرلىك اقپاراتتىق ۇيلەستىرۋ ورتالىعى, ورتالىق ازيا مەنەدجمەنتتى دامىتۋ قورى, 11 ۆەدومستۆوارالىق جانە تاقىرىپتىق ۇيىممەن – ازيانىڭ تابيعي زiلزالالاردى ازايتۋ جونiندەگى ورتالىعى (اتزاو), ورتالىق جانە شىعىس ەۋروپا مەملەكەتتەرىندەگى سايلاۋ ۇيىمداستىرۋشىلار بىرلەستىگى (وشەمسۇب), سىبايلاس جەمقورلىققا قارسى مەملەكەتتەر توبى (گرەكو), جاڭا تاۋەلسiز مەملەكەتتەردىڭ عالىمدارىمەن ىنتىماقتاستىقتى دامىتۋ جونiندەگi حالىقارالىق بىرلەستىگى (INتاS), حالىقارالىق الەۋمەتتىك قامتۋ بىرلەستىگى (حاقب), حالىقارالىق سۋلاندىرۋ جانە درەناج جەلىسى كوميسسياسى (ICID), ەلەكترتەحنيكالىق حالىقارالىق كوميسسياسى (ەحك), قورشاعان ورتانى قورعاۋ جونىندە حالىقارالىق زاڭ شىعارۋ كەڭەسى, ورتالىقپەن شىعىس ەۋروپا, ەۋرازيا ايماعىنداعى ەنەرگەتيكانى رەتتەۋ ورگاندارى وڭىرلىك قاۋىمداستىعى (ERRA), حالىقارالىق ستاتيستيكا ينستيتۋتى (حسي), حالىقارالىق اسكەري سپورت وداعى) بايلانىس ورناتتى.
سونداي-اق 2024 جىلى ەلىمىز شانحاي ىنتىماقتاستىق ۇيىمى, ۇجىمدىق قاۋىپسىزدىك شارتى ۇيىمى, ازياداعى ءوزارا ءىس-قيمىل جانە سەنىم شارالارى جونىندەگى كەڭەس, تۇركى مەملەكەتتەرى ۇيىمى, ارالدى قۇتقارۋ حالىقارالىق قورى جانە يسلام ازىق-ت ۇلىك قاۋىپسىزدىگى ۇيىمىنا توراعا بولدى. حالىقارالىق ۆاليۋتا قورى, حالىقارالىق قايتا قۇرۋ جانە دامۋ بانكى, ەۋروپا قايتا قۇرۋ جانە دامۋ بانكۋ سەكىلدى قارجى ينستيتۋتتارىمەن بايلانىس ورنادى.
جالپى, «قازاقستان رەسپۋبليكاسىنىڭ سىرتقى ىستەر مينيسترلىگى تۋرالى», «قازاقستان رەسپۋبليكاسىنىڭ ەلشىلىگى تۋرالى» جانە «قر توتەنشە جانە وكىلەتتى ەلشىسىنىڭ نەگىزگى مىندەتتەرى مەن قۇقىقتارى تۋرالى» ەرەجەلەر 1992 جىلدىڭ 2 شىلدەسىندە پرەزيدەنتتىڭ جارلىعىمەن بەكىتىلدى. وسى جىلى ەگەمەن ەلىمىزدىڭ سىرتقى ساياسات كونتسەپتسياسى قابىلدانىپ, كوپۆەكتورلىق قاعيدات پرينتسيپىنە باعىتتالدى.
وسىلايشا, ەلىمىز وتىز جىلدان اسا ۋاقىتتا الەمدىك قاۋىمداستىقتىڭ كوشباسشىسىنا اينالدى. الەمدەگى گەوساياسي تۇراقتىلىققا ۇلەسىن قوسىپ, بەلگىلى ەلدەر اراسىنداعى شيەلەنىستەردىڭ شەشىمىن تاباتىن, جىل سايىن ءتۇرلى ءدىنباسىلارىن ءوز الاڭىنا شاقىرىپ, بىرىكتىرۋشى مەملەكەت ۇلگىسىن كورسەتىپ كەلەدى.